Jaceuq 78 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer, Aqyawf-euq Tsawrhaq Yawdoer Khawf Gaq-eu

Aqsav-euq Maqsaqkir

¹ Ngaq-euq tsawrhaq deuq-or! Ngaq-euq zanrdawq-anr naqbawr narhaq-awr; Ngaq-euq khaqmae-euq dawq-anr, nawq-euq naqbawr ciqkhmr-awq.

² Ngar, ngaq-euq khaqmae mrnga-awr dawqdaq zmq ma. Ngar, arhuba-euq zaftaq-euq dawq ngaeq ma.

³ Aqdui-euq aqpoeq deuq, aqdui-anr aernaeq laf-awr, Aqdui gaqhaw-awr siqnya-eu garkawv mae.

⁴ Aqdui, aqyawf maf-euq zaqdeuq uvdeuq-anr nae maq zaftaq. Ya’we Miqyaer-anr jaceuq paq-aer ghae-eu deuq, Aqyawf-euq ghaq hawr-eu zanqler paq-aer ghae-eu aqyawf nae mr-euq gar, Maeqnan paw cantae laf-eu nanqzir-anr ja’naeq ma.

⁵ Aqjeq mirnae aernar-aq, aqyawf, Yaqkov-euq lafkhoer dawqdzawr taqyaf-awr, Irsaqleqlav-euq lafkhoer zanrdawq bifyaf-euq mae. Khoer-aq, aqyawfmaf, aqyawf maf-euq zaqdeuq uvdeuq-anr bi siqnya’ni, Aqyawf nae aqdui-euq aqpoeq deuq-anr khaerdawq bifyaf-euq mae.

⁶ Nanqzir pyeuf-eu, maeqnan paw daefle-eu zaqdeuq uvdeuq, Aqyawf maf-anr siqnya’ni; Aqyawfmaf tsawqtur-awr, Aqyawf maf-euq zaqdeuq uvdeuq-anr dawqdzawr mrnaeq-eu gharduq mae.

⁷ Khoer-aq, aqyawfmaf, Miqyaer-anr noeqtmq taq-awr, Miqyaer-euq gardeuq-anr maqbi ngaer-eu uqtaf; Aqyawf-euq zanrdawq khofdawq-anr bi cantae-eu gharduq mae.

⁸ Khoer-aq, aqyawf maf-anr, aqyawf maf-euq aqpoeq deuq lof-aer, Maqbi durlar-eu gharduq mae. Aqyawf maf-euq tsawrtsuif-aq, nuima taq-eu maqtsaq-aer; Aqyawf maf-euq saflar, Miqyaer-anr sarjax maqzif-eu uqtaf, Miqyaer-euq aerdawq maq narhaq geuf-aer puiq-euq tsawrtsuif mae.

⁹ Erpaqleq-euq zaqdeuq, guirdeuv deuv-eu keuka dawv-awr kav bafluf-eu khawf, Guirdeuv deuv-eu arnan-anr caevbyov-euq mae.

¹⁰ Aqyawfmaf, Miqyaer-euq dawqma sarjax-anr maq mrcaw-aer; Aqyawf-euq zanrdawq-euq lafkhoer tiqpawf-iq maq cantae-aq.

¹¹ Aqyawfmaf, aqyawf nae bimawr-euq aqyawf-euq gardeuq, Hawr-eu zanqler paq-aer ghae-eu jeq ngaer-euq mae.

¹² Miqyaer, Irjirtuv-euq Zornav daega-anr, Aqyawf maf-euq aqpoeq deuq-euq maeqshi zanqler paq-aer ghae-eu jeq mr-euq mae.

¹³ Aqyawf, iqmalavshav-anr daeqpav-awr, ircuf-anr kavpyawr lof-aer biyawf-awr, Aqyawf maf-anr bi cantsaev-euq mae.

