Jaceuq 95 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Awbyav-awr Uqduqtanq Ma

¹ Lar-awq, aqdui, Ya’we Miqyaer-anr carnaeq ma. Aqdui-anr bibuq-ir naeqlaf-eu logur-anr laqkhaq caertavni gurgaq ma.

² Aqdui, aqyawf-euq maeqshi lar-awr, Aqyawf-euq guiqlanq-anr jaceuq-awr; Aqyawf-anr laqkhaq tiqcaer jaceuq-eu dawq carnaeq kar-eur.

³ Aqjeq mirnae aernar-aq, Ya’we Miqyaer-aq, Zawr huiq-eu Miqyaer mae. Miqyaer dawqtawv luf-euq khoertav zawr huiq-eu sanqpaq mae.

⁴ Mirtsaq-euq khoertav, naf-eu jawrduq deuq, Aqyawf-euq aqlaf-euq lafkhoer jav-awr, Gawqjawq gawqdur-euq yawgor deuq khawf aqyawf-euq mae.

⁵ Aqyawf nae bae-euq mirnae, iqmalavshav-aq, aqyawf-euq pyeuf-awr; Guicorni ghae-eu mirtsaq khawf, aqyawf nae taev-euq mae.

⁶ Lar-awq, aqdui awbyav-awr uqduqtanq kar-eur; Aqdui-anr bae-euq ghaq pyeuf-eu Ya’we Miqyaer-euq maeqshi, Pawqtsuif pawqdmqdmq kar-eur.

⁷ Aqjeq mirnae aernar-aq, aqyawf-aq, aqdui-euq Miqyaer mae. Aqdui-aq, aqyawf-euq daega-anr jawrluf-eu tsawrhaq pyeuf-awr, Aqyawf-euq aqlaf-euq yawrmaf ma. Iqnan, nawmaf, aqyawf-euq tersar-anr yagaq-euq ngeur nar-aq.

⁸ “Maqlirbaq hawr-eu, Marsaq-euq bawrtsanq bawrdanr-anr can ngae lof-aer, Nawmaf-euq nuima taqghanr.

⁹ Khoerngae, aqyawfmaf, ngaq nae gar mr-euq gar ya’mawr-euq khawf, Nawmaf-euq aqpoeq aqbawr deuq, Ngaq-anr mrhaw-awr tsermr haw-euq mae.

¹⁰ Ngar, 40 khof byan’ni, khoerzir-euq tsawrhaq-anr nuima cawv-euq ma. ‘Aqyawfmaf, ngaq-euq garma-anr maq siqnya-aer, Aqyawf maf-euq nuima-euq lafkhoer garbanq banq-ir-euq tsawrhaq nga’ laer ngar aer-euq ma.

¹¹ Khoermirnae, ngar nuima paer-awr heulof-aer kamq-euq ma. ‘Aqyawfmaf, ngaq-euq ghaqnaq naqduq-anr maqya urler-ar.’ ”