Jaceuq 74 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-or! Nawq-euq Yarkhaq Ja-awq

Aqsav-euq Maqsaqkir

¹ Miqyaer-or! Aqjeq mirnae nawr, nga’maf-anr li-eu maqbawni taedzae naeqlaf-eu le? Aqjeq mirnae, nawr, nawq-euq daega-euq yawrmaf-anr nuima paersaef-eu le?

² Arhuba nae, nawq nae zeurkhof-euq nawq-euq tsawrhaq baqmaf pyeuf-eu, Nawq nae kakhof-awr nawq-euq jeqbir pyeuf-eu tsawrjeuq-anr noeqkeuv naeqlaf-awq. Nawr jawr-euq Ziroq gawqjawq-anr noeqkeuv naeqlaf-awq.

³ Nawq-euq aqkuir ciqdir-awr saq-eu maqbawni cawv-ir-awr jav-eu gar canhaw le-awq. Muir-eu deuq nae shawr-eu jawrduq-euq lafkhoer, yawdoer kharngeur-eu jeq mr-euq mae.

⁴ Nawq-anr muir-eu deuq, nawq-euq dzoerduq-euq lafkhoer jawr-awr lmq-eu mae. Aqyawfmaf bisiq bimawr-eu laer yawqha-euq parloq parlaer katur-euq mae.

⁵ Aqyawfmaf, arbawr ghawqmya’ni daef-eu gar, Arbawr tur-eu laer deuvhaq bafdir taq-euq gar dur-eu mae.

⁶ Khoernar-aq, aqyawfmaf yawmuiq-aer pyaftaq-euq darkawq-anr deuvhaq, Hawr-eu diqpuq nae, tiqpov taef-aer deuvkhaef deuvkhoev jir-euq mae.

⁷ Aqyawfmaf, nawq-euq shawr-eu jawrduq-anr miqdzaq keuqpuiv-awr; Nawq-euq tsawrmyanr-euq jawrduq-anr lavjawf-awr mirtsa bi gapanq ghae-euq mae.

⁸ Aqyawfmaf, yawqha-euq nuima-euq lafkhoer aer-eu, “Dzawq, aqduimaf, aqyawf maf-anr lavcawvjir naeq ma.” Aqyawfmaf, mirkhanq-euq lafkhoer kharjav-eu, Miqyaer-euq dzoerduq dawqtawv luf-anr miqdzaq nae keuqdzaerjir yaf-euq mae.

⁹ Nga’maf bisiq bimawr-eu jeq maqya mawr-aer, Miqyaer gharduq ngaeqdan-eu tsawrhaq tiqghaq-iq maqpar jawr-eu uqtaf; Aqmyan keuvni heulof-aer yashaq-eu laer tiqghaq-iq maq siqnya-a.

¹⁰ Miqyaer-or! Muir-eu deuq, nga’maf-anr aqmyan keuvni aerdoer-eu laer la? Aqyawfmaf, li-eu maqbawni nawq-euq tsawrmyanr-anr, Yaeqbawq saerlu-aer aer-eu laer mae laq?

¹¹ Nawr aqjeq ghae-eu, nawq-euq aqlaf, nawq-euq armar laf khawf cawqkhof-eu le? Nawq-euq khanq-anr nae cawqdov lef-awr, aqyawf maf-anr lavcawv naeq-awq.

¹² Aqjeq mirnae aernar-aq, Miqyaer-aq, arhuba nae ngaq-euq Sanqpaq ma. Mirtsaq-euq khoertav kakhof-eu gar mrluf-eu mae.

¹³ Nawr, nawq-euq ghaq nae iqmalavshav-anr daeqpav-awr; Nawr, ircuf-euq lafkhoer, iqmalavshav-euq byavyanq-euq uqduq diqpav naeq-euq mae.

¹⁴ Nawr, Leqberdaq-euq uqduq-anr diqpyaev diqlaev-awr; Bawrtsanq bawrdanr-anr jawr-eu tsawrhaq-anr dzar lof-aer bidzaq-euq mae.

¹⁵ Nawr, cuq diqpan-awr lawrgawv-anr ircuf bi yoerle-euq mae; Nawr, yawqjawr navluf yoer-eu lawrbaq deuq-anr ircuf bigui-ir-euq mae.

¹⁶ Nan’ghanr-aq, nawq-euq pyeuf-awr; uqcif khawf nawq-euq mae; Nanrma hawr-eu yawshaef-aq, nawq nae laeqhmq taq-euq mae.

¹⁷ Mirtsaq tanqkhawr-euq mirkaq dawqtawvluf, nawq nae lavbaw taq-awr; Jawrla hawr-eu tsanqgav, nawq nae baetaq-euq mae.

¹⁸ Ya’we Miqyaer-or! Muir-eu deuq ngaeqdoer-awr, Aqdzawq argan deuq, nawq-euq tsawrmyanr-anr, Yaeqbawq saerlu-aer aer-eu gar taqngaer de-eq.

¹⁹ Nawq-euq khaqkhoeq-euq daefzir, bawrtsanq-euq jeqzaq-anr taq a’naeq; Li-eu maqbawni, nawq-euq irshaqzaq-euq daefzir-anr taq ngaerbyov naeqlaf.

²⁰ Dawqma sarjax-anr sharnoeq naeqlaf-awq; Aqjeq mirnae aernar-aq, mirtsaq-euq khoertav yawzanr kharjav-eu gar, Coeqler deuqlerni mr-eu deuq nae jawrbyanjir taq-euq mae.

²¹ Nyaefsuf lar-eu gar yadaq-euq deuq shafdawr-eu lafkhoer taqbi ghof-ir, Irshaqzaq hawr-eu shaqzaq zanqzaq, nawq-euq tsawrmyanr-anr bi jaceuq-awq.

²² Miqyaer-or! Turlar-awr nawq-euq yarkhaq ja-awq. Aqdzawq argan deuq, nan-anr nae nawq-anr ngaeqdoer-euq gar taqngaer de-eq.

²³ Nawq-anr muir-eu deuq-euq tersar-anr taqngaer. Nawq-anr muir-eu deuq turlar-awr maq naqlerni, luiqghalar duidui luf-eu mae.