¹⁴ Aqyawf, aqyawf maf-anr nan’ghanr paw-aq, mqdmr nae sheuqghae-awr; Uqcif mirlanni, dofluf-eu miqdzaq nae sheuqghae-euq mae.

¹⁵ Aqyawf, bawrtsanq bawrdanr-anr khaqlo diqpav-awr; Aqyawf maf-anr yawnaf-anr nae dovlar-euq myaq duidui-eu ircuf bidawr-euq mae.

¹⁶ Aqyawf, khaqlo-anr nae khawf ircuf bi dovle-awr, Ircuf khoer lawrgawv lof-aer bi yoerle-euq mae.

¹⁷ Aerkhawf, aqyawfmaf, Miqyaer-anr iqbax par mrmyaqdzaeq lar-awr; Bawrtsanq bawrdanr-euq lafkhoer, aqyawfmaf, gor duidui-eu ghaq-anr puiq-euq mae.

¹⁸ Aqyawfmaf khar dzaqmawf-eu jeq bidzaq naeqlaf laer shar-awr, Aqyawf maf-euq nuima-euq lafkhoer Miqyaer-anr tsermr haw-euq mae.

¹⁹ Aqyawfmaf, Miqyaer-anr puiq-eu dawq ngaeq-awr aer-eu, “Bawrtsanq bawrdanr-euq lafkhoer, Miqyaer hawqje shardanrnya mae lor?

²⁰ Haeq, aqyawf khaqlo-anr juif-awr ircuf bi tanqdov lef-awr lawrgawv lof-aer yoerle-euq mae. Aerkhawf, aqyawf-euq tsawrhaq-euq gharduq kaqmur hawr-eu shaqjir bi dzaqnya mae laq?”

²¹ Khoermirnae, Ya’we Miqyaer, heu-anr yagaq ngae, nuima paerlar-awr, Yaqkov-euq zaqdeuq uvdeuq-anr keuq-eu miqdzaq lavdof taq-euq uqtaf; Aqyawf, Irsaqleqlav-euq tsawrhaq-anr nuima par paerkhav lar-euq mae.

²² Aqjeq mirnae aernar-aq, aqyawfmaf, Miqyaer-anr maqjan-aer, Aqyawf-euq kakhof-eu jeq-anr maqghoe-aq.

²³ Aerkhawf, aqyawf, khoertav jav-eu mqdmr-anr dawq bif-awr, Mqtav-euq larghov bipan le-euq mae.

²⁴ Aqyawf maf-euq khoertav maqnav bi yaerle-awr, Aqyawf maf-anr mqtav-euq dzar bif-awr bidzaq-euq mae.

²⁵ Tsawrhaqzaq, mqtav ghaqkhaer-euq dzar yadzaq-awr; Aqyawf, aqyawf maf-anr dzaq-eu jeq tiqbyan tiqlof bifnaeq-euq mae.

²⁶ Aqyawf, nanrma dovkhaeq paw-euq jaqlaer mq-euq khoertav bi bawlaf-awr; Aqyawf-euq baoq nae, lafov paw-euq jaqlaer bi dovlar-euq mae.

²⁷ Aqyawf, aqyawf maf-euq khoertav khaqlaer lof-aer shaqjir bi gale-awr; Iqmalavshav-euq kharshuif lof-aer arjir deuq pyaeqghae lef-euq mae.

²⁸ Aqyawfmaf saeqghawv ghawv-awr jawrnaq mrluf-eu pu-euq ghanrcae, Yawqha-euq jawrduq tiqjawq bi gale-euq mae.

²⁹ Miqyaer, aqyawfmaf dzaqmawf-eu jeq bifnaeq-euq mirnae; Aqyawfmaf dzaq-awr, tiqdaev ya dzaqdaev-euq mae.

