Jaceuq 84 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Jawrmuiq-eu Miqyaer-euq Nymr

Car-eu paw sheuqghae-eu aqyuif ghaq-anr bofnaeq-euq, Giqtir kawqsheu, Korlav-euq zaqyo deuq-euq cardawq

¹ Guirmaf-euq Ya’we Miqyaer-or; Nawq-euq saqpar saeqghawv arnavni hawmuiq-eu nga!

² Ya’we Miqyaer-euq nymr-euq povka jawrler mawfsaef-awr, Ngaq-euq nuima saflar ngeurdzaeq myafler paq-aer ghae nya. Ngaq-euq nuima hawr-eu shiqshaq, Daefluf-eu Miqyaer-anr kurluf-eu ma.

³ Jartseuv nymr povmawr-awr, Jawfjirjawfghaf khawf, aqyawf-euq gharduq banq povza-awr, Yawqha-euq zaq biyuf-eu banq bawlar-euq mae. Ngaq-euq Sanqpaq hawr-eu ngaq-euq Miqyaer pyeuf-eu, Guirmaf-euq Ya’we Miqyaer-or, Aqyawfmaf, nawq-euq lawrduq-euq dawqpae jawr-eu mae.

⁴ Nawq-euq nymr-euq lafkhoer jawr-eu tsawrhaq-aq, Guiqlanq huiq-eu mae. Aqyawfmaf, nawq-anr jaceuq luf-a siq. Sela.

⁵ Guiqlanq povgeuf-eu laer garma dov-ir-eu nuima anr-awr, Nawq-euq lafkhoer ghaq ghoe-eu tsawrhaq-aq, guiqlanqhuiq taef-a.

⁶ Aqyawfmaf Baqkaq ghaqlawq-anr cantsaev ngae, Cuq jav-eu jawrduq bi pyeuflar-awr, Uqyaer yawbae banq-euq baqda’nae khawf, Lan ghawqmya’ni javlar-euq mae.

⁷ Aqyawfmaf maeqhu paw ngaeq-aer leghae nar-aq, Ghaq ngaeq-aer anrdzaeq lar-awr; Aqyawf ghaq aqyawf, Ziroq-euq lafkhoer Miqyaer-euq maeqshi ya lekeuv-euq mae.

⁸ Guirmaf-euq Miqyaer pyeuf-eu Ya’we Miqyaer-or, Ngaq-euq guiqlanq shardawq-anr narhaq naeqlaf-awq. Yaqkov-euq Miqyaer-or! Naqbawr ciqkhmr naeqlaf-awq. Sela.

⁹ Miqyaer-or! Nga’maf-euq daeqdaqduq-anr hawsher-eq! Nawq nae tsaqtsov-euq ghaq-euq myavpyawq-anr hawcawq naeq-awq.

¹⁰ Nawq-euq nymr-euq povka tiq nan jawr-eu-aq, Nuigar 1,000 nan jawr-eu navmaqtser poeq nya. Tsawrcawv-euq saeqghawv-euq lafkhoer jawr-eu navmaqtser, Miqyaer-euq nymr-euq ghovkhaeq-anr yawf-awr lof-eu-aq, Ngar nuikhanr shirdzaeq ma.

¹¹ Aqjeq mirnae aernar-aq, Miqyaer pyeuf-eu Ya’we Miqyaer-aq, Nanrma hawr-eu daeqdaqduq pyeuf-eu mae. Ya’we Miqyaer, guiqlanq yawdzanr hawr-eu, Yawshaef khanqsaer bif-awr; Aqyawf dawrcoeni can-eu deuq-anr, Yawmuiq jeq maqbif-aer maqghae-a.

¹² Guirmaf-euq Ya’we Miqyaer-or! Nawq-anr ghoe-eu tsawrhaq-aq, guiqlanq huiq-eu mae.