Jaceuq 82 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Shaqzaq-anr Hawpir Naeq-awq

Aqsav-euq cardawq

¹ Miqyaer, ghaq khav-eu deuq uiqler taq-awr jawr-eu gar yawf-awr, Aqyawf, miqyaer deuq-euq ghanrcae yarkhaq dar-awr aer-eu;

² “Nawmaf, zaqhuiq zaqnyir tser-awr tsawrcawv paw pyawq-awr, Maqdawr maqtsaq-eu lafkhoer aqmyan keuvni, Yarkhaq dar-eu laer ghae-eu le? Sela.

³ Irshaqzaq hawr-eu aqda maqbaw-eu deuq-anr hawpir naeq-awq. Shaqzaq zanqzaq hawr-eu shaqzanq daqluf-eu deuq-anr, Dawr-awr tsaq-eu jeq janrnaeq-awq.

⁴ Irshaqzaq hawr-eu shaqzaq zanqzaq-anr kakhof-awr, Tsawrcawv-euq aqlaf-anr nae bibuq-ir-awq.”

⁵ Aqyawfmaf maq siqnya-aer, aqyawfmaf maq ghovshaw nya’ni, Aqyawfmaf, yawzanr-euq lafkhoer canluf-eu mae. Mirtsaq-euq dawqpaeq duqpur dawqtawvluf maqzif-a.

⁶ Ngar aer-eu, “Nawmaf-aq, miqyaer deuq mae. Nawmaf yawqghaq navluf gor duidui-eu ghaq-euq zaqdeuq taef mae.

⁷ Aerkhawf, nawmaf, tsawrhaqzaq lof-aer yashir-awr, Mirtsaq-euq dzoeqda tiq ghaq lof-aer yacoq-ir taef-a.”

⁸ Miqyaer-or! Tur-awr, mirtsaq-anr yarkhaq dar-awq. Aqjeq mirnae aernar-aq, Tsawrjeuq dawqtawvluf nawq-euq jeqbir mae.