³⁰ Aqyawfmaf dzaqmawf-eu jeq maqya dzaq-aer maqghae-aq. Aerkhawf, dzar khoer aqyawf maf-euq khaqmae-anr anrluf ngae,

³¹ Miqyaer, aqyawf maf-anr nuima paer-eu lafkhoer; Aqcawq taf-aer lov-eu aqyawf maf-euq tsawrhaq-anr saef-awr, Irsaqleqlav-euq zaqguq deuq-anr lavsaef-euq mae.

³² Heulof-aer janrnaeq-euq khawf, aqyawfmaf iqbax parmr-awr; Aqyawf nae zanqler paq-aer ghae-eu jeq mr-euq gar maqjan-a.

³³ Khoermirnae, aqyawf, aqyawf maf-euq arnan aryamq-anr saf lof-aer bi byovjir-awr; Aqyawf maf-euq arkhof arla-aq, guv-awr gav-eu lafkhoer bijir-euq mae.

³⁴ Aqyawf, aqyawf maf-anr saef ngae, aqyawfmaf, aqyawf-anr pov-euq mae. Aqyawfmaf, ghoflar-awr nuima keuv-eu lafkhoer Miqyaer-anr pov-euq mae.

³⁵ Khoernar-aq, aqyawfmaf, Miqyaer-aq, aqyawf maf-euq logur pyeuf-awr, Gor duidui-eu Miqyaer-aq, aqyawf maf-anr, Kakhof-eu ghaq pyeuf-eu gar noeqmawr lar-euq mae.

³⁶ Aerkhawf, aqyawfmaf, aqyawf-anr khaqmae nae japoeq-eu gar nae, Aqyawf maf-euq maeqlar nae aqyawf-anr jaqmyawf myawf-eu mae.

³⁷ Aqjeq mirnae aernar-aq, aqyawf maf-euq nuima, aqyawf-anr maqjav-aer; Aqyawfmaf, aqyawf-euq dawqma sarjax-anr khawf sarjax maqzif-a.

³⁸ Aerkhawf, Miqyaer ghawqshaq gaq-eu jeq byan-eu mirnae; Aqyawf maf-euq yawlaeq yawca-euq iqbax pyaeqnaeq-awr, Aqyawf maf-anr maq lavcawv naeq-aq. Ghawqmya pov, aqyawf nuima paer-eu khawf, Ordzeur naeq-awr, aqyawf, nuima kharpaer-eu lof-aer maq janrnaeq-aq.

³⁹ Aqjeq mirnae aernar-aq, aqyawf maf-aq, Jaqlaer bawbyov ghae-euq nar-aq, Maq ghoflar-eu saf-anr dur-eu, shiqshaq taef mae laer, aqyawf noeqkeuv-euq mae.

⁴⁰ Aqyawfmaf, kharshuif-euq daega-euq lafkhoer, Aqyawf-anr armyav pov nuima bicawv-ir-awr; Bawrtsanq bawrdanr-euq lafkhoer, Aqyawf-euq nuima armyav pov lavpaer-euq nga!

⁴¹ Aqyawfmaf, Miqyaer-anr tiqpov sair tiqpov tsermr haw-awr, Irsaqleqlav-euq Yawshawr ghaq-anr nyaefsuf naeq-euq mae.

⁴² Aqyawfmaf, aqyawf-euq baoq huiq-eu aqlaf-anr hawr-eu, Aqyawf maf-anr muir-eu deuq-anr nae, Aqyawf nae kakhof naeq-euq arnan-anr ngaer-euq mae.

⁴³ Irjirtuv-euq lafkhoer, aqyawf-euq bisiq bimawr-eu jeq mr-awr, Zornav daega-anr, aqyawf-euq zanqler paq-aer ghae-eu jeq mr-euq mae.

⁴⁴ Aqyawfmaf, ircuf maqbi dawrnya paq-aer, Aqyawf maf-euq lawrbaq hawr-eu lawrgawv-anr shiq bipyeuf-ir-euq mae.

