Jaceuq 83 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Muir-eu Deuq-anr Lavtsoeq-awq

Aqsav-euq dawqcar cardawq

¹ Miqyaer-or! Maqngaeqni taqjawr naeqlaf! Maqngaeq maqtmrni taqjawr naeqlaf. Miqyaer-or! Ciqcurni taqghae naeqlaf!

² Aqjeq mirnae aernar-aq, hawsher-eq, Nawq-anr muir-eu deuq luiqgha lar-awr, Nawq-anr byae-eu deuq, Aqyawf maf-euq uqduq bafdir laf-euq mae.

³ Aqyawfmaf, nawq-euq tsawrhaq-anr, Yawganr zmq-awr muir-eu laer tovluf-awr, Nawr hawpir-eu deuq-anr, muir-eu laer gagm-awr, Maeqbawq mrluf-eu mae.

⁴ Aqyawfmaf aer-eu, “Lar-awq, aqduimaf, Aqyawf maf-anr tsawrjeuq maqbi pyeufni deuvtsaevdzae ma. Irsaqleqlav-euq tsawrmyanr taqpar bi noeqkeuv law.”

⁵ Aqyawfmaf nuima tiqgar taf-eu lafkhoer, Tiqkawv lof-aer maeqbawq mr-awr, Aqyawfmaf, nawq-anr muir-eu gharduq sarjax dzaqtaq-euq mae.

⁶ Heudeuq-euq saeqghawv; Eqdoq hawr-eu Irshaqmeqlar, Mawrbav hawr-eu Haqgaqlar,

⁷ Geqbaqlav, Aqmoq hawr-eu Aqmaqlaer, Pirlirtiv hawr-eu Durlu mirtsaq-anr jawr-eu deuq,

⁸ Aqshurliv khawf, aqyawfmaf naeq-aer gmle-awr, Lawrtaq-euq zaqdeuq uvdeuq-euq ghaq pyeuf-eu mae. Sela.

⁹ Nawq nae Mirdiqyaq-anr janrnaeq-euq lof-aer, Girshoq lawrbaq-euq dawqpae, Sirseqlar hawr-eu Yaqbiq-anr janrnaeq-euq lof-aer, Aqyawf maf-anr janrnaeq-awq.

¹⁰ Aqyawfmaf, Eqdawqlav mirtsaq-anr yacawv-ir-awr, Mirtsaq-anr biqdzae-euq javguv javmeuq pyeuflar-euq mae.

¹¹ Aqyawf maf-euq tsawrhuiq tsawrma deuq-anr, Orleqbav hawr-eu Zerbav-anr janrnaeq-euq lof-aer janrnaeq-awq. Aqyawf maf-euq dzoeqda dawqtawv luf-anr, Zeqban hawr-eu Zaqlaqmurnaq-anr janrnaeq-euq lof-aer janrnaeq-awq.

¹² Aqyawfmaf aer-eu, “Miqyaer-euq jawrduq, Aqdui-euq myawqganq pyeuflarni yurgeuf ma.”

¹³ Ngaq-euq Miqyaer-or! Aqyawf maf-anr, Laerzeuv nae bi byavdzae-euq khaqlaer lof-aer bidur-awr, Jaqlaer nae bi bawdzae-euq khaqpuiq-anr bidur-awq.

¹⁴ Arbawr yarsaq-anr miqdzaq puiv-eu lof-aer hawr-eu, Gawqjawq-anr miqdzaq dofler-awr miqlmr nyaev-eu lof-aer,

¹⁵ Nawq-euq mqjeq jaqlaer nae aqyawf maf-anr tae-awr; Nawq-euq jaqlaer laerma nae aqyawf maf-anr lavguv naeq-awq.

¹⁶ Ya’we Miqyaer-or! Aqyawfmaf, nawq-euq tsawrmyanr-anr povni; Aqyawf maf-euq myavpyawq tiqpawf-iq maqjavni, daq biga-ir-awq.

¹⁷ Aqyawfmaf li-eu maqbawni ghaq bibaq-awr, Yawbanq yawlanr-aer pyeuf-ir luf-ur. Aqyawfmaf daqga-ir-awr cawv-ir luf-ur.

¹⁸ Nawr tiq ghaq taef-aer Ya’we Miqyaer laer kur-eu ghaq-aq, Mirtsaq dawqtawv luf-euq khoertav nae, Gor duidui-eu ghaq pyeuf-eu garkawv, Aqyawf maf-anr siqnyaler luf-ur.