Jaceuq 73 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

JACEUQ-EU SANQBOF SMQ PAV TIQPAV: Jaceuq-eu 73-89 Miqyaer-euq Yawtsaq Yawdawr Jeq

Aqsav-euq cardawq

¹ Miqyaer-aq, Irsaqleqlav-anr aqdir aqmar muiqnaeq-euq mae. Nuima shawrjaevni ghae-eu tsawrhaq-anr muiqnaeq-euq mae.

² Aerkhawf, ngaq-euq aqkuir sanqtif tif-euq law mir-a. Ngaq-euq kuirtof tanqter ter-euq law mir-a.

³ Aqjeq mirnae aernar-aq, ngar, tsawrcawv deuq daefdzaq-eu gar ya’mawr ngae, Janrghae nya-eu tsawrhaq-anr myavnav nav-euq mir-a.

⁴ Aqyawfmaf shir ngae, tiqjeq-iq maqnar-eu uqtaf, Aqyawf maf-euq mawrdo yawlov mae.

⁵ Aqyawfmaf, aqcawq lof-aer gardzaq garkawv maqjav-aer, Aqcawq lof-aer shaqzanq maqya daq-aq.

⁶ Khoermirnae, nuima huiq-eu jeq, aqyawf maf-euq lanrdan lof-aer pyeuf-awr, Coeqler civler-eu jeq, maeqtsoeq dm-eu lof-aer dmkaq taq-euq mae.

⁷ Aqyawf maf-euq myavnuiv-aq, tsurdanqni tanqdovlef taq-awr, Aqyawfmaf, yawqha-euq nuima geufmawf-eu myavmaqtser jav-eu mae.

⁸ Aqyawfmaf, nuima huiq-eu jeq ngaeq-awr, Aqcawq-anr nyaefsuf-eu garkawv, aqjaf jafdoer-awr yawcawv jeq ngaeq-eu mae.

⁹ Aqyawf maf-euq khaqmae, mqtav mirkhanq-anr muirni zmq-awr; Aqyawf maf-euq maeqlar-aq, mirtsaq doeni can-eu mae.

¹⁰ Khoermirnae, aqyawf-euq tsawrhaq ciqpyawrkhof laf-awr; Khmqmaq tiqbyanni danq-eu ircuf, aqyawfmaf nae dawrjir-euq mae.

¹¹ Khoernar-aq, aqyawfmaf aer-eu, “Miqyaer aqjox-aer siqnya-eu? Gor duidui-eu ghaq-euq lafkhoer siqnya-eu tsawrganr anr mae laq?”

¹² Hawsher-eq, tsawrcawv deuq-aq, aqmyanluf sarsuqni daef-eu mae. Aqyawfmaf smrmuiq muiqdzaeqlar luf-eu mae.

¹³ Ngar aqdir yawqngaef-aer, ngaq-euq nuima lavshawr-awr; Maq siqnya’ni ngaq-euq aqlaf dzuifshawr-euq ngar-a.

¹⁴ Aqjeq mirnae aernar-aq, ngar nan’ga-i shaqzanq yadaq-awr; Uqshawq yawqshawq navluf, maeqpar-eu gar yadaq-euq ma.

¹⁵ “Ngar khoerlof-aer ngaeq ma” laer ngar aerdzeur-euq lawnmr-aq; Hawsher-eq, ngar, nawq-euq zaqdeuq-euq zir-anr puiq-euq jeq pyeuf-eu mae.

¹⁶ Ngar garkawv khoer ghovshaw-eu laer sharnoeq ngae; Ngaq-anr ardzaeq-aer narlar deuqlar-eu mir-a.

¹⁷ Ngar, Miqyaer-euq shawr-eu jawrduq-anr urler ngae; Aqyawf maf-euq arsaq saqduq ghovshaw nya-euq ma.

¹⁸ Aqdir nar-aq, nawr, aqyawf maf-anr jawrduq yawjur-anr bijawr-awr; Nawr, aqyawf maf-anr cawv-ir-eu jawrduq-anr bi ga’anr ghae-eu laer mae.

¹⁹ Or-oq, aqyawfmaf tiqpov taef-aer bi lavcawv-awr; Aqyawfmaf, guv-awr gav-eu jeq nae yabi puivdzaqjir taef-a.

²⁰ Tsawrhaq tiq ghaq yufmav mav-awr noeqlar-euq lof-aer; Sanqpaq Miqyaer-or! Nawr noeqlar ngae, Nawr, aqyawf maf-euq shaevdzeuf-anr hawdoer taef-a.

²¹ Ngaq-euq nuima cawv-ir-awr, Ngaq-euq lafkhoer bitsawv-euq lof-aer nar ngae;

²² Ngar-aq, tiqjeq-iq maq siqnya-eu dawrga lof-aer pyeuf-ir-awr; Nawq-euq maeqshi, jeqzaq tiq mawr lof-aer pyeuf-ir-euq mir-a.

²³ Aerkhawf, ngar aqmyanluf, nawq naeq-aer jawr-awr; Nawr, ngaq-euq armar laf-anr nyaeftaeq naeqlaf-euq mae.

²⁴ Nawr, ngaq-anr nawq-euq maeqbawq nae sheuqghae naeqlaf-awr; Arsaq saqlar ngae nawr, ngaq-anr yawshaef khanqsaer-euq lafkhoer, Hageuf naeqlaf taef-a.

²⁵ Mq-euq khoertav, nawr maqngeur nar-aq, ngar, aqsur ghaq parjawr-eu? Mirtsaq-euq khoertav, nawr maqngeur nar-aq, Ngar geufmawf-eu tiqghaq-iq maqjawr.

²⁶ Ngaq-euq nuima hawr-eu ngaq-euq shiqshaq ghaq baq-ir khawf; Miqyaer-aq, ngaq-euq nuima gharduq ghaq pyeuf-awr, Mqmaq maqbyav yarzir ngaq-euq shaqbymr ma.

²⁷ Hawsher-eq, nawq-anr nae garmanr kaq-eu gar jawr-eu deuq yacawv-ir taef-a. Nawq-anr sarjax maqzif-aer khar byaerdzae-euq tsawrhaq dawqtawv luf-anr, Nawr lavcawv-eu mae.

²⁸ Aerkhawf, Sanqpaq Miqyaer-euq dawqpae jawr-eu-aq, Ngaq-euq gharduq yawmuiq mir-a. Ngar, nawq nae mr-euq gardeuq dawqtawv luf-euq garkawv dawqdzawr mrni; Ngar, Sanqpaq Miqyaer pyeuf-eu Ya’we Miqyaer-anr ngaq-euq caevzafduq bipyeuf-euq ma.