Jaceuq 96 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Cardawq Yawshuif Car-awr Jaceuq-eu

¹ Ya’we Miqyaer-anr cardawq yawshuif car-awr jaceuq-awq! Mirtsaq tanqkhawr dawqtawvluf, Ya’we Miqyaer-anr carnaeq-awq.

² Ya’we Miqyaer-anr carnaeq-awr, Aqyawf-euq tsawrmyanr-anr jaceuq-awq. Tiqnan sair tiqnan, aqyawf-euq kakhof-eu jeq, Laqkhaq caer-eu guiqlanqdawq tsafgaq dzawrgaq-awq.

³ Tsawrjeuq tsawrca-euq ghanrcae, aqyawf-euq yawshaef khanqsaer-euq garkawv, dawqdzawr mr-awr; Tsawrhaqzaq dawqtawv luf-anr aqyawf-euq zanqler paq-aer ghae-eu jeq dzawrnaeq-awq.

⁴ Ya’we Miqyaer-aq, zawr huiq-eu mirnae, Yawkhav-aer jaceuq-eu tsaq mae. Aqyawf-anr miqyaer dawqtawvluf navmaqtser guv-eu tsaq mae.

⁵ Aqjeq mirnae aernar-aq, aqcawq-euq tsawrjeuq-euq miqyaer-aq, Tanqpanq aqma mawrkawr taef mae. Aerkhawf, Ya’we Miqyaer-aq, mq bae-euq ghaq mae.

⁶ Aqyawf-euq maeqshi, taqhuiq taqmanr-eu jeq hawr-eu jaqlaq yawbya javluf-awr; Aqyawf-euq yawshawr jawrduq-anr ghaq hawr-eu hawmuiq-eu jeq javluf-eu mae.

⁷ Tsawrhaqzaq-euq tsawrpaq tsawrca deuq-or, Ya’we Miqyaer-anr a’naeq-awq! Ghaq hawr-eu yawshaef khanqsaer, Ya’we Miqyaer-anr a’naeq-awq.

⁸ Aqyawf-euq tsawrmyanr-anr geux-eu yawshaef khanqsaer, Ya’we Miqyaer-anr a’naeq-awq. Lawr-eu jeq yur-awr, aqyawf-euq nymr povka lar-awq.

⁹ Ya’we Miqyaer shawr-awr hawmuiq-eu gar uqduq tanq-awq. Mirtsaq dawqtawvluf, aqyawf-euq maeqshi yawdzuq dzuq-awq.

¹⁰ Tsawrjeuq tsawrca deuq-euq ghanrcae heulof-aer aer-awq, “Ya’we Miqyaer uvlanrluf mae. Mirtsaq tanqkhawr khawf, maq jivlar paq-aer zifdanni lavzif taq-awr; Aqyawf, tsawrhaqzaq-anr tsaq-awr dawr-eu lafkhoer yarkhaqdar taef-a.”

¹¹ Mq laqkhaq bicaer-awr mirtsaq bi lurgha bi caergha-awq. Iqmalavshav hawr-eu iqmalavshav-anr kharur-eu jeq, tersar manrdov laf-awq.

¹² Daega hawr-eu daega-anr kharjawr kharjav-eu jeq, laqkhaq caer-awq. Khoernar-aq, sanqkhav-anr daef-eu arbawr deuq, Ya’we Miqyaer-euq maeqshi laqkhaqcaer taef-a.

¹³ Aqjeq mirnae aernar-aq, aqyawf oeluf-eu mae. Aqjeq mirnae aernar-aq, aqyawf, mirtsaq-anr yarkhaq dar-eu laer oeluf-eu mae. Aqyawf, mirtsaq tanqkhawr-anr tsaq-awr dawr-eu lafkhoer yarkhaq dar-awr; Tsawrhaqzaq-anr aqyawf-euq yawtsaq yawdawr nae dar taef-a.