Jaceuq 77 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Baoq Huiq-eu Irsaqleqlav-euq Miqyaer

Car-eu paw sheuqghae-eu aqyuif ghaq-anr bofnaeq-euq, Yeqduqtur kawqsheu, Aqsav-euq cardawq

¹ Ngar, ngaq-euq tersar nae Miqyaer-anr gurgaq-euq ma. Ngaq-euq tersar nae Miqyaer-anr gurgaq ngae, Aqyawf-euq naqbawr ciqkhmr naeqlaf-euq mae.

² Ngaq-anr gardzaq garkawv keuvle-eu arnan-anr, Ngar, Sanqpaq Miqyaer-anr pov-euq ma. Ngar, uqcif paw maq naqlerni, ngaq-euq aqlaf cawqdir-euq khawf, Ngaq-euq nuima saflar maqmuiq maq sarlar nya-a.

³ Ngar, Miqyaer-anr noeqkeuv-awr manr-euq ma. Ngar dawqghofdov ngae, ngaq-euq saflar gabyaev ghae-euq mir-a. Sela.

⁴ Nawr, ngaq-euq myavnuiv myavkhov daeqbyae naeqlaf-awr, Ngaq-euq gardzaq garkawv ardzaeq-aer kan-eu mirnae, Dawq maq ngaeqdovcoer nya.

⁵ Ngar, arhu-euq arnan aryamq-anr sharnoeq-awr, Arhuba-euq arkhof arla-euq garkawv sharnoeq-euq ma.

⁶ Ngar, uqcif paw ngaq nae car-euq cardawq-anr noeqmawrlar mir-a; Ngar, ngaq-euq nuima dzardziv dziv-awr, Ngaq-euq saflar yawmuiq-aer povtser haw-euq ma.

⁷ Sanqpaq Miqyaer, aqdui-anr li-eu maqbawni taedzae naeqlaf taef-a lor? Aqyawf, aqdui-anr nuikhanr maqpar shir-eu laer mae laq?

⁸ Aqyawf-euq ghawqshaq gaq-eu jeq, li-eu maqbawni jirshaw-euq la lor? Aqyawf-euq sarjax, saq-eu maqbawni gardanr maqpar tsoeq-eu mae laq?

⁹ Miqyaer, guiqlanq yawdzanr bif-eu jeq-anr ngaershaw-euq la laq? Aqyawf nuima paer-awr nanqyuni ghawqshaq gaq-eu jeq piqtaeq-aq lor? Sela.

¹⁰ Khoernar-aq, ngar aer-eu, “Heu-aq, ngar nuima nar-eu tiqjeq ma. Aerkhawf, ngar, Gor duidui-eu ghaq-euq armar laf-euq arkhof arla-anr noeqkeuv ma.”

¹¹ Ngar, Ya’we Miqyaer-euq gardeuq-anr noeqkeuv ma. Ngar, arhuba nawq nae zanqler paq-aer ghae-eu jeq, Mryaf-euq gar aqdir noeqkeuv ma.

¹² Ngar, nawq nae khar mryaf-euq gardeuq-euq garkawv khawf, dzardzivdziv ma. Nawq nae mr-euq deuq-euq garkawv sharnoeq sharsawx ma.

¹³ Miqyaer-or! Nawq-euq garma-aq, shawr-eu jawrduq-euq lafkhoer jav-eu mae. Aqdui-euq Miqyaer lof-aer huiq-eu miqyaer aqsur ghaq jawr-eu la?

¹⁴ Nawr-aq, zanqler paq-aer ghae-eu jeq mr-eu Miqyaer mae. Nawr ghaq khav-eu garkawv, tsawrhaqzaq-anr dawqdzawr mrnaeq-euq mae.

¹⁵ Nawq-euq tsawrhaq pyeuf-eu Yaqkov hawr-eu Yorsaev-euq zaqdeuq-anr, Nawr, nawq-euq ghaq khav-eu lafdu nae kakhof naeq-euq mae. Sela.

¹⁶ Ircuf, nawq-anr mawr ngae, Miqyaer-or! Ircuf nawq-anr mawr ngae guv-ir-awr; Naf-eu yawnaf khawf, yawdzuq dzuq-eu mae.

¹⁷ Mqdmr-aq, ircuf shaevka lef-awr, mq tersar bi dovle-eu uqtaf, Nawq-euq kavmyaq khawf khoerpaw heupaw beuvdov ghae-eu mae.

¹⁸ Nawq-euq mqjeq-euq tersar jaqlaer laerzeuv-euq lafkhoer manrluf-awr, Mqmyawf myawf-awr mirtsaq-anr bi byalar-eu uqtaf, Mirtsaq tanqkhawr yawdzuq dzuq-awr nyaenyae-aer jav-eu mae.

¹⁹ Nawq-euq garma-aq, iqmalavshav-euq lafkhoer jav-awr, Nawq-euq cankawv-aq, huiq-eu ircuf-euq lafkhoer jav-eu mirnae, Nawq nae can-euq aqkuir paeqzar-aq, maq siqlar-a.

²⁰ Nawr, nawq-euq tsawrhaq-anr yawr yawrmaf lof-aer, Morseq hawr-eu Aqloq-euq aqlaf-anr ghoe-awr sheuqghae-euq mae.