Jaceuq 81 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Irsaqleqlav Tsawrhaq-or, Narhaq-awq

Car-eu paw sheuqghae-eu aqyuif ghaq-anr bofnaeq-euq, Giqtir kawqsheu, Aqsav-euq cardawq

¹ Aqdui-euq ghaq pyeuf-eu Miqyaer-anr, Tersar yawkhav-aer carnaeq-awq. Yaqkov-euq Miqyaer-anr laqkhaq caer-eu lafkhoer gurgaq-awq.

² Cardawq cardov laf-awr caexlaer civ-awq. Narhaq muiq paq-aer deur-mq diq-awr bawqlaw baw-awq.

³ Bala lashuif tsaeqlar ngae, lalov lovlar ngae hawr-eu, Yawbui bui-eu arnan-anr darhae baw-awq.

⁴ Aqjeq mirnae aernar-aq, Heu-aq, Irsaqleqlav-euq zanrtaq khoftaq mae. Yaqkov-euq Miqyaer nae biftaq-euq zanrdawq mae.

⁵ Aqyawf nae Yorsaev-euq lafkhoer dawqdzawr lof-aer bifyaf-euq mae. Aqyawf, Irjirtuv-anr cantsaev ghaeluf ngae, Ngar maq ghovshaw nya-eu dawqngaeq dawqbav yagaq-euq ma.

⁶ “Ngar, aqyawf-euq bafpu-anr darluf-eu khavbaev yurdzae naeq-awr; Aqyawf-euq aqlaf-anr nae, khavpuq yurdov naeq-euq ma.

⁷ Nawr, gardzaq garkawv-euq lafkhoer kur ngae, Ngar, nawq-anr bibuq-ir-euq ma. Ngar, zaftaq-euq jawrduq mqjeq-euq lafkhoer nae, Nawq-anr ngaeqkhof-euq ma. Ngar, nawq-anr Maqlirbaq lawrgawv-euq dawqpae tsermr haw-euq ma. Sela.

⁸ “Ngaq-euq tsawrhaq-or! Narhaq sher-eq. Ngar, nawq-anr aernoeqnaeq nyar! Irsaqleqlav-or! Nawr, ngaq-euq dawq-anr bi narhaqmawf mir-a!

⁹ Nawmaf-euq ghanrcae, aqcawq-euq miqyaer taqbi javlar. Nawmaf, aqcawq-euq miqyaer-anr uqduq khawf taqtanq.

¹⁰ Ngar-aq, nawmaf-euq Miqyaer pyeuf-eu Ya’we Miqyaer ma. Nawmaf-anr Irjirtuv-anr nae sheuqdov laf-euq ghaq ma. Nawmaf-euq khaqmae mrnga-awq, Ngar, nawmaf-anr bidzaq bi dawrdaev ma.

¹¹ “Aerkhawf, ngaq-euq tsawrhaq, ngaq-euq tersar-anr maq narhaq-a. Irsaqleqlav, ngaq-anr tiqpawf-iq maq geufnaeq laf-a.

¹² Khoermirnae, ngar, aqyawfmaf nuima ghanr-eu lof-aer bidaef-awr; Aqyawf ha-euq maeqbawq kharjav-eu lof-aer bican-euq ma.

¹³ “Or, ngaq-euq tsawrhaq, ngaq-anr narhaq naeqlaf lawnmr-aq, Irsaqleqlav, ngaq-euq garma-anr can-eu lawnmr-aq!

¹⁴ Ghawqmyanr maqghae-aer, Ngar, aqyawf maf-anr muir-eu deuq-anr zuivghaq-awr, Ngaq-euq aqlaf bafpyawr-awr, Aqyawf maf-anr caelar-eu deuq-anr deuvghaq ma.

¹⁵ Ya’we Miqyaer-anr byae-eu deuq, awbyav-eu janrgeuf taef-a. Aerkhawf, aqyawfmaf yadaq-eu jeq, Mqmaq maqbyav yarzir yadaq taef-a.

¹⁶ Aqyawf, aqyawf maf-anr muiq duidui-eu dzaqla ghovcaer bidzaq-awr, Ngar, nawmaf-anr logur-euq byaquir tiqdaev bidawr ma.”