Jaceuq 86 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nawq-anr Tiqghaq-iq Maqdur-a

Daqbir-euq guiqlanq shardawq

¹ Ya’we Miqyaer-or! Nawq-euq naqbawr ciqkhmr lef-awr, Ngaq-anr narhaq naeqlaf-awq. Aqjeq mirnae aernar-aq, Ngar-aq, shaqzaq zanqzaq pyeuf-eu irshaqzaq ma.

² Ngar, yawshawr mirnae, ngaq-euq daefzir hawlanr naeqlaf-awq. Nawr-aq, ngaq-euq Miqyaer mae. Nawq-anr ghoe-eu, nawq-euq kuirlaf zaqkhav-anr, Bibuq-ir naeqlaf-awq.

³ Sanqpaq Miqyaer-or! Ngar nan’ga-i nawq-anr gurgaq luf-eu mirnae, Ngaq-anr ghawqshaq gaqnaeq laf-awq.

⁴ Sanqpaq Miqyaer-or! Ngar, ngaq-euq nuima saflar, Nawq-anr ciqnaeq-eu mirnae; Nawq-euq kuirlaf zaqkhav-euq nuima saflar-anr, Laqkhaq bicaer naeqlaf-awq.

⁵ Aqjeq mirnae aernar-aq, Sanqpaq Miqyaer-or, Nawr-aq, yawmuiq mae. Nawq-anr kur-eu tsawrhaq dawqtawv luf-anr, Ghawqshaq gaq-eu jeq byan-awr, aqmyanluf iqbax pyaeq-eu mae.

⁶ Ya’we Miqyaer-or! Ngaq-euq guiqlanq shardawq-anr, Naqbawr ciqkhmr naeqlaf-awq. Ngar tanqshar-eu tersar-anr narhaq naeqlaf-awq.

⁷ Nawr, ngaq-anr narhaq naeqlaf-eu mirnae, Ngar, gardzaq garkawv ya’mawr-eu arnan keuvle ngae, Nawq-anr kur ma.

⁸ Sanqpaq Miqyaer-or! Miqyaer nuideuq-euq lafkhoer, Nawq-anr tiqghaq-iq maqdur-a. Nawq nae gar mrtaq-euq lof-aer, tiqghaq-iq maq mrtaq-aq.

⁹ Sanqpaq Miqyaer-or! Nawq nae baetaq-euq tsawrjeuq dawqtawvluf, Nawq-euq maeqshi lar-awr uqduq tanqlar taef-a. Nawq-euq tsawrmyanr-anr ciqhuiq taef-a.

¹⁰ Aqjeq mirnae aernar-aq, Nawr-aq, huiq-awr zanqler paq-aer ghae-eu jeq mrnya-eu mae. Nawr tiq ghaq taef-aer Miqyaer pyeuf-eu mae.

¹¹ Ya’we Miqyaer-or! Ngaq-anr nawq-euq garma maeqnaeq laf-awq. Ngar, nawq-euq yawtsaq yawdawr-euq lafkhoer can ma. Ngar, nawq-euq tsawrmyanr-anr guvnya’ni, Ngaq-euq nuima yavuiq naeqlaf-awq.

¹² Ngaq-euq Miqyaer pyeuf-eu Sanqpaq Miqyaer-or! Ngaq-euq nuima dawqtawvluf nae, Ngar, nawq-anr ciqhuiq ciqmanr ma. Arsaq saq-eu maqbawni, ngar, nawq-euq tsawrmyanr-anr jaceuq ma.

¹³ Aqjeq mirnae aernar-aq, Nawr, ngaq-anr ghawqshaq gaq-eu jeq zawr huiq-eu mae. Nawr, ngaq-euq nuima saflar-anr, Naf-eu shiqbuir lanma-anr nae bibuq-ir naeqlaf-euq mae.

¹⁴ Miqyaer-or! Nuima huiq-eu tsawrhaq tsawqtur-awr, Ngaq-anr caelar luf-eu mae. Coeqler deuqler paq-aer mr-eu baqmaf, Ngaq-anr saef-eu laer povluf-eu mae. Aqyawf maf-euq maeqshi, nawq-anr maqbi jawr-a.

¹⁵ Aerkhawf, Sanqpaq Miqyaer-or, Nawr-aq, ghoer-awr gaq-eu jeq hawr-eu guiqlanq yawdzanr byan-awr, Nuinoeq ghawqmanrni noeqnya-eu uqtaf; Yawtsaq yawdawr hawr-eu, Ghawqshaq gaq-eu jeq byan-eu Miqyaer mae.

¹⁶ Ngar jawr-eu paw ciqpyawr naeqlaf-awr, Ngaq-anr ghawqshaq gaqnaeq laf-awq! Nawq-euq kuirlaf zaqkhav-anr nawq-euq ghaq bifnaeq laf-awr; Nawq-euq aqbur zaqkhav-euq zaqyo-anr bibuq-ir naeqlaf-awq.

¹⁷ Ya’we Miqyaer-or! Nawr, ngaq-anr cawba-awr, Nuima lavsar naeqlaf-euq mirnae, Ngaq-anr byae-eu deuq ya’mawr-awr daqga-ir paq-aer; Ngaq-anr bisiq bimawr-eu yawmuiq jeq bimawr naeqlaf-awq.