⁴⁵ Aqyawf, aqyawf maf-anr bi kawfsaef dzaq-eu laer buqsav baqmaf pyaeqghae lef-awr; Aqyawf maf-anr bi lavcawv-eu laer khaqpaq baqmaf pyaeqghae lef-euq mae.

⁴⁶ Aqyawf nae aqyawf maf-euq dzaqla ghovcaer, aqjuq-anr bifnaeq-awr; Aqyawfmaf nae laejae-awr mr-euq jeq, nyaevbanr baqmaf-anr bifnaeq-euq mae.

⁴⁷ Aqyawf, aqyawf maf-euq aqgaf bawduv-anr uqyaer arsiq nae bi daecawv-awr, Siqguq arbawr-anr ngaer nae bi gasaef-euq mae.

⁴⁸ Aqyawf, aqyawf maf-euq jeqzaq yawhuiq-anr, uqyaer arsiq nae bi daesaef-awr; Aqyawf maf-euq jeqzaq yawzaq-anr-aq, miqdzaq dof-eu tsof nae bi daesaef-euq mae.

⁴⁹ Aqyawf, aqyawfmaf jawr-eu gar lavcawv-eu mqtav ghaqkhaer bi’oe-awr, Aqyawf guvlar paq-aer ghae-eu aqyawf-euq nuima yawkhav-aer paer-eu jeq, Nuidav dav-eu jeq, nuipaer paer-eu jeq hawr-eu gardzaq garkawv, Aqyawf maf-euq khoertav shaevdav lef-eu mae.

⁵⁰ Aqyawf nuima paer-eu jeq-euq cankawv lavbaw-awr; Aqyawf, aqyawf maf-euq nuima saflar shir-eu jeq-anr nae maqbi dzeur-ir-aer; Aqyawf maf-euq daefzir-anr nargawr gawrma bi nyawqler-euq mae.

⁵¹ Haqmav-euq saeqghawv-euq lafkhoer, ghaq nae za-euq huqbaw aqyuif pyeuf-eu, Irjirtuv-euq huqbaw zaqyo dawqtawv luf-anr lavsaefjir naeq-euq mae.

⁵² Aerkhawf, aqyawf, aqyawf-euq tsawrhaq-anr, yawr lof-aer bi dovle-awr; Bawrtsanq bawdanr-euq lafkhoer aqyawf, aqyawf maf-anr, Yawrmaf lof-aer sheuqghae-euq mae.

⁵³ Aqyawf, aqyawf maf-anr yawmuiq-aer sheuqghae-eu mirnae, aqyawfmaf maqguv-a. Aerkhawf, aqyawf maf-anr muir-eu deuq-aq, Iqmalavshav-euq ircuf nae bi danqpymq-euq mae.

⁵⁴ Khoernar-aq, aqyawf, aqyawf maf-anr, Aqyawf-euq shawr-eu mirkaq-anr sheuqkeuv naeq-euq mae. Gawqjawq heujawq-aq, aqyawf-euq armar laf nae za-euq mae.

⁵⁵ Aqyawf, aqyawf maf-euq maeqhu jawr-euq tsawrjeuq tsawrca deuq-anr khawf, taedzae naeq-awr; Aqyawf maf-anr jeqbir lof-aer mirtsaq cavdaeq daeqbir naeq-euq mae. Khoernar-aq, Irsaqleqlav tsawrjeuq-anr, Aqyawf maf-euq saeqghawv-euq lafkhoer bijawr-euq mae.

⁵⁶ Aerkhawf, aqyawfmaf, Gor duidui-eu Miqyaer-anr tsermr-awr, Puiq-euq uqtaf, aqyawf-euq dawqdzawr-anr maq cantae-a.

⁵⁷ Aqyawf maf-euq aqpoeq aqbawr deuq lof-aer, Narkhan paw ciqpyawr-awr sarjax maqzif-eu jeq mr-euq mae. Aqyawf maf-aq, ghoecoer paq-aer maqghae-eu, Gardzer paw dov-ir-eu kav-anr dur-eu mae.

