Jaceuq 69 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-or! Ngaq-anr Bibuq-ir Naeqlaf

Car-eu paw sheuqghae-eu aqyuif ghaq-anr bofnaeq-euq, Kapaf aryaev kawqsheu, Daqbir-euq cardawq

¹ Miqyaer-or! Ngaq-anr bibuq-ir naeqlaf-awq! Aqjeq mirnae aernar-aq, ircuf, ngaq-euq kawqlanr-anr keuvni danqkeuvlar taq-euq mae.

² Ngar, nawqtaeqduq maqjav-eu lan’yaq yawnaf-anr ga’nuif-ir luf mir-a, Ngar, ircuf yawnaf-anr urlar taq-awr, ircuf, ngaq-anr danqpymqlar luf-eu mae.

³ Ngar gurgur-aer ngoer-euq mirnae ghaq baq-ir-awr, Ngaq-euq kuqbyanq guicorni ghae-ir taq-euq mir-a. Ngaq-euq myavnuiv, ngaq-euq Miqyaer-anr dawq-eu gar ghaq baq-ir-euq mir-a.

⁴ Tiqjeq-iq maqngeur-eu gar, ngaq-anr byae-eu tsawrhaq deuq, Ngaq-euq uqduq tsaerkanr myavmaqtser myaq-eu mae. Tiqjeq-iq maqngeur-eu gar, ngaq-anr muir-eu deuq, aqyawfmaf ghaq khav-awr, Ngaq-anr lavcawv-eu laer ghae-eu mae. Ngaq nae maqkhoeq-euq jeq-anr, ngar ya tsoeqkhof naeq-eu mae.

⁵ Miqyaer-or! Ngaq-euq iqbax nawq-anr nae maq zaftaq nya-a. Nawr, ngaq-euq yawdzawq yawgan siqnya-eu mae.

⁶ Sanqpaq Miqyaer pyeuf-eu Guirmaf-euq Ya’we Miqyaer-or, Ngaq-euq baqda’nae, nawq-anr dawqluf-eu deuq-anr, Shafdawr-eu jeq taqbi keuvle naeqlaf. Irsaqleqlav-euq Miqyaer-or! Ngaq-euq baqda’nae, Nawq-anr povluf-eu deuq-anr myavpyawq narmaer cawv-eu jeq taqbi pyeuf-ir.

⁷ Ngar, nawq-euq gharduq dawqdoer daq-awr, Ngaq-euq myavpyawq-aq, daqga-eu jeq nae daeqkaq taq-euq ma.

⁸ Ngar, ngaq-euq maernmr deuq naeq-aer, Maqsiq maqsux-eu tsawrhaq lof-aer jawr-awr, Ngaqma-euq zaqdeuq naeq-aer boermiq siqkhaq lof-aer daefluf-eu ma.

⁹ Ngar, nawq-euq nymr-anr nuima keuv duidui-eu mirnae, ngaq-anr ur gawrlar luf-eu nya, Aqcawq, nawq-anr yaeqbawq-aer aer-euq dawq khoerdeuq dawqtawvluf, ngaq-anr gadavle taq-euq mae.

¹⁰ Ngar ngoer-awr, dzardzaq sheuq-awr ngaq-euq nuima saflar-anr maeqparluf ngae, Aqcawq, ngaq-anr dawqdoer aerlar-eu mae.

¹¹ Ngar, guqdar paerzeur-euq maeqtsoeq dm ngae, Ngar, aqcawq dawqdaq daqduq pyeuflar taq-euq mae.

¹² Lanrkhaeq-anr nuir-eu deuq, ngaq-anr muir-eu jeq ngaeq-awr, Ngar, jirbaq dawryaef-eu deuq-euq cardawq pyeuflar taq-euq mae.

¹³ Aerkhawf, Ya’we Miqyaer-or! Aryamq tsaq ngae, Ngar, nawq-anr guiqlanq shar-eu ma. Miqyaer-or! Nawr ghawqshaq gaq-eu jeq myaq duidui-eu lafkhoer, Nawq-euq kakhof-eu jeq-euq yawtsaq yawdawr-euq lafkhoer, Ngaq-anr narhaq naeqlaf-awq.

¹⁴ Lan’yaq-anr maqbi ga’nuifni, ngaq-anr bibuq-ir naeqlaf-awq. Ircuf yawnaf-anr nae hawr-eu ngaq-anr byae-eu deuq-anr nae, Ngaq-anr bibuq-ir naeqlaf-awq.

¹⁵ Tanqghae lef-eu irjeuq nae, ngaq-anr taqbi danqpymq naeqlaf. Yawnaf nae khawf, ngaq-anr taqbi myeufanr naeqlaf. Mirtsaq duqkhanq-euq khaqmae, ngaq-euq khoertav taqbi piqtaeq naeqlaf.

¹⁶ Ya’we Miqyaer-or! Nawq-euq ghoer-awr gaq-eu jeq muiq-eu mirnae, Ngaq-anr narhaq naeqlaf-awq. Nawq-euq nanqyuni ghae-eu zawr-aer myaq-eu ghawqshaq gaq-eu jeq-euq baqda’nae, Ngar jawr-eu paw ciqpyawr lef-awq.

¹⁷ Nawq-euq kuirlaf zaqkhav-anr nae, nawq-euq myavpyawq taq ciqzaf naeqlaf. Ngaq-anr gardzaq garkawv keuvle taq-euq mirnae, Ngaq-anr yawkawr-aer narhaq naeqlaf-awq.

