Jaceuq 75 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer Yarkhaq Dawrcoeni Dar-eu Mae

Car-eu paw sheuqghae-eu aqyuif ghaq-anr bofnaeq-euq, Taq lavcawv laer kur-eu kawqsheu, Aqsav-euq dawqcar cardawq

¹ Miqyaer-or! Nga’maf, nawq-euq guiqlanq-anr jaceuq ma. Nawq-euq tsawrmyanr dawqpae jawrluf mae laer, Nawq-euq zanqler paq-aer ghae-eu gardeuq dzawrgaq luf-eu mirnae, Nawq-euq guiqlanq-anr jaceuq ma!

² Miqyaer heulof-aer aer-eu mae, “Ngar tsaq-eu aryamq tserdov ghaq ngae, Ngar yarkhaq dawrcoeni dar ma.

³ Mirtsaq tanqkhawr hawr-eu mirtsaq-euq khoertav jawr-eu deuq guirbyov-ir luf ngae; Ngar, mirtsaq-euq khawrzeur deuq lavzif ma. Sela.

⁴ “Ngar, janrghae-eu tsawrhaq-anr, ‘Taqpar janrghae’ laer aernaeq-awr; Tsawrcawv-anr-aq, heulof-aer aernaeq-eu ma; ‘Uqcoer taq bafdir.

⁵ Nawq-euq uqcoer yawgor-anr taq bafdir; Kawqlanr ghanr-awr taqngaeq.’ ”

⁶ Aqjeq mirnae aernar-aq, ciqgor-eu jeq-aq, Nanrma dovkhaeq hawr-eu gakhaeq paw nae oe-euq maqngeur-aer, Lafov pyawq-anr nae lar-eu khawf maqngeur-a.

⁷ Aerkhawf, yarkhaq dar-eu ghaq-aq, Miqyaer mae; Aqyawf, tiq ghaq-anr yurka-awr, tiq ghaq-anr ciqgor naeq-eu mae.

⁸ Aqjeq mirnae aernar-aq, Ya’we Miqyaer-euq aqlaf-euq lafkhoer, Nertseuvni ghae-eu aqgaf dzaruir danq-eu khmqmaq tiq khmq ciqluf-eu mae. Aqyawf, yawmuiq-aer keuqtaq-awr, khmqmaq shaevkhar dovlef ngae; Mirtsaq-euq tsawrcawv dawqtawvluf nae, dzarpaev lavdzer-awr dawr-euq mae.

⁹ Aerkhawf, ngar-aq, mqmaq maqbyav yarzir dawqdzawr mr ma. Ngar, Yaqkov-euq Miqyaer-anr car-awr jaceuq ma.

¹⁰ “Ngar, tsawrcawv deuq-euq uqcoer dawqtawv luf-anr ngawqkhaefdzae ma. Aerkhawf, tsaq-awr dawr-eu tsawrhaq deuq-euq uqcoer-aq, yabi ciqgor taef-a.”