Jaceuq 94 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Lafpov Povkhof-eu Miqyaer

¹ Ya’we Miqyaer-or! Lafpov povkhof-eu jeq-aq nawq-euq mae. Miqyaer-or! Lafpov povkhof-eu jeq-aq nawq-euq mae, Byadov lef-awq!

² Mirtsaq-anr yarkhaq dar-eu ghaq-or! Turlar-awr; Nuima huiq-eu tsawrhaq-anr geuxni khaeqkhof naeq-awq.

³ Ya’we Miqyaer-or! Tsawrcawv deuq aqmyan keuvni, Tsawrcawv deuq aqmyan keuvni ghaqler-eu laer la?

⁴ Aqyawfmaf dawq ngaeq ngae, janrghae-eu jeq ngaeqdov lef-awr; Yawlaeq yawca kharmr-eu deuq, yawhar yawqha khanqsaer jaev-eu mae.

⁵ Ya’we Miqyaer-or! Aqyawfmaf, nawq-euq tsawrhaq-anr diqpav diqshav-awr, Nawq-euq jeqbir-anr khaeq-awr khav-eu mae.

⁶ Aqyawfmaf, miqcoeq miqma hawr-eu, Boermiq siqkhaq deuq-anr saef-awr, Aqda maqbaw-eu murcoeq aqnmr deuq-anr diqsaef-eu mae.

⁷ Aerkhawf, aqyawfmaf aer-eu, “Ya’we Miqyaer maq mawrnya-ar. Yaqkov-euq Miqyaer maqpar ghovshaw nya-ar.”

⁸ Tsawrhaqzaq-euq ghanrcae nuinoeq maqbaw-eu deuq-or! Ghovshaw lar-awq. Aqdzawq argan deuq-or! Nawmaf aqmyan ganrlar-eu laer ghae-eu le?

⁹ Aqdui-anr naqbawr baetsof naeqlaf-euq ghaq maq gaqnya-eu la lor? Aqdui-anr myavnuiv baetsof naeqlaf-euq ghaq maq mawrnya-eu la laq?

¹⁰ Tsawrjeuq tsawrca-anr maeqdawq tsovdawq bif-eu ghaq, Tsawrhaqzaq-anr siqnya-eu tsawrganr maeqnaeq tsovnaeq-eu ghaq; Aqyawf maqdaeq-aer ghae taef-a laq?

¹¹ Tsawrhaqzaq-euq nuinoeq nuidur-aq, Yawqngaef mae laer Ya’we Miqyaer siqnya-eu mae.

¹² Ya’we Miqyaer-or! Nawq-euq zanrdawq-anr ghoe-awr maeq-awr tsov-euq; Nawq nae maeqnaeq tsovnaeq-euq tsawrhaq-aq, guiqlanq huiq-eu mae.

¹³ Tsawrcawv deuq-euq gharduq duqkhanq maqkhanq-euq khoerkeuvni; Nawr, aqyawf-anr shaq-awr zanq-eu arnan aryamq maqbi keuvleni, ghaqnaq biza taef-a.

¹⁴ Aqjeq mirnae aernar-aq, Ya’we Miqyaer, aqyawf-euq tsawrhaq-anr maq taedzae-a. Aqyawf, aqyawf-euq jeqbir-anr khawf maq byaerdzae-a.

¹⁵ Yarkhaq dar-eu jeq, tsaq-awr dawr-eu jeq-anr ghofkhof-ir-awr; Nuima-euq lafkhoer dawrcoeni ghae-eu tsawrhaq dawqtawvluf cantae taef-a.

¹⁶ Ngaq-euq gharduq, aqsur ghaq turlar-awr, tsawrdoer deuq-anr lavtsoeq nmr-mq? Ngaq-euq gharduq, aqsur ghaq yawflar-awr, yawlaeq yawca mr-eu deuq-anr lavtsoeq nmr-mq?

¹⁷ Ya’we Miqyaer, ngaq-anr maq cawba naeqlaf-euq lawnmr-aq; Ngaq-euq nuima saflar ciqcurni ghae-ir law mir-a.

¹⁸ Ngar, “Ngaq-euq aqkuir nawqjur-ir luf mir-a” laer aer lawnmr-aq, Ya’we Miqyaer-or! Nawq-euq ghawqshaq gaq-eu jeq, Ngaq-anr ciqtur naeqlaf taef-a.

¹⁹ Ngaq-euq lafkhoer, ngar khanqlanr-eu jeq zawr myaq ngae; Nawr, ngaq-euq nuima saflar lavsar naeqlaf-awr laqkhaq bicaer naeqlaf-eu mae.

²⁰ Zanrtaq khoftaq-anr ghoe-awr yawdoer jeq tov-eu, yawlaeq yawca jeq mr-eu nuirmanq, nawq naeq-aer gmlar nya-eu la laq?

²¹ Aqyawfmaf tiqkawv lof-aer gmler-awr, Tsaq-awr dawr-eu tsawrhaq-euq daefzir-anr muir-awr, Tiqjeq-iq maqbanq-eu tsawrhaq-anr shiqner dovni dar-eu mae.

²² Aerkhawf, Ya’we Miqyaer, ngaq-anr hawpir naeqlaf-eu mae. Ngaq-euq Miqyaer, ngar caevzafduq, logur pyeufnaeq laf-eu mae.

²³ Aqyawf, aqyawfmaf nae mr-euq yawlaeq yawca, Aqyawf maf-euq khoertav bi keuvle-awr, Aqyawf maf-euq yawdoer jeq-euq baqda’nae, aqyawf maf-anr deuvtsaevdzae taef-a. Aqdui-euq Miqyaer pyeuf-eu Ya’we Miqyaer, aqyawf maf-anr deuvtsaevdzae taef-a.