Jaceuq 85 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Lavmuiqkhof Naeqlaf-awq

Car-eu paw sheuqghae-eu aqyuif ghaq-anr bofnaeq-euq, Korlav-euq zaqyo deuq-euq cardawq

¹ Ya’we Miqyaer-or! Nawr, nawq-euq mirkhanq-anr ghoer mr-euq mae. Nawr, aqcawq nae bi nyaefgeuf-euq Yaqkov-anr sheuqkhof naeqlaf-euq mae.

² Nawr, nawq-euq tsawrhaq-euq yawlaeq yawca-euq iqbax-anr pyaeqnaeq-awr; Nawr, aqyawf maf-euq iqbax dawqtawv luf-anr daeqkaq naeq-euq mae. Sela.

³ Nawr nuima paer-eu dawqtawvluf bibyov-ir-awr; Nawr nuima yawkhav-aer paer duidui-eu jeq-anr narkhan ciqpyawr-euq mae.

⁴ Nga’maf-anr kakhof-eu ghaq pyeuf-eu Miqyaer-or! Nga’maf-anr lavmuiqkhof naeqlaf-awq. Nawr, nga’maf-anr nuima paer-eu jeq bibyov-ir naeqlaf-awq.

⁵ Nawr, nga’maf-anr li-eu maqbawni nuima paer-eu laer ghae-eu le lor? Nawq-euq nuipaer yawqzir navluf-anr bi cantae ghae-eu laer ghae-eu le laq?

⁶ Nawq-euq tsawrhaq, nawq-euq lafkhoer laqkhaqcaer larni; Nawr, nga’maf-anr tiq pov maqpar lavdaef naeqlaf-eu laer ma laq?

⁷ Ya’we Miqyaer-or! Nawq-euq ghawqshaq gaq-eu jeq-anr bimawr naeqlaf-awr; Nawq-euq kakhof-eu jeq bi keuvle naeqlaf-awq.

⁸ Ngar, Ya’we Miqyaer pyeuf-eu Miqyaer, dawq ngaeq-eu gar narhaq ma. Aqjeq mirnae aernar-aq, aqyawf, aqyawf-euq tsawrhaq, Hawr-eu aqyawf-euq tsawrshawr deuq-anr, Nuisar zalar-eu jeq ngaeq taef-a. Aerkhawf, aqyawfmaf nae aqdzawq argan gan-euq gar taqbi ghofkhof-ir.

⁹ Aqdui-euq mirkhanq-euq lafkhoer yawshaef khanqsaer javni; Aqyawf-anr guv-eu deuq-euq dawqpae, Aqyawf-euq kakhof-eu jeq aqdir javluf-eu mae.

¹⁰ Ghawqshaq gaq-eu jeq hawr-eu yawtsaq yawdawr jeq tanqdzoer-awr, Tsaq-awr dawr-eu jeq hawr-eu nuisar of-eu jeq maeqsaw saw-euq mae.

¹¹ Yawtsaq yawdawr jeq, mirtsaq-anr nae tanqdov laf-awr, Tsaq-awr dawr-eu jeq, mq-anr nae hawkalef taef-a.

¹² Ya’we Miqyaer, yawmuiq jeq bifnaeqlaf taef-a. Aqdui-euq mirkhanq bawle zale taef-a.

¹³ Aqyawf-euq maeqhu tsaq-awr dawr-eu jeq candov ghae-awr; Aqyawf nae ciq-euq kuirtof, aqdui-euq cankawv bi pyeuflar taef-a.