Jaceuq 89 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqmyan Keuvni Bishaq-eu Laer Le?

Erzaqlaq tsawrhaq Erdaqnaq-euq Maqsaqkir

¹ Ngar, li-eu maqbawni, Ya’we Miqyaer-euq ghawqshaq gaq-eu garkawv car ma. Ngar, ngaq-euq khaqmae nae, nawq-euq sarjax zif-eu garkawv, Yawqzir navluf-anr bisiqni dzawrgaq ma.

² Ngar heulof-aer aer-euq ma, “Ghawqshaq gaq-eu jeq li-eu maqbawni tsovzif-awr; Nawq-euq sarjax zif-eu jeq, Nawq nae mq-euq khoertav lavzif taq-euq mae.”

³ “Ngar, ngaq nae tserdov-euq ghaq naeq-aer, Dawqma sarjax dzaqtaq-euq ma. Ngar, ngaq-euq kuirlaf zaqkhav Daqbir-anr kamqnaeq-euq ma.

⁴ ‘Ngar, nawq-euq aryoeq, li-eu maqbawni lavzif-awr; Nawq-euq nuirmanq, yawqzir navluf-euq gharduq janrtaq ma.’ ” Sela.

⁵ Ya’we Miqyaer-or, Mqdeuq, nawq-euq zanqler paq-aer ghae-eu garkawv jaceuq-awr; Tsawrshawr deuq uiqler taq-awr jawr ngae, Nawq-euq sarjax zif-eu garkawv khawf jaceuq taef-a.

⁶ Mq-euq khoertav, Ya’we Miqyaer-anr ciqcaev nya-eu aqsur ghaq jawr-eu la? Ghaq anr-eu deuq-euq zaqdeuq, Ya’we Miqyaer-anr dur-eu aqsur ghaq jawr-eu la?

⁷ Tsawrshawr deuq uiqler taq-awr jawr-eu lafkhoer, Miqyaer-anr yawkhav-aer yaguv-eu mae. Aqyawf-euq tiqjawq jawr-eu deuq dawqtawvluf yawzeu yabaw-eu mae.

⁸ Guirmaf-euq Miqyaer pyeuf-eu Ya’we Miqyaer-or, Nawr lof-aer ghaq khav-eu aqsur ghaq jawr-eu la? Ya’we Miqyaer-or! Nawq-euq sarjax zif-eu jeq, Nawq-euq tiqjawq javluf-eu mae.

⁹ Nawr, tsawqpuq tsawqpar lar-eu iqmalavshav-anr uvlanr-awr, Irluv dzae-eu tanqdavlaf ngae, nawr ciqcurni bighae-ir nya-eu mae.

¹⁰ Nawr, bisaef-euq tiq ghaq-anr lof-aer, Laqhar-anr diqpav diqshavjir naeq-euq mae. Nawr, nawq-anr muir-eu deuq-anr, Nawq-euq ghaq khav-eu lafdu nae taebyavjir naeq-euq mae.

¹¹ Mq-aq, nawq-euq mae. Mirtsaq khawf, nawq-euq mae. Mirtsaq tanqkhawr hawr-eu mirtsaq-euq khoertav kharjawr kharjav-eu dawqtawvluf, nawq nae baetaq-euq mae.

¹² Mirtsaq lafov pyawq hawr-eu laftav pyawq bawni, Nawq nae baetaq-euq mae. Taqbor hawr-eu Heqlaqmoq gawqjawq, Nawq-euq tsawrmyanr-euq lafkhoer laqkhaq caer-eu mae.

¹³ Nawq-euq lafdu-aq, ghaq zawr khav-awr; Nawq-euq aqlaf ghaq khav-awr, nawq-euq armar laf-aq, yawgor mae.

¹⁴ Tsaq-awr dawr-eu jeq hawr-eu dawr-awr tsaq-eu jeq-aq, Nawq-euq nuirmanq-euq dawqpaeq duqpur mae. Ghawqshaq gaq-eu jeq hawr-eu yawtsaq yawdawr-aq, Nawq-euq maeqshi canluf-eu mae.

¹⁵ Laqkhaq caerlar-eu tersar siqnya-eu tsawrhaq-aq, Guiqlanq huiq-eu mae. Ya’we Miqyaer-or! Aqyawfmaf, Nawq-euq myavpyawq-euq yawshaef-euq lafkhoer canluf-eu mae.

¹⁶ Aqyawfmaf, nawq-euq tsawrmyanr-euq lafkhoer nan’ga-i laqkhaq caer-awr; Nawq-euq tsaq-awr dawr-eu jeq, aqyawf maf-anr ciqgor naeq-euq mae.

¹⁷ Aqjeq mirnae aernar-aq, nawr-aq, aqyawf maf-euq ghaq-euq yawshaef khanqsaer pyeuf-awr; Nawr, ghoer mr-eu lafkhoer, Nga’maf-euq uqcoer ciqgor naeqlaf-euq mae.

¹⁸ Aqjeq mirnae aernar-aq, Ya’we Miqyaer-aq, aqdui-euq daeqdaqduq pyeuf-awr, Irsaqleqlav-euq Yawshawr ghaq-aq, aqdui-euq sanqpaq mae.

¹⁹ Arhuba, mawrle-euq lafkhoer, Nawr, nawq-euq Yawshawr ghaq-anr heulof-aer aernaeq-euq mae. “Ngar, ghaq zawr khav-eu tiq ghaq-anr cawba naeq-euq ma. Ngar, tsawrhaq-euq ghanrcae nae tserdov-euq ghaq-anr ciqgor naeq-euq ma.

²⁰ Ngar, ngaq-euq kuirlaf zaqkhav Daqbir-anr povmawr-euq ma. Ngar, ngaq-euq shawr-eu tsir nae, aqyawf-anr tsaqtsov-euq ma.

²¹ Ngaq-euq aqlaf, aqyawf naeq-aer zifdanni bijav-awr; Ngaq-euq lafdu nae aqyawf-anr ghaq bif ma.

²² Muir-eu deuq, aqyawf-anr maq ganrghaq nya-aer, Tsawrcawv-euq zaqdeuq khawf, aqyawf-anr maqkhaeq nya-ar.

²³ Ngar, aqyawf-anr muir-eu deuq-anr, Aqyawf-euq maeqshi diqcoqghae naeq-awr; Aqyawf-anr byae-eu deuq-anr nargawr gawrma bi keuvle ma.

²⁴ “Aerkhawf, ngaq-euq sarjax zif-eu jeq hawr-eu, Ghawqshaq gaq-eu jeq, aqyawf naeq-aer bijav-awr; Ngaq-euq tsawrmyanr-euq lafkhoer, Aqyawf-euq uqcoer yabi ciqgor taef-a.

²⁵ Ngar, aqyawf-euq aqlaf, iqmalavshav-euq khoertav bijav-awr; Aqyawf-euq armar laf, lawrbaq deuq-euq khoertav bijav ma.

²⁶ Aqyawf, ngaq-anr heulof-aer gur taef-a. ‘Nawr-aq, ngaq-euq aqda hawr-eu ngaq-euq Miqyaer ma. Ngaq-anr bibuq-ir naeqlaf-eu logur mae.’

²⁷ Ngar, aqyawf-anr ngaq-euq huqbaw aqyuif ghaq khawf bigeuf-awr; Mirtsaq-euq sanqpaq deuq-euq khoertav, gor duidui-eu ghaq bigeuf ma.

²⁸ Ngar, aqyawf-euq gharduq, Ngaq-euq ghawqshaq gaq-eu jeq li-eu maqbawni bizif-awr; Ngaq-euq dawqma sarjax, aqyawf-euq gharduq zifdanni bijav ma.

²⁹ Ngar, aqyawf-euq aryoeq-anr khawf, li-eu maqbawni bizif-awr; Aqyawf-euq nuirmanq, mq kharjav-eu nan-anr keuvni bijav ma.

³⁰ “Aqyawf-euq zaqdeuq uvdeuq, ngaq-euq zanrdawq-anr byaer nar-aq; Ngaq-euq dawqtsaev aertaq-euq lof-aer maq daefcaw nar-aq,

³¹ Aqyawfmaf, ngaq-euq zanrtaq khoftaq-anr mrbanq-awr; Ngaq-euq zanrdawq khofdawq-anr maq cantae nar-aq;

³² Ngar, aqyawf maf-euq yawbanq yawlaeq-euq baqda’nae darcuir yur-awr oe-awr; Aqyawf maf-euq yawlaeq yawca-euq baqda’nae diqnaeq ma.

³³ Aerkhawf, ngar, Daqbir-anr ghoer-awr gaq-eu maqbi byovtsaev-ir; Aqyawf-anr sarjax maqzif-aer maqghae.

³⁴ Ngar, ngaq-euq dawqma sarjax-anr maqpuiq-aer; Ngaq-euq maeqluq-anr nae dovle-euq dawq maq lavpar.

³⁵ Ngar, ngaq-euq yawshawr-anr ghoe-awr nae kamqghaq-euq nar-aq; Ngar, Daqbir-anr jaqmyawf maqmyawf.

³⁶ Aqyawf-euq aryoeq li-eu maqbawni zif-awr, Aqyawf-euq nuirmanq-aq, ngaq-euq maeqshi nanrma lof-aer pyeuf taef-a.

³⁷ Bala lof-aer li-eu maqbawni zifdanni jav-awr, Mq-euq khoertav sarjax zif-eu sarkir lof-aer khawf pyeuf taef-a.” Sela.

³⁸ Aerkhawf, nawr, nawq nae tsaqtsov taq-euq ghaq-anr nuima yawkhav-aer paer-awr; Nawr, aqyawf-anr byaer-awr taedzae naeq-euq mae.

³⁹ Nawr, nawq-euq kuirlaf zaqkhav-anr dzaqtaq-euq dawqma sarjax byaer-awr; Nawr, aqyawf-euq shuir uqkhov, mirtsa biqka-awr lavjawf naeq-euq mae.

⁴⁰ Nawr, aqyawf-euq kmrcaer dawqtawv luf-anr daepyavjir naeq-awr; Nawr, aqyawf-euq lofpirduq lavcawv naeq-euq mae.

⁴¹ Garma-anr khar cantsaev-eu deuq, Aqyawf-euq myawq khoeqgeuf-awr; Aqyawf-aq, dawqpae jawr-eu deuq, ngaeqdoerduq pyeuf-eu mae.

⁴² Nawr, aqyawf-anr caelar-eu deuq-euq armar laf-anr bafdir naeq-awr; Nawr, aqyawf-anr kharmuir-eu deuq-anr laqkhaq bi caerler-euq mae.

⁴³ Nawr, aqyawf-euq micaer yawtav pyawq yurpyawr naeq-awr, Aqyawf guirdeuv deuv-eu gar maqbi yawfzif nya-aq.

⁴⁴ Nawr, aqyawf-euq yawshaef khanqsaer bibyov-ir-awr; Aqyawf-euq nuirmanq, mirtsa ngawqcoq naeq-euq mae.

⁴⁵ Nawr, aqyawf-euq zaqguq-euq arnan aryamq bi nymrle-awr; Nawr, aqyawf-anr daqga-euq jeq nae tsanrkaq naeq-euq mae. Sela.

⁴⁶ Ya’we Miqyaer-or! Nawr aqmyan keuvni jawrzaf taq-eu laer ghae-eu le? Li-eu maqbawni lor? Nawr nuima paer-eu jeq, miqdzaq dof-eu lof-aer bidof-eu laer ma laq?

⁴⁷ Ngaq-euq zir arnavni nymr-eu gar noeqkeuv naeqlaf-awq. Nawq nae baetaq-euq tsawrhaqzaq dawqtawvluf yawqngaef mae.

⁴⁸ Tiqjawr-iq maqshirni daefnya-eu tsawrhaq aqsur ghaq jawr-eu la? Aqyawf, lmqbymr-euq baoq-anr nae aqyawf-euq daefzir bibuq-ir nya mae laq? Sela.

⁴⁹ Sanqpaq Miqyaer-or! Yawbae, nawq nae yawtsaq yawdawr-euq lafkhoer Daqbir-anr kamq-euq, Ghoer-awr gaq-eu jeq aqgar irjir-euq la?

⁵⁰ Sanqpaq Miqyaer-or! Noeqmawr naeqlaf-awq. Nawq-euq kuirlaf zaqkhav, dawqdoer yadaq-awr; Ngar, tsawrhaq kharngeur-eu deuq ngaeqdoer-eu dawq, Ngaq-euq khanq-euq lafkhoer aqjox-aer daqcoer nmr-mq.

⁵¹ Ya’we Miqyaer-or! Nawq-anr muir-eu deuq, ngaeqdoer naeqlaf-awr; Nawq nae tsaqtsov-euq ghaq kuirtof ciq-euq gar, Aqyawfmaf ngaeqdoer-eu mae.

⁵² Mqmaq maqbyav yarzir, Ya’we Miqyaer-anr jaceuq-awq. Aqmeq. Aqmeq.