Jaceuq 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Kuirzar Lafzar

Car-eu paw sheuqghae-eu aqyuif ghaq-anr bofnaeq-euq, Giqtir kawqsheu, Daqbir-euq cardawq

¹ Nga’maf-euq Sanqpaq Miqyaer pyeuf-eu Ya’we Miqyaer-or. Mirtsaq dawqtawv luf-euq khoertav, nawq-euq tsawrmyanr arnavni huiq-awr muiq-eu nga! Nawq-euq yawshaef khanqsaer-aq, mq taf-aer gordzaeq-eu gar-anr keuvni ciqgor taq-euq mae.

² Nawq-anr muir-eu deuq-euq baqda’nae, Nawr, zaqnanq hawr-eu aqcoer dawrzaq-euq khaqmae-anr ghoe-awr nawq-euq baoq bi dovlar-euq mae. Khoer-aq, muir-eu tsawrhaq hawr-eu lafpov povkhof-eu tsawrhaq-anr lavnaq-eu gharduq mae.

³ Ngar, nawq-euq lafnoer nae ciqceuqtsaq taq-euq, Bala hawr-eu aqguir deuq-anr haw-awr, Nawq-euq mq-anr haw-awr sharnoeq sharsawx ngae,

⁴ Nawr noeqkeuvnaeq paq-aer, tsawrhaqzaq aqjeq pyeuf-eu la? Nawr oemawr paq-aer tsawrhaq-euq zaqyo aqsur ghaq la?

⁵ Nawr, aqyawf-anr mqtav ghaqkhaer taf-aer uicuiv teqni janrnaeq-awr, Aqyawf-anr yawshaef khanqsaer hawr-eu taqhuiq taqmanr-eu uqdzanq bidzanq taq-euq mae.

⁶ Nawr, nawq-euq aqlaf-euq lafzar deuq-anr, aqyawf nae bi uvlanr-awr, Nawr, yawqjeq navluf aqyawf-euq aqkuir-euq uqmov bijav-euq mae.

⁷ Yawr hawr-eu mawrner dawqtawvluf, Daega-anr jawr-eu bawrtsanq-euq jeqzaq deuq khawf,

⁸ Mq-anr zaw-eu arjir deuq hawr-eu, Ircuf-anr jawr-eu ngaqshaq, Iqmalavshav-euq lafkhoer cantsaev-eu boeqboeq luvluv deuq-anr khawf, Aqyawf nae bi uvlanr-euq mae.

⁹ Nga’maf-euq Sanqpaq Miqyaer pyeuf-eu Ya’we Miqyaer-or! Mirtsaq dawqtawv luf-euq khoertav, nawq-euq tsawrmyanr arnavni huiq-awr muiq-eu nga.