Jaceuq 71 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmawq Tiq Ghaq-euq Shardawq

¹ Ya’we Miqyaer pyeuf-eu Miqyaer-or! Ngar, nawq-anr ghoe ma. Ngaq-anr tiqjawr-iq shafdawr-eu jeq taqbi keuvle naeqlaf.

² Nawq-euq tsaq-awr dawr-eu lafkhoer, ngaq-anr bibuq-ir naeqlaf-awr, Ngaq-anr bi caevdzeurnya naeqlaf. Nawq-euq naqbawr, ngaq-anr ciqkhmr naeqlaf-awr, ngaq-anr kakhof naeqlaf-awq.

³ Ngar aqmyanluf jawrlar nya-eu, Ngaq-euq gharduq ghaq khav-eu caevzafduq pyeufnaeq laf-awq. Nawr, ngaq-anr kakhof-eu gharduq khaerdawq bifdzeur-euq mae. Aqjeq mirnae aernar-aq, nawr-aq, ngaq-euq logur hawr-eu ngaq-euq lanrlof pyeuf-eu mae.

⁴ Ngaq-euq Miqyaer-or! Tsawrcawv deuq-euq aqlaf-anr nae, Ghawqshaq gaq-eu maq siqnya-eu tsawrhaq hawr-eu, Maqtsaq maqdawr-eu tsawrhaq-euq aqlaf-anr nae, ngaq-anr bibuq-ir naeqlaf.

⁵ Aqjeq mirnae aernar-aq, Sanqpaq Miqyaer pyeuf-eu Ya’we Miqyaer-or! Ngar, nawq-anr noeqtmq-eu ma. Nyir ngae nae ngar, nawq-anr ghoe-euq ma.

⁶ Ngar daefle-euq nar-aq, nawr, ngaq-anr ngaeqghae naeqlaf-euq mae. Ngaq-anr ngaqma-euq uqmav-anr nae bi daefle naeqlaf-euq ghaq-aq, nawr mae. Aqmyanluf, ngar, nawq-anr jaceuq ma.

⁷ Ngar-aq, ghawqmya ghaq-euq gharduq, Zanqler paq-aer ghae-eu jeq lof-aer dur-eu mae. Aerkhawf, nawr-aq, ngaq-euq gharduq ghaq khav-eu caevzafduq pyeuf-eu mae.

⁸ Ngaq-euq khaqmae-anr, nan’ga-i nawq-euq yawshaef khanqsaer-anr jakeuv-awr, Nawq-anr jaceuq-eu jeq bibyan naeqlaf-awq.

⁹ Ngar tsawrmawq mawq-ir ngae, ngaq-anr taq taedzae naeqlaf. Ngar ghaq maqanr-aer pyeuf-ir ngae, ngaq-anr taq byaerdzae naeqlaf.

¹⁰ Aqjeq mirnae aernar-aq, ngaq-anr muir-eu deuq ngaq-anr ngaeqcoeq-awr, Ngaq-euq daefzir yur-eu laer dzurzaf-awr dawqluf-eu deuq, uiqler-awr bawqluf-eu mae.

¹¹ Aqyawfmaf aer-eu, “Miqyaer, aqyawf-anr byaerdzae-euq mae. Aqyawf-anr tae-awr nyaef-ir kar-eur. Aqjeq mirnae aernar-aq, aqyawf-anr bibuq-ir-eu tiqghaq-iq maqpar jawr mae.”

¹² Miqyaer-or! Ngaq-anr nae ghawqmanr-aer taq jawrkaq naeqlaf. Ngaq-euq Miqyaer-or! Ngaq-anr yawkawr-aer cawba le-awq.

¹³ Ngaq-euq daefzir-anr muir-eu deuq, Myavpyawq narmaer bicawv-ir-awr bi myeufanrjir luf-ur. Ngaq-anr lavtanq lavnar-eu laer pov-eu deuq, Dawqdoer bidaq-awr bi shafdawrsaef luf-ur.

¹⁴ Aerkhawf, ngar-aq, aqmyanluf nawq-anr noeqtmq ma. Ngar, ngaeq-aer nar-aq ngaeq-aer, nawq-anr jaceuq ma siq.

¹⁵ Ngaq-euq khaqmae, nan’ga-i nawq-euq tsaq-awr dawr-eu garkawv, Hawr-eu nawq-euq kakhof-eu jeq-euq garkawv ja ma. Aqjeq mirnae aernar-aq, garkawv heudeuq armyavni jav-eu, ngar maq siqnya nya.

¹⁶ Ngar, Sanqpaq Miqyaer pyeuf-eu Ya’we Miqyaer-euq ghaq-anr ghoe-awr daef ma. Nawr tsaq-awr dawr-eu garkawv ngar jagaq ma. Nawr tsaq-awr dawr-eu garkawv taef-aer ngar ja ma.

¹⁷ Miqyaer-or! Nyir ngae nae nawr, ngaq-anr maeqnaeq tsovnaeq laf-awr, Nawq nae mr-euq zanqler paq-aer ghae-eu gardeuq-anr, iqnan keuvni ngar dawqdzawr mrluf-eu ma.

¹⁸ Nymq-mr ngar mawqle-awr uqduq pyurle-euq mir-a. Nawq-euq ghaq-euq garkawv, ngar heuzir-anr maq dzawrnaeq ghaq-aer, Nawq-euq baoq-euq garkawv ngar, nanqshaev deuq dawqtawv luf-anr, Maq dzawrnaeq ghaq-euq khoerkeuvni, Miqyaer-or! Ngaq-anr taq byaerdzae naeqlaf.

¹⁹ Miqyaer-or! Nawq-euq yawtsaq yawdawr jeq, zawr-aer gor-awr, Huiq-eu gardeuq nawr mryaf-euq mae. Nawq-anr dur-eu tiqghaq-iq maqjawr-a.

²⁰ Nawr, ngaq-euq khoertav zawr-aer huiq-awr kan-eu shaqzanq nargawr bi keuvle-euq mae. Aerkhawf, nawr, ngaq-anr lavdaef naeqlaf-awr, Naf-eu shir-eu mirkhanq-anr nae par sheuqdov naeqlaf taef-a.

²¹ Nawr, ngaq-anr huiq-awr manr-eu jeq lanqnaeq laf-awr, Nawr, ngaq-anr yawqdzer dzaq-anr navluf nuima lavsar naeqlaf-euq mae.

²² Ngar, nawq-anr arcav tsof-eu keuka mui-awr jaceuq ma. Ngaq-euq Miqyaer-or! Nawr sarjax zif-eu gar ngar jaceuq ma. Irsaqleqlav-euq Yawshawr ghaq pyeuf-eu nawq-anr, Deur-mq cuq diq-awr jaceuq-eu cardawq car ma.

²³ Ngar, nawq-anr car-awr jaceuq ngae, Ngaq-euq maeqluq laqkhaq yawkhav-aer caer-awr; Nawq nae kakhof naeqlaf-euq ngaq-euq nuima saflar khawf laqkhaqcaer duidui taef-a.

²⁴ Ngaq-anr lavnar-eu laer pov-eu deuq-anr, myavpyawq narmaer bicawv-ir-awr, Shafdawr-eu jeq bi keuvle-euq mirnae, nawr tsaq-awr dawr-eu garkawv, Ngaq-euq maeqlar nan’ga-i jaceuq ma.