Jaceuq 79 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nawq-euq Tsawrhaq-anr Kakhof Naeqlaf

Aqsav-euq cardawq

¹ Miqyaer-or! Aqcawq tsawrjeuq, nawq-euq jeqbir-anr urle taq-euq mae. Aqyawfmaf, nawq-euq shawr-eu uqduq tanqnymr nymrma-anr, Maqshawrni bipyeuf-ir-awr; Aqyawfmaf, Yeqlursaqlaeq-anr lavpyav lavshavjir yaf-euq mae.

² Nawq-euq kuirlaf zaqkhav shirtaq-euq mawrdo, Aqyawfmaf, mq-euq arjir-anr dzar lof-aer bidzaq-awr; Nawq-euq tsawrshawr-euq shiqshaq-aq, Mirtsaq-euq bawrtsanq-euq jeqzaq-anr bidzaq-euq mae.

³ Aqyawfmaf nae aqcawq-euq shiq, ircuf lof-aer lavyoer-euq khoer-aq, Yeqlursaqlaeq meuq tiqjawq yoerluf-eu khawf, Tsawrshir duqpanq-eu tiqghaq-iq maqjawr-a.

⁴ Nga’maf-aq, dawqpae jawr-eu tsawrhaq deuq ngaeqdoerduq pyeuflar-awr; Tiqjawq jawr-eu deuq aqjaf jafduq hawr-eu ja’uirduq pyeuflar taq-euq mae.

⁵ Ya’we Miqyaer-or! Nawr aqmyan keuvni nuima paer-eu laer ghae-eu le? Li-eu maqbawni lor? Nawr myavnav nav-eu, miqdzaq dof-eu lof-aer bidof-eu laer ma laq?

⁶ Nawq-anr maq siqnya-eu tsawrjeuq deuq-anr hawr-eu, Nawq-euq tsawrmyanr-anr maqkur-eu mirkhanq-euq khoertav, Nawq-euq nuima paer-eu jeq shaevdav naeq-awq.

⁷ Aqjeq mirnae aernar-aq, aqyawfmaf, Yaqkov-anr kawfdzaq jir-awr; Aqyawfmaf, aqyawf-euq jawrduq jawrzar lavcawvjir naeq-euq mae.

⁸ Nga’maf-anr coeqlar-eu dzeurlaf ngae-euq yawlaeq yawca, ngaer naeqlaf-awq. Nawq-euq nanqyuni ghawqshaq gaq-eu jeq, Nga’maf-anr yawkawr-aer bi keuvle naeqlaf-awq. Aqjeq mirnae aernar-aq, nga’maf yawkhav-aer bi gheu’aw taq-euq mir-a.

⁹ Nga’maf-anr kakhof-eu ghaq pyeuf-eu Miqyaer-or, Nawq-euq tsawrmyanr yawshaef khanqsaer za’ni, Nga’maf-anr cawba naeqlaf-awq. Nawq-euq tsawrmyanr muiqni, nga’maf-anr bibuq-ir-awr, Nga’maf-euq iqbax-euq gharduq lawrdan-eu jeq laeqhmq naeqlaf-awq.

¹⁰ Aqjeq ghae-eu aqcawq tsawrjeuq heulof-aer bi’aer-eu, “Aqyawf maf-euq Miqyaer aqgeugar jawr-eu la?” Nawq-euq kuirlaf zaqkhav deuq-anr shiq lavdov-euq deuq-anr, Lafpov povkhof naeq-eu garkawv, nga’maf-euq maeqshi, Tsawrjeuq tsawrca deuq-anr bisiq-awq.

¹¹ Kuv-anr bidawv-euq deuq manr-eu tersar nawr jawr-eu gar bi larkeuv-awq. Huiq-awr manr-eu nawq-euq baoq-anr ghoe-awr, Yashir mae laer bi dartsaev taq-euq deuq-anr bidzeur-ir-awq.

¹² Sanqpaq Miqyaer-or! Nga’maf-euq dawqpae jawr-eu deuq-euq bawkhanr-anr keuvni, Nawq-anr ngaeqdoer-euq jeq yur-awr, Aqyawf maf-anr shif myav byan’ni janrkhof naeq-awq.

¹³ Khoerngae, nawq-euq daega-anr jawr-eu yawr, Nawq-euq tsawrhaq pyeuf-eu nga’maf, Nawq-euq guiqlanq-anr li-eu maqbawni jaceuq-awr, Yawqzir navluf nawq-anr jaceuq-eu jeq bi mawryaf ma.