Jaceuq 72 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Meqsirya-euq Dzoeqdzaq-euq Khanqsaer

Sorlaqmoq-euq cardawq

¹ Miqyaer-or! Sanqpaq-anr nawq-euq yarkhaq dar-eu jeq bifnaeq-awr, Nawq-euq tsaq-awr dawr-eu jeq, sanqpaq-euq zaqyo-anr bifnaeq-awq.

² Aqyawf, nawq-euq tsawrhaq-anr tsaq-awr dawr-eu lafkhoer yarkhaq dar-awr, Irshaqzaq-anr dawr-awr tsaq-eu lafkhoer darnaeq taef-a.

³ Tsaq-awr dawr-eu baqda’nae, gawqjawq deuq, tsawrhaqzaq-anr hawr-eu, Gawqdur durzaq deuq-anr nuisar of-eu jeq bi keuvle taef-a.

⁴ Aqyawf, tsawrhaqzaq-euq irshaqzaq-anr dawr-awr tsaq-eu jeq nae yarkhaq dar-awr; Aqyawf, shaqzaq zanqzaq-euq zaqdeuq-anr bibuq-ir-awr; Nawqdzaq khavdzaq-eu deuq-anr nawqmeur nawqloerjir naeq taef-a.

⁵ Nanrma bya-awr bala khartsaeq-eu khoerkeuvni, Tiqzir sair tiqzir, aqyawfmaf, nawq-anr guv taef-a.

⁶ Aqyawf-aq, yarmof maqtaeq-euq minav-aer yaerle-euq uqyaer-anr dur-awr, Mirtsaq tanqkhawr-anr ircuf shaeqle-euq uqyaer-anr dur taef-a.

⁷ Aqyawf-euq arnan aryamq-euq lafkhoer tsaq-awr dawr-eu tsawrhaq daefdzaq-awr, Bala khartsaeq-eu tsaqler dzoerler-eu jeq tiqbyanni jav taef-a.

⁸ Aqyawf, iqmalavshav heudzer-anr nae khoerdzer-anr keuvni hawr-eu, Lawrbaq-anr nae mqdzer mirdzer-anr keuvni uvlanr taef-a.

⁹ Bawrtsanq bawrdanr-anr jawr-eu tsawrhaq deuq, aqyawf-euq maeqshi awbyav-awr; Aqyawf-anr muir-eu deuq-aq, khaqlaer-anr ya’myeuf taef-a.

¹⁰ Taqshiq hawr-eu irjawlanr-anr jawr-eu sanqpaq deuq, lafsawq yurlaf-awr, Sheqba hawr-eu Seqba-euq sanqpaq deuq khawf, lafsawq damqnaeqlar taef-a.

¹¹ Sanqpaq dawqtawvluf, aqyawf-euq maeqshi ya gabyav-awr; Mirkhanq tsawrjeuq dawqtawvluf, aqyawf-euq kuirlaf yageuf taef-a.

¹² Aqyawf-anr kur-eu shaqzaq zanqzaq, irshaqzaq hawr-eu, Tiqghaq-iq cawba-eu maqjawr-eu deuq-anr, aqyawf bibuq-ir taef-a.

¹³ Aqyawf, irshaqzaq hawr-eu shaqzaq zanqzaq-anr bidzeur-ir-awr; Shaqzaq zanqzaq-euq nuima saflar-anr bibuq-ir taef-a.

¹⁴ Aqyawf, nawqdzaq khavdzaq-eu hawr-eu coeqler deuqlerni mr-eu deuq-anr nae, Aqyawf maf-euq daefzir-anr kakhof taef-a. Aqyawf maf-euq shiq-aq, aqyawf-euq gharduq zawr poeq-eu jeq pyeuf-eu mae.

¹⁵ Aqyawf yadaef taef-a. Aqcawq, aqyawf-anr, Sheqba mirkhanq-euq shuir bif taef-a. Aqcawq, aqyawf-euq gharduq aqmyanluf guiqlanq sharnaeq taef-a. Nan-anr nae aqcawq, aqyawf-anr jaceuq taef-a.

¹⁶ Mirtsaq-euq khoertav, gawqjawq uqdu sanqlanqdar tiqbyan tiqlof javle taef-a. Arsiq arlu deuq Leqbaqnoq lof-aer nyaenyae-aer jav-awr; Meuq-anr jawr-eu deuq, mirtsaq-anr daef-eu yarmof lof-aer myaqlar baerlar taef-a.

¹⁷ Aqyawf-euq tsawrmyanr li-eu maqbawni zif-awr; Nanrma kharbya-eu khoerkeuvni, aqyawf-euq tsawrmyanr javtsaflef taef-a. Tsawrhaqzaq, aqyawf-euq lafkhoer guiqlanq za-awr; Mirkhanq-euq tsawrjeuq dawqtawvluf, aqyawf-anr guiqlanq huiq-eu ghaq laer kur taef-a.

¹⁸ Irsaqleqlav-euq Miqyaer pyeuf-eu Ya’we Miqyaer-anr jaceuq-awq! Aqyawf tiq ghaq taef-aer zanqler paq-aer ghae-eu gardeuq mr-eu mae.

¹⁹ Yawshaef khanqsaer huiq-eu aqyawf-euq tsawrmyanr-anr, Mqmaq maqbyav yarzir jaceuq-awq! Aqyawf-euq yawshaef khanqsaer mirtsaq tanqkhawr dawqtawv luf-euq khoertav byan luf-ur. Aqmeq. Aqmeq.

²⁰ Yeqshaer-euq zaqyo Daqbir-euq guiqlanq shardawq heugar arsaq saq-euq mae.