Jaceuq 91 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Aqdanr-euq Uqmov Caevzaf-eu

¹ Gor duidui-eu ghaq nae zaftaq-euq jawrduq-anr jawr-eu tsawrhaq-aq, Baoq zawr huiq-eu Miqyaer-euq narshmr-euq uqmov yajawr taef-a.

² Ngar, Ya’we Miqyaer-euq garkawv heulof-aer aer ma, “Aqyawf-aq, ngaq-euq caevzafduq, ngaq-euq lanrlof hawr-eu, Ngaq-euq Miqyaer mae. Ngar, aqyawf-anr ghoe ma.”

³ Aqyawf, nawq-anr arjir-anr khmr-eu lof-aer khmrtaq-euq lanrju-anr nae, Hawr-eu nyawqlar-eu nargawr gawrma-anr nae bibuq-ir naeqlaf taef-a.

⁴ Aqyawf-euq aqdanr nae nawq-anr danrkhawv khawvkaq-awr; Nawr, aqyawf-euq aqdanr-euq uqmov caevzaflar taef-a. Aqyawf-euq yawtsaq yawdawr-aq, Nawq-euq daeqdaqduq hawr-eu tanqdaqduq pyeuf taef-a.

⁵ Nawr uqcif paw guvlar paq-aer ghae-eu jeq-anr maqya guv-aer; Nan’ghanr paw khawf, beuvdov lef-euq kavmyaq-anr maqya guv-ar.

⁶ Yawzanr-euq lafkhoer nyawqlar-eu nargawr gawrma-anr hawr-eu, Nan’ghanr nan’gav-anr keuvle-eu lavcawv-eu jeq-anr maqya guv-ar.

⁷ Nawq-euq dawqpae 1,000 ghaq coq-ir-eu baw-mr; Nawq-euq armar paw 10,000 ghaq coq-ir nya taef-a. Aerkhawf, nawq-euq dawqpae maq larkeuv-ar.

⁸ Nawq-euq myavnuiv nae nawr haw ngae, Nawr, tsawrcawv deuq, yawqha nae mr-euq mrpoeq lafsawq za-eu gar aqdir ya hawmawr taef-a.

⁹ Nawr, Ya’we Miqyaer-anr nawq-euq caevzafduq bipyeuf-awr, Gor duidui-eu ghaq-anr, nawq-euq jawrduq khawf bipyeuf-euq mirnae;

¹⁰ Nawq-anr yawdoer jeq maq keuvle-aer; Nyawqlar-eu nargawr gawrma, nawq-euq jawrduq-euq dawqpae maq larkeuv-ar.

¹¹ Aqjeq mirnae aernar-aq, aqyawf, nawq-euq gharduq, Aqyawf-euq mqtav ghaqkhaer-anr dawq bif-awr, Nawq-euq garma dawqtawv luf-anr bi hawpir taef-a.

¹² Nawq-euq aqkuir, khaqlo-anr maqya gazawni; Mqtav ghaqkhaer deuq, aqyawf maf-euq aqlaf nae nawq-anr ciq taef-a.

¹³ Nawr, arlaqjaqshir hawr-eu arlawr uirnav-anr tsawqnawq nawq taef-a. Nawr, arlaqjaqshir zaqguq hawr-eu arlawr-anr nawqpyaevnaeq taef-a.

¹⁴ “Aqyawf, ngaq-anr gaq-eu mirnae, ngar, aqyawf-anr bibuq-ir ma. Aqyawf, ngaq-euq tsawrmyanr siqnya-eu mirnae, Ngar, aqyawf-anr yawgor-anr bijawr ma.

¹⁵ Aqyawf, ngaq-anr kur ngae, Ngar, aqyawf-anr ngaeqkhofnaeq ma. Aqyawf-anr gardzaq garkawv keuvle ngae, Ngar, aqyawf naeq-aer jawr ma. Ngar, aqyawf-anr bibuq-ir-awr taqhuiq taqmanrnaeq ma.

¹⁶ Ngar, aqyawf-anr zirbaw zirza-eu guiqlanq nuikhanr tiqshir bif-awr, Ngaq-euq kakhof-eu jeq bimawr ma.”