Jaceuq 76 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guvlar Paq-aer Ghae-eu Miqyaer

Car-eu paw sheuqghae-eu aqyuif ghaq-anr bofnaeq-euq, arcav tsof-eu keuka zmq-eu, Aqsav-euq dawqcar cardawq

¹ Yurdav mirkhanq-euq lafkhoer, Miqyaer-anr siqnya-awr, Irsaqleqlav-euq lafkhoer, aqyawf-euq tsawrmyanr huiq-eu mae.

² Aqyawf-euq shawr-eu jawrduq Saqlaeq-anr jav-awr, Aqyawf jawr-eu jawrduq, Ziroq-anr jav-eu mae.

³ Khoergar, aqyawf kav-euq kavmyaq ngawqkhaef-awr, Micaer, daeqdaqduq hawr-eu guirdeuv keuka lavcawv-euq mae. Sela.

⁴ Nawr-aq, jeqzaq jawr-eu gawqjawq deuq navmaqtser, Yawshaef khanqsaer hawr-eu yawmuiq yawjaq huiqdzaeq-eu mae.

⁵ Nuima khaq-eu tsawrhaq deuq tanrjoe bi daedzaq-awr, Aqyawfmaf yufkhavbyov ghae-euq mae. Ghaq khav-eu tsawrhaq tiqghaq-iq, Aqyawf maf-euq aqlaf zmqduq maqpar hawdov nya-aq.

⁶ Yaqkov-euq Miqyaer-or! Nawr, aqyawf maf-anr lmqnaeq ngae, Manq hawr-eu manq lavlawq-anr dziq-eu deuq yawshir-aer ga-eu mae.

⁷ Nawq-anr aer ngae, nawr-aq, guvlar paq-aer ghae-eu mae. Nawr nuima paer ngae, nawq-euq maeqshi aqsur ghaq yawfpeuq-eu?

⁸ Nawr, mq-euq khoertav nae yarkhaq dar-eu bi gaqle-awr, Mirtsaq tanqkhawr guv-ir-awr ciqcurni jav-eu mae.

⁹ Mirtsaq-euq khoertav, yawshaqzaq deuq-anr bibuq-ir-eu laer, Miqyaer turlar-awr yarkhaqdar ngae, khoerlof-aer pyeuflar-eu mae. Sela.

¹⁰ Tsawrhaqzaq-euq nuima paer-eu jeq aqdir nawq-anr jaceuq taef-a. Dzerlar-euq nuima paer-eu jeq khoer-anr, nawr gheunaq taef-a.

¹¹ Nawq-euq Miqyaer pyeuf-eu Ya’we Miqyaer-anr kamq-awr mrbyan-awq. Aqyawf-euq tiqjawq jawr-eu deuq dawqtawvluf, Guv paq-aer ghae-eu ghaq-anr lafsawq bifnaeq lar-awq.

¹² Aqyawf, dzoeqda deuq-euq saflar deuvtsaevdzae naeq ngae, Mirtsaq-euq sanqpaq deuq, aqyawf-anr guv taef-a.