Jaceuq 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Bibuq-ir Naeqlaf Laer Shar-eu

Beqyaqmiq tsawrjeuq pyeuf-eu Kurshav-anr tafler-awr nae Ya’we Miqyaer-anr carnaeq-euq, Daqbir-euq Cirgayo

¹ Ngaq-euq Miqyaer pyeuf-eu Ya’we Miqyaer-or! Ngar, nawq-euq lafkhoer caevzaf ma. Ngaq-anr tae-eu tsawrhaq dawqtawv luf-anr nae bibuq-ir naeqlaf-awr, Ngaq-anr bidzeur-ir naeqlaf-awq.

² Maqngeur nar-aq, ngaq-anr bidzeur-ir naeqlaf-eu tiqghaq-iq maqjawr-aer, Aqyawfmaf, arlaqjaqshir lof-aer ngaq-anr gheupav gheushav-awr, caeqpyaq caeqsharjir naeqlaf taef-a.

³ Ngaq-euq Miqyaer pyeuf-eu Ya’we Miqyaer-or! Ngar heulof-aer mr-euq jav nar-aq, Ngar, ngaq-euq aqlaf nae lavlaeq lavca-euq law nar-aq,

⁴ Ngar dawqpae yawmuiq-aer jawrtaf luf-eu tiq ghaq-anr, Ngar yawdoer janrnaeq-euq jav-awr, tiqjeq-iq maqngeur-eu gar, ngaq-anr muir-eu tsawrhaq-anr nawqdzaq khavdzaq taq-euq jav nar-aq,

⁵ Ngaq-anr muir-eu tsawrhaq, ngaq-anr bi taemi-awr, ngaq-anr bi ghaqlar-eu uqtaf, Ngaq-euq daefzir mirtsaq-anr bi nawqpanq-awr, Ngaq-euq khanqsaer khaqlaer-euq lafkhoer bi gayaf luf-ur. Sela.

⁶ Ya’we Miqyaer-or! Nawr nuima paer-eu lafkhoer tsawqtur-awr, Ngaq-anr muir-eu deuq paerpaer-aer teuvluf-eu gar, nawr yawfdaq naeqlaf-awq. Ngaq-euq gharduq turlar-awr, dawq bif-eu lafkhoer yarkhaq dar-awq.

⁷ Tsawrhaqzaq uiqlar-awr, nawq-euq tiqjawq jawrjawqlar taef-a. Khoermirnae, aqyawf maf-euq gharduq, yawgor-anr ghofdav ler-awr uvlanr-awq.

⁸ Ya’we Miqyaer, tsawrhaqzaq-anr, yarkhaqdar taef-a. Ya’we Miqyaer-or! Ngar tsaq-awr dawr-eu gar hawr-eu, Ngaq-euq lafkhoer anr-eu muiq-awr dawr-eu gar haw-awr, Ngaq-anr yarkhaq darnaeq laf-awq.

⁹ Tsawrcawv-euq yawdoer jeq arsaq bisaq-awr, Dawr-awr tsaq-eu deuq-anr lavzif naeq-awq. Aqjeq mirnae aernar-aq, tsaq-awr dawr-eu Miqyaer-aq, nuima hawr-eu nuinoeq-anr tsermr haw-eu mae.

¹⁰ Ngaq-euq daeqdaqduq-aq, Miqyaer mae. Aqyawf, nuima dawrcoeni ghae-eu tsawrhaq-anr bibuq-ir-eu mae.

¹¹ Miqyaer-aq, yarkhaq dawrcoeni dar-awr; Miqyaer, nan-anr nae tsawrcawv-anr nuima paer-eu mae.

¹² Aqyawf maq noeqpar nar-aq, Miqyaer micaer siqtav taq-awr, Kav ngofdav-awr lofluf-eu mae.

¹³ Miqyaer, aqyawf-anr saef-eu keuka laeqhmq taq-awr, Miqdzaq dof-eu kavmyaq janrtaq-euq mae.

¹⁴ Tsawrcawv yawlaeq yawca jeq bawdov lef-eu gar hawsher-eq. Aqyawf, gardzaq garkawv tsaevler-awr, maqtsaq maqdawr-eu jaqmyawf bawdov lef-eu mae.

¹⁵ Aqyawf duqkhawf khawf-awr duqkhanq duq-eu mae. Khoernar-aq, yawqha nae duq-euq duqkhanq-anr, yawqha ga’anr ghae-euq mae.

¹⁶ Aqyawf nae lavdov-euq gardzaq garkawv, aqyawf-euq uqduq-anr gadavkhof le-awr, Aqyawf nae coeqler deuqler paq-aer mr-euq jeq aqyawf-euq uqduqkhmq-euq khoertav keuvle taef-a.

¹⁷ Ya’we Miqyaer tsaq-awr dawr-eu baqda’nae ngar jaceuq ma. Huiqdui gor duidui-eu Ya’we Miqyaer-euq tsawrmyanr-anr, ngar car-awr jaceuq ma.