Jaceuq 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawrcoeni Yarkhaq Dar-eu Miqyaer

Car-eu paw sheuqghae-eu aqyuif ghaq-anr bofnaeq-euq, Murlafbe kawqsheu, Daqbir-euq cardawq

¹ Ya’we Miqyaer-or! Ngaq-euq nuima dawqtawvluf, nawq-anr jaceuq ma. Ngar, nawq nae zanqler paq-aer muiq-eu jeq, mrdov taq-euq garkawv dawqtawvluf dzawrgaq ma.

² Ngar, nawq-euq lafkhoer nuikhanr shir-awr laqkhaqcaer ma; Huiqdui gor duidui-eu ghaq-or! Ngar, nawq-euq tsawrmyanr-anr car-awr jaceuq ma.

³ Ngaq-anr muir-eu deuq, narkhan paw zeuvpyawrkhof ngae, Aqyawfmaf, nawq-euq maeqshi coqdzae ghae-awr yacawv-ir taef-a.

⁴ Aqjeq mirnae aernar-aq, nawr nuirmanq-euq khoertav nuir-awr nae, tsaq-awr dawr-eu lafkhoer yarkhaq darluf-awr, Ngaq-anr of-eu jeq hawr-eu ngaq-anr tsaq-eu jeq, nawr janrtsaq naeqlaf-euq mae.

⁵ Nawr, mirkhanq tsawrjeuq deuq-anr lmqnaeq-awr, tsawrcawv deuq-anr lavcawv-eu mae; Nawr, aqyawf maf-euq tsawrmyanr mqmaq maqbyav yarzir byovtsaev jirni janrnaeq-euq mae.

⁶ Muir-eu deuq-anr mqmaq maqbyav yarzir, cawvjirni janrnaeq-awr, meuqdeuq-anr lavcawv-awr, Aqyawf maf-anr noeqmawr-eu jeq khawf lavcawv jir-euq mae.

⁷ Aerkhawfni, Ya’we Miqyaer-aq, mqmaq maqbyav yarzir zif-awr, Aqyawf yarkhaq dar-eu gharduq, aqyawf-euq nuirmanq laeqhmq taq-euq mae.

⁸ Aqyawf, mirtsaqzaq-anr tsaq-awr dawr-eu lafkhoer yarkhaq dar-awr, Tsawrhaqzaq-anr yarkhaqdar ngae, aqyawf dawrcoeni dar-eu mae.

⁹ Ya’we Miqyaer-aq, bikhaeq bikhav-euq deuq-euq gharduq, caevzafduq khawf pyeuf-awr, Shaq-awr zanq-eu jeq keuvle-eu yamq-anr, caevzafler nya-eu mae.

¹⁰ Nawq-euq tsawrmyanr-anr siqnya-eu tsawrhaq deuq, nawq-anr ghoe taef-a. Aqjeq mirnae aernar-aq, Ya’we Miqyaer-or! Nawq-anr pov-eu tsawrhaq-anr, nawr maq byaerdzae naeq-a.

¹¹ Ziroq-anr jawr-eu tsawrhaq, Ya’we Miqyaer-anr car-awr jaceuq-awq! Aqyawf nae mr-euq jeq, tsawrhaqzaq-anr dzawrnaeq-awq.

¹² Miqyaer, aqyawf maf-anr noeqmawr-awr, shiq lavdov-euq arpoeq janrkhof naeq-eu mae. Aqyawf, yawshaqzaq nae ngoer-euq tersar-anr tiqjawr-iq maqngaer-a.

¹³ Ya’we Miqyaer-or! Ngaq-anr ghawqshaq gaqnaeq laf-awq. Ngaq-anr byae-eu deuq nae lavdov naeqlaf-euq gardzaq garkawv jav-eu gar sharnoeq sharsawx naeqlaf-awr, Shir-eu mirkhanq-euq lanrkhaeq-anr nae, ngaq-anr ciqkhof naeqlaf-awq.

¹⁴ Ngar, nawq-anr jaceuq paq-aer ghae-eu kharngeur-eu jeq, Ziroq-euq zaqmiq-euq lanrkhaeq-anr dawqdzawr mr ma. Ngar, nawq-euq kakhof-eu jeq-euq lafkhoer laqkhaqcaer ma.

¹⁵ Mirkhanq tsawrjeuq deuq-aq, yawqha nae duq-euq duqkhanq-anr yawqha ga’anr byov-awr, Yawqha nae khmrzaf taq-euq lanrju-anr yawqha-euq aqkuir pafler-euq mae.

¹⁶ Ya’we Miqyaer aqjox-aer ghae-eu la laer-aq, aqyawf yarkhaq dardov laf-eu gar nae siqlar-eu mae. Tsawrcawv-aq, yawqha-euq aqlaf nae mr-euq jeq-euq lanrju-anr pafler-eu lof-aer pafler-eu mae. Dzardziv dziv-awq. Sela.

¹⁷ Miqyaer-anr ngaer-euq tsawrjeuq dawqtawvluf hawr-eu tsawrcawv deuq khawf shiqbuir lanma-anr ya’ir taef-a.

¹⁸ Miqyaer, shaqzaq zanqzaq-anr maq ngaerbyov naeq-aer, Irshaqzaq nae noeqtmq-euq jeq, mqmaq maqbyav yarzir byovtsaev-eu gar maqbi keuv-a.

¹⁹ Ya’we Miqyaer-or! Turlar-awq. Tsawrhaqzaq nae maqbi ghaqler-aer, Tsawrjeuq tsawrca-anr, nawq-euq maeqshi yarkhaq dar-awq.

²⁰ Ya’we Miqyaer-or! Aqyawf maf-anr lavguv naeq-awq. Tsawrjeuq tsawrca, yawqhar yawqha tsawrhaqzaq pyeuf-eu taef nya laer bi siqler-awq. Sela.