⁵⁸ Aqjeq mirnae aernar-aq, aqyawf maf-euq yawgor jawrduq deuq-euq baqda’nae, Aqyawf-anr nuima bi paerlar-awr; Aqyawfmaf nae pyaftaq-euq tanqpanq aqma mawrkawr deuq-euq baqda’nae, Aqyawf-anr myavnav bi navlar-euq mae.

⁵⁹ Miqyaer heu-anr yagaq ngae, nuima paerlar-awr, Irsaqleqlav-anr nuidav yawkhav-aer dav-eu mae.

⁶⁰ Khoermirnae, aqyawf nae tsawrhaqzaq-euq ghanrcae bijav-euq saeqghawv, Shirloq-anr jav-eu saqpar saeqghawv-anr aqyawf byaerdzae-euq mae.

⁶¹ Khoernar-aq, aqyawf-euq ghaq, zaqkhav pyeuf-ir ni a’naeq-awr, Aqyawf-euq yawshaef khanqsaer, muir-eu deuq-euq aqlaf-anr biur-ir-euq mae.

⁶² Aqyawf, aqyawf-euq jeqbir-anr nuima paer-awr, Aqyawf-euq tsawrhaq, micaer khaeq-anr a’naeq-euq mae.

⁶³ Aqyawf maf-euq aqli zaqguq deuq, miqdzaq nae bi puivsaef-awr, Aqyawf maf-euq aqbur zaqguq deuq, danqdzaq-ir khar maqbi za-aq.

⁶⁴ Aqyawf maf-euq pirma deuq micaer nae yacoq-ir-awr, Aqyawf maf-euq miqcoeq miqma deuq, tsawrngoer maqngoer naeq-aq.

⁶⁵ Khoernar-aq, Sanqpaq Miqyaer yufkhav taq-euq turlar-euq lof-aer turlar-awr; Aqgaf dzaruir dawr-euq baqda’nae gur-eu, Ghaq zawr khav-eu tiq ghaq lof-aer dur-eu mae.

⁶⁶ Aqyawf, aqyawf-anr muir-eu deuq-anr deuvdeuv-aer taekhof ghaq-awr; Aqyawf, aqyawf maf-anr li-eu maqbawni daqga-eu jeq biza-euq mae.

⁶⁷ Khoeruqtaf, aqyawf, Yorsaev-euq saeqghawv-anr byaerdzae-awr, Aqyawf, Erpaqleq tsawrjeuq tsawrca-anr maq tserdov-aq.

⁶⁸ Aerkhawf, Yurdav tsawrjeuq hawr-eu, Aqyawf zawr gaq-eu Ziroq gawqjawq-anr tser-euq mae.

⁶⁹ Aqyawf, aqyawf nae li-eu maqbawni baezif taq-euq mirtsaq tanqkhawr lof-aer, Sanqpaq-euq nymrgor lof-aer, aqyawf-euq shawr-eu jawrduq tsovtaq-euq mae.

⁷⁰ Aqyawf, aqyawf-euq kuirlaf zaqkhav Daqbir-anr tserdov-awr, Yawr yawrkuv-anr nae sheuqlaq-ir-euq mae.

⁷¹ Aqyawf, yawrzaq jawr-eu yawrma-anr bobo-aer jawrluf-eu gar nae, Miqyaer, aqyawf-anr sheuqdov laf-awr; Aqyawf-euq tsawrhaq pyeuf-eu Yaqkov hawr-eu, Aqyawf-euq jeqbir pyeuf-eu Irsaqleqlav-anr yawr bo-eu lof-aer bi bosav-euq mae.

⁷² Khoermirnae, aqyawf-euq nuima muiq-awr jaq-eu lafkhoer, Aqyawf, aqyawf maf-anr yawr bo-eu lof-aer bosav-awr; Aqyawf-euq bym-awr nya-eu aqlaf nae, aqyawf maf-anr sheuqghae-euq mae.