Jaceuq 68 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaqler-eu Cardawq

Car-eu paw sheuqghae-eu aqyuif ghaq-anr bofnaeq-euq, Daqbir-euq dawqcar cardawq

¹ Miqyaer turlar-awr, aqyawf-anr muir-eu deuq bi caevbyavjir luf-ur; Aqyawf-anr byae-eu deuq khawf, aqyawf-euq maeqshi nae caevbyovjir luf-ur.

² Uqkhoeq bawbyov ghae-eu lof-aer, Aqyawf maf-anr taebyov dzae-eu mae. Miqdzaq-euq maeqshi byaqshanq guir-ir-eu lof-aer, Miqyaer-euq maeqshi, tsawrcawv deuq bicawv-ir-awq.

³ Aerkhawf, tsaq-awr dawr-eu tsawrhaq deuq-anr bi lurgha bi caergha-awq; Aqyawf maf-anr Miqyaer-euq maeqshi laqkhaq bicaer-awq. Aqyawf maf-anr laqkhaq yawkhav-aer bicaer-awq.

⁴ Miqyaer-anr carnaeq-awq. Aqyawf-euq tsawrmyanr-anr car-awr jaceuq-awq. Mqdmr-anr dziq-awr can-eu ghaq-anr ciqhuiq ciqmanr-awq. Aqyawf-euq tsawrmyanr-aq, Ya’we Miqyaer laer mae. Aqyawf-euq maeqshi laqkhaq caer-awq.

⁵ Aqyawf-euq shawr-eu jawrduq-anr jawr-eu Miqyaer-aq, Aqda maqbaw-eu murcoeq aqnmr deuq-anr aqda pyeufnaeq-awr, Miqcoeq miqma deuq-anr hawpir naeq-eu ghaq pyeuf-eu mae.

⁶ Miqyaer, yawqha tiq ghaq taef-aer jawr-eu tsawrhaq-anr nymrjir bi bawlar-awr, Shmrcav nae bi paftawf taq-euq deuq-anr, Muiq-awr sanr-eu jawrduq-anr sheuqdov naeq-eu mae. Aerkhawf, puiq-eu tsawrhaq-anr-aq, Guicorni ghae-eu mirtsaq-anr bijawr-eu mae.

