Jaceuq 92 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Uqcif Uqshawq Dawqdzawr Mr-eu

Landaw Jawrnan-euq dawqcar cardawq

¹ Ya’we Miqyaer-or! Nawq-euq guiqlanq-anr jaceuq-eu arnavni muiq-eu nga. Gor duidui-eu ghaq-or! Nawq-euq tsawrmyanr-anr car-awr jaceuq-eu arnavni jaq-eu nga.

² Uqshawq paw, nawq-euq ghoer-awr gaq-eu garkawv dawqdzawr mr-awr; Uqcif yawqmir navluf, nawr sarjax zif-eu garkawv dawqdzawr mr-eu yawmuiq mae.

³ Tser cav tsof-eu keuka zmq-awr deur-mq diq-awr, Bawqlaw baw-awr narhaq muiq-eu tersar nae jaceuq-eu yawmuiq mae.

⁴ Aqjeq mirnae aernar-aq, Ya’we Miqyaer-or, Nawr, nawq nae mr-euq gardeuq nae, Ngaq-anr laqkhaq bicaer naeqlaf-euq mae. Nawq-euq aqlaf nae mr-euq gardeuq-euq baqda’nae, ngar ghaqler ma.

⁵ Ya’we Miqyaer-or! Nawq nae mr-euq gardeuq arnavni huiq-eu nga! Nawq-euq nuinoeq-aq naf duidui nga.

⁶ Nuinoeq maqbaw-eu tsawrhaq-aq, maq siqnya-aer; Aqdzawq argan-aq, maq ghovshaw nya-a.

⁷ Tsawrcawv deuq, yarmof daefdov lar-eu lof-aer daeflar-awr; Yawlaeq yawca dawqtawvluf mr-eu deuq, bawle zale-eu khawf, Aqyawfmaf, li-eu maqbawni yabi lavcawv-eu mae.

⁸ Aerkhawf, Ya’we Miqyaer-or, Nawr-aq, mqmaq maqbyav yarzir, yawgor-anr jawr-eu mae.

⁹ Hawde-eq, Ya’we Miqyaer-or, Nawq-anr muir-eu deuq-anr hawde-eq! Nawq-anr muir-eu deuq yacawv-ir taef-a. Yawlaeq yawca jeq mr-eu deuq, dawqtawvluf yabi taebyavjir taef-a.

¹⁰ Aerkhawf, nawr, naefnyoq-euq uqcoer lof-aer, Ngaq-euq uqcoer-anr ciqgor naeqlaf-awr; Ngaq-anr tsir yawshuif nae tsaqtsov naeqlaf-euq mae.

¹¹ Ngaq-anr muir-eu deuq-anr ngar bi keuvle mawf-eu lof-aer, Ngaq-euq myavnuiv ya’mawr-awr; Tsawrdoer deuq-anr ngar bi keuvle mawf-eu lof-aer, Ngaq-euq naqbawr yagaq-euq ma. Aqyawf maf-aq, tur-awr ngaq-anr caelar-eu deuq mae.

¹² Tsaq-awr dawr-eu tsawrhaq deuq, daor arbawr lof-aer maerlar-awr, Leqbaqnoq-anr daef-eu siqdaq miqshuq arbawr lof-aer gorler taef-a.

¹³ Ya’we Miqyaer-euq nymr-euq lafkhoer kataq-euq deuq-aq, Aqdui-euq Miqyaer-euq povka maerlar taef-a.

¹⁴ Aqyawfmaf, tsawrmawq mawqle ngae keuvni arsiq siqle-awr; Aqyawfmaf, nyoerjawfni jav-awr bawle zale taef-a.

¹⁵ Khoer-aq, Ya’we Miqyaer dawrcoeni ghae-eu mae laer dawqdzawr bimr-eu gharduq mae. Aqyawf-aq, ngaq-euq logur mae. Aqyawf-euq lafkhoer, maqtsaq maqdawr-eu jeq maqanr-a.