¹⁸ Ngaq-euq nuima saflar-euq dawqpae oe-awr nae kakhof naeqlaf-awq. Ngaq-anr muir-eu deuq-anr nae bibuq-ir naeqlaf-awq.

¹⁹ Ngar dawqdoer yadaq-awr ya shafdawr-euq gar, Hawr-eu ngar daq yaga-euq gar nawr siqnya-eu mae. Ngaq-anr muir-eu deuq dawqtawvluf, nawq-euq maeqshi jawrluf-eu mae.

²⁰ Dawqdoer ngaq-euq nuima-anr lavcawv-awr, Kantuivni ghae-eu jeq ngaq-euq lafkhoer byanluf mir-a. Ngaq-anr ghawqshaq gaq-awr nuima lavsar naeqlaf-eu, Tiqghaqnav jawr nga laq laer pov ngae, Tiqghaq-iq maqjawr nga, tiqghaq-iq maq povmawr nya-a.

²¹ Ngar dzaq-eu gharduq, aqyawfmaf, ngaq-anr pyaqkuir bidzaq naeqlaf-awr, Ngar ircuf maef ngae, aqyawfmaf, ngaq-anr caermyawvni ghae-eu ircuf bidawr naeqlaf-euq mae.

²² Aqyawf maf-euq maeqshi shardanr taq-euq hawqje, Aqyawf maf-euq gharduq lanrju bipyeuf-ir luf-ur. Aqyawfmaf daefdzaq-eu jeq, aqyawf maf-euq gharduq lafpeu pyeuf-ir luf-ur.

²³ Aqyawfmaf maqbi mawrnya paq-aer, aqyawf maf-euq myavnuiv bizanr-ir-awr, Aqyawf maf-euq jof-anr aqmyanluf nyaenyae-aer bi ghaeluf-ur.

²⁴ Aqyawf maf-euq khoertav nawq-euq nuipaer shaevdav naeq-awq. Aqyawf maf-anr nawq-euq nuima paer duidui-eu jeq nae taemi-awq.

²⁵ Aqyawf maf-euq saeqghawv-euq lafkhoer tiqghaq-iq maqjawrni, Aqyawf maf-euq jawrduq jawrzar putsoeq bitsoeq-ir-awq.

²⁶ Aqjeq mirnae aernar-aq, nawq nae diq-euq tsawrhaq-anr, Aqyawfmaf khaeqnaeq-awr, Nawq nae lavnar naeq-euq tsawrhaq ghawqshaq-aer ghae-eu garkawv, Aqyawfmaf ja-eu mae.

²⁷ Aqyawf maf-euq yawlaeq yawca-anr yawlaeq yawca lanq naeq-awr, Aqyawf maf-anr nawq-euq tsaq-awr dawr-eu lafkhoer taqbi urlar.

²⁸ Aqyawf maf-anr daef-eu deuq-euq tsawrmyanr-euq sanqbof-anr nae sivdzae naeq-awr, Tsaq-awr dawr-eu tsawrhaq-euq tsawrmyanr naeq-aer taq boftaq.

²⁹ Aerkhawf, ngar-aq, irshaq shaq-awr ghawqshar shaq-aer mir-a. Miqyaer-or! Nawq-euq kakhof-eu jeq nae ngaq-anr yawgor-anr ciqtaq naeqlaf-awq.

³⁰ Ngar cardawq car-awr, Miqyaer-euq tsawrmyanr-anr jaceuq ma. Aqyawf-euq guiqlanq-anr jaceuq-eu lafkhoer, aqyawf-anr ciqhuiq ciqmanr ma.

³¹ Heulof-aer janr-eu-aq, uqcoer hawr-eu kuirsaeq tsof-eu mawrner mawrgaw lawrnaeq-eu navmaqtser, Ya’we Miqyaer nuikhanr shirdzaeq-eu mae.

³² Nuinanq nuiyu anr-eu deuq, heu-anr ya’mawr-awr laqkhaqcaer taef-a. Miqyaer-anr pov-eu nawmaf-euq nuima khawf, par daeflar taef-a.

³³ Aqjeq mirnae aernar-aq, Ya’we Miqyaer, irshaqzaq-anr narhaq-awr, Aqyawf, kuv-euq lafkhoer urluf-eu aqyawf-euq tsawrhaq-anr maq hawdoer-a.

³⁴ Mq hawr-eu mirtsaq tanqkhawr-or! Miqyaer-anr jaceuq-awq. Iqmalavshav hawr-eu lafkhoer luvlav mrluf-eu yawqjeq navluf, aqyawf-anr jaceuq-awq.

³⁵ Aqjeq mirnae aernar-aq, Miqyaer, Ziroq-anr bibuq-ir-awr, Yurdav-euq meuqdeuq tsovnaeq taef-a. Aqyawfmaf khoergar yajawr-awr mirkhanq khoer aqyawf maf-euq pyeuf taef-a.

³⁶ Aqyawf-euq kuirlaf zaqkhav deuq-euq zaqdeuq uvdeuq khawf, Mirkhanq khoerkhanq-anr jeqbir lof-aer za-awr, Aqyawf-euq tsawrmyanr-anr gaq-eu tsawrhaq deuq, khoergar yajawr taef-a.