Jaceuq 80 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Lavmuiqkhof Naeqlaf-awq!

Car-eu paw sheuqghae-eu aqyuif ghaq-anr bofnaeq-euq, Kapaf aryaev kawqsheu, Aqsav-euq sarkir cardawq

¹ Yawrmaf-anr sheuqghae-eu lof-aer Yorsaev-anr sheuqghae-awr, Yawr bo-eu lof-aer Irsaqleqlav-anr bosav-eu ghaq-or, Nga’maf-anr naqbawr ciqkhmr naeqlaf-awq. Jeqlurbeq-euq yawkaq-anr jawrluf-eu ghaq-or, Yawshaef byadov lef-awq.

² Erpaqleq, Beqyaqmiq hawr-eu Maqnarseq-euq maeqshi, Nawq-euq ghaq bimawr-eu lafkhoer, Oe-awr nga’maf-anr kakhof naeqle-awq.

³ Miqyaer-or! Nga’maf-anr lavmuiqkhof naeqlaf-awq. Nga’maf kakhof-eu jeq za’ni, nawq-euq myavpyawq-anr nae, Yawshaef bi byadov lef-awq!

⁴ Guirmaf-euq Miqyaer pyeuf-eu Ya’we Miqyaer-or! Nawq-euq tsawrhaq guiqlanq shar-eu gar, Nawr nuima aqmyan keuvni paer-eu laer ghae-eu le?

⁵ Nawr, aqyawf maf-anr myavbir-euq dzar bidzaq-awr, Aqyawf maf-anr myavbir ghawqmya’ni bidawr-euq mae.

⁶ Nawr, nga’maf-anr, nga’maf-euq dawqpae jawr-eu deuq naeq-aer bi caedzaq naeqlaf-awr, Nga’maf-anr muir-eu deuq, aqyawfmaf yawkaq uirluf-eu mae.

⁷ Guirmaf-euq Miqyaer-or! Nga’maf-anr lavmuiqkhof naeqlaf-awq. Nga’maf kakhof-eu jeq za’ni, nawq-euq myavpyawq-anr nae yawshaef bi byadov lef-awq!

⁸ Nawr, Irjirtuv-anr nae aqgaf cirni tiq ni yurlaf-awr, Nawr, aqcawq tsawrjeuq deuq-anr taedzae-awr, Aqgaf cirni ka-euq mae.

⁹ Nawr, aqgaf cirni-euq gharduq mirtsaq laeqhmq-awr, Duqcir ghawqmanrni bi ka’nafghae ngae, Mirkhanq khanqlanni uvbyan jir-euq mae.

¹⁰ Bawduv khoer, gawqdur-anr gurba bakaq taq-awr, Uqpyaq uqlaf deuq-aq, huiq-awr gor-eu shuqlir arbawr-anr uvtaeq taq-euq mae.

¹¹ Uqpyaq uqlaf deuq, iqmalavshav-anr keuvni, cawqjadov ghae-awr, Lafmyav deuq lawrbaq-anr keuvni, cawqjakeuv taq-euq mae.

¹² Aqgaf yar-euq garma-anr khar cantsaev-eu deuq, arsiq bipyav paq-aer, Nawr aqjeq mirnae, mrjawq taq-euq yarkmr-anr ngawqpyav-euq le?

¹³ Yarsaq-euq zafteq deuq, aqgaf bawduv-euq duqcir boeqlaev-awr, Daega-anr gav-eu bawrtsanq-euq jeqzaq deuq, aqgaf dzaqjir-eu mae.

¹⁴ Guirmaf-euq Miqyaer-or! Shar ma! Nga’maf-anr lavmuiqkhof naeqlaf-awq. Mq-euq khoertav nae nga’maf-anr hawka lef-awr, Hawmawr-awr, aqgaf yarkmr heukmr-anr hawle-awq.

¹⁵ Nawq-euq armar laf nae kataq-euq aqgaf yarkmr hawr-eu, Nawq-euq gharduq ghaq bikhav-euq lafmyav-anr hawle-awq.

¹⁶ Aqgaf cirni bi coerdzae-awr, miqdzaq nae bi keuqpuiv-euq mae. Nawq-euq myavpyawq mrzanr ngae, aqyawfmaf cawv-ir-eu mae.

¹⁷ Nawq-euq aqlaf, nawq-euq armar paw jawr-euq ghaq-euq khoertav bijav-awr; Nawq-euq gharduq ghaq bikhav-euq tsawrhaqzaq-euq khoertav bijav-awq.

¹⁸ Khoernar-aq, nga’maf, nawq-anr narkhan maqpar ciqpyawrnaeq ma. Nga’maf-anr lavdaef naeqlaf-awq. Nga’maf, nawq-euq tsawrmyanr-anr kur ma.

¹⁹ Guirmaf-euq Miqyaer pyeuf-eu Ya’we Miqyaer-or, Nga’maf-anr lavmuiqkhof naeqlaf-awq. Nga’maf kakhof-eu jeq za’ni, Nawq-euq myavpyawq-anr nae yawshaef bi byadov lef-awq!