Jaceuq 90 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

JACEUQ-EU SANQBOF OEQ PAV TIQPAV: Jaceuq-eu 90-106 Miqyaer Hawr-eu Tsawrhaqzaq

Miqyaer-euq tsawrhaq pyeuf-eu Morseq-euq guiqlanq shardawq

¹ Sanqpaq Miqyaer-or! Yawqzir navluf, Nawr-aq, nga’maf-euq jawrduq jawrzar pyeuf-eu ma.

² Gawqjawq deuq maq javlar-euq minav-aer, Nawr, mirtsaq hawr-eu mqmir dawqtawv luf-anr maqbae-euq minav-aer; Nawr-aq, mqmaq maqbyav yarzir-anr nae mqmaq maqbyav yarzir-anr keuvni, Miqyaer pyeuf-eu mae.

³ Nawr, tsawrhaqzaq-anr mirtsaq parbi pyeufkhof-ir-eu mae. Khoerngae, aqyawf aer-eu, “Tsawrhaq-euq zaq-or! Ghofkhof-ir-awq.”

⁴ Aqjeq mirnae aernar-aq, 1,000 khof-aq, nawq-euq hawkhaeq-anr nae, dzeuryaf ngae, mirnan lof-aer taef-aer dur-awr; Uqcif paw-euq tiqkhaeq larkhaeq lof-aer taef-aer dur-eu mae.

⁵ Nawr, irjeuq jeuq-eu lof-aer aqyawf maf-anr yurbyov ghae-awr; Aqyawfmaf yufkhav-euq lof-aer dur-eu mae. Aqyawfmaf, uqshawq paw yarmof huiqlar-eu lof-aer dur-eu mae.

⁶ Uqshawq paw huiqlar-awr maerlar-eu mae. Uqcif uqtaw paw-aq, bi deuvdzae-awr nyoeq-ir kov-ir-eu mae.

⁷ Nga’maf, nawq-euq nuima paer-eu jeq nae bi puivdzaq-awr; Nawq-euq nuipaer-euq baqda’nae, nga’maf zawr guv-ir-euq mir-a.

⁸ Nawr, nga’maf-euq yawlaeq yawca, nawq-euq maeqshi bijav-awr; Nga’maf nae mrkhoeq-euq iqbax, nawq-euq myavpyawq-euq yawshaef bya-eu gar bijav-euq mae.

⁹ Nga’maf-euq arnan aryamq dawqtawvluf, Nawq-euq nuipaer-euq lafkhoer jirle luf-awr; Nga’maf-euq arkhof arla-aq, saf ghawrka-eu lof-aer jirle luf-eu mae.

¹⁰ Nga’maf-euq daefzir-euq arnan aryamq-aq, 70 khof yadaef-awr; Ghaq anr-eu gar tsaqler-euq ngeur nar-aq, 80 khof daefbyan nya-eu mae. Aerkhawf, nuima cawv-awr ghaqkhav zmq-eu garkawv maqngeur nar-aq, khanqsaer jaevkhar maqza-a. Aqjeq mirnae aernar-aq, ghawqmyanr maqghae-aer, Yaghawq-ir-awr ya zawbyov ghae-eu mae.

¹¹ Nawq-euq nuipaer-euq baoq-anr aqsur ghaq siqnya-eu? Aqjeq mirnae aernar-aq, nawq-anr guv paq-aer ghae-eu lof-aer; Nawq-euq nuima paer-eu jeq-aq, guvlar paq-aer ghae-eu mae.

¹² Khoermirnae, nga’maf-euq nuima zaqsiq tsawrganr anrlarni; Nga’maf, yawqha-euq arnan aryamq sawxnya’ni maeqnaeq laf-awq.

¹³ Ya’we Miqyaer-or! Ciqpyawr lef-awq, Aqmyan keuvni heulof-aer bijav-eu laer ghae-eu le? Nawq-euq kuirlaf zaqkhav-anr ghawqshaq gaqnaeq laf-awq.

¹⁴ Nga’maf-euq arnan aryamq dawqtawvluf, Nuikhanr shir-awr laqkhaq caercaer-aer daefnya’ni; Uqshawq paw, nga’maf-anr nawq-euq ghawqshaq gaq-eu jeq, Tiqbyanni bifnaeq laf-awq.

¹⁵ Nga’maf yawcawv jeq-anr ya’mawr-euq arkhof arla-anr tsaqni, Nawq nae nga’maf-anr shaqzanq bidaq naeqlaf-euq arnan aryamq-anr geuxni; Nga’maf-anr laqkhaq caer-eu jeq bi keuvle naeqlaf-awq.

¹⁶ Nawq-euq kuirlaf zaqkhav-anr nawq-euq gar bi mawrle naeqlaf-awr; Aqyawf maf-euq zaqdeuq-anr nawq-euq yawshaef khanqsaer bimawr-awq.

¹⁷ Nga’maf-euq Miqyaer pyeuf-eu Sanqpaq Miqyaer-euq ghoer mr-eu jeq, Nga’maf-euq khoertav bi javle naeqlaf-awr; Nga’maf-euq aqlaf nae mr-euq gar lavzif naeqlaf-awq. Euq, nga’maf-euq aqlaf nae mr-euq gar lavzif naeqlaf-awq.