Jaceuq 88 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-or, Aqjeq Mirnae?

Car-eu paw sheuqghae-eu aqyuif ghaq-anr bofnaeq-euq, Maqhaqlar Leqaqnawr kawqsheu, Eqzaqhar tsawrhaq Heqma-euq Maqsaqkir , Korlav-euq zaqyo deuq-euq dawqcar cardawq

¹ Ngaq-anr kakhof-eu Miqyaer pyeuf-eu Ya’we Miqyaer-or! Ngar, nawq-euq maeqshi, uqcif nan’ghanr gurluf-eu ma.

² Nawq-euq naqbawr, ngar gur-eu gar ciqkhmr naeqlaf-awr; Ngaq-euq guiqlanq shardawq, Nawq-euq maeqshi bi larkeuv naeqlaf-awq.

³ Aqjeq mirnae aernar-aq, ngaq-anr gardzaq garkawv tiqbyanni keuvle taq-awr; Ngaq-euq daefzir lmqbymr-euq dawqpae keuv-ir shaw-iq mir-a.

⁴ Aqcawq, ngaq-anr duqkhanq-anr irluf-eu deuq naeq-aer sawxkeuq naeqlaf-awr, Ngar, ghaq maqanr-eu tsawrhaq-anr dur-eu mir-a.

⁵ Bisaef-awr lmqbymr-euq lafkhoer galuf-eu lof-aer, Shirdzeur-euq tsawrhaq-euq ghanrcae bi byaerdzae taq-euq lof-aer dur-awr; Nawr tiqjawr-iq maqpar noeqkeuv-eu, Nawq-euq aqlaf-anr nae deuvtsaev dzae-euq deuq-anr khawf dur mir-a.

⁶ Nawr, ngaq-anr naf duidui-eu duqkhanq-euq lafkhoer, Zanrtsuini ghae-eu yawnaf-anr biga naeqlaf-euq mae.

⁷ Nawr nuima paer-eu jeq ngaq-euq khoertav kansuixni javluf-awr; Nawq-euq irluv dawqtawvluf nae, Ngaq-anr shaqzanq bi keuvle naeqlaf-euq mae. Sela.

⁸ Nawq nae ngar shuq-eu deuq, ngaq-anr nae garmanr kaq-eu gar bijawr-awr; Aqyawfmaf, ngaq-anr nuidav davni, nawr janrnaeq laf-euq mae. Ngar-aq, bi kaflanr taq-awr, maqpar dov-ir nya mir-a.

⁹ Shaqzanq-euq baqda’nae, ngaq-euq myavnuiv maqpar ganr mir-a. Ya’we Miqyaer-or! Yawqnan navluf, ngar, nawq-anr kurluf-awr; Ngaq-euq aqlaf, nawq-anr cawqjalaf luf-eu ma.

¹⁰ Nawr, shirdzeur-euq deuq-euq gharduq, Zanqler paq-aer ghae-eu jeq bimawr-eu laer le laq? Shirdzeur-euq deuq turlar-awr nawq-anr jaceuq taef-a lor? Sela.

¹¹ Nawq-euq ghoer-awr gaq-eu garkawv, Lmqbymr-euq lafkhoer dawqdzawr mr taef-a laq? Lavcawv-eu jawrduq-euq lafkhoer, Nawr sarjax zif-eu garkawv dawqdzawr mr taef-a lor?

¹² Zanrtsuini ghae-eu lafkhoer, Nawq-euq zanqler paq-aer ghae-eu garkawv siqler taef-a laq? Ngaercoer-eu mirkhanq-euq lafkhoer, Nawq-euq tsaq-awr dawr-eu garkawv siqler taef-a lor?

¹³ Aerkhawf, Ya’we Miqyaer-or! Ngar, nawq-anr gurgaq-eu ma. Uqshawq paw, ngaq-euq guiqlanq shardawq, nawr jawr-eu gar bilar ma.

¹⁴ Ya’we Miqyaer-or, Aqjeq mirnae, nawr, ngaq-euq nuima saflar-anr taedzae naeqlaf-eu le? Aqjeq mirnae, nawq-euq myavpyawq, ngaq-anr nae ciqzaf-eu le?

¹⁵ Ngar zaqguq ngae nae, shaq-awr zanq-eu jeq-anr, Shirtaw taeqni daq-euq ma. Ngar, nawq-euq guvlar paq-aer ghae-eu jeq-anr daq-awr, Ngar nuima cawvsaef mir-a.

¹⁶ Nawr nuima yawkhav-aer paer-eu jeq, Ngaq-euq khoertav tanqdavlef taq-awr; Nawq-euq guvlar paq-aer ghae-eu jeq, Ngaq-anr deuvtsaevdzae naeqlaf-euq mae.

¹⁷ Heudeuq, nan’ga-i ircuf lof-aer, ngaq-euq tiqjawq oeluf-awr, Yawqpaw navluf danqpymqjir taq-euq mae.

¹⁸ Nawq nae ngar gaq-eu tsawrhaq hawr-eu cawq, Ngaq-anr nae garmanr kaq-eu gar bijawr-euq mirnae, Zanrtsuini ghae-eu jeq taef-aer, ngar shuq-eu cawq pyeuflar-euq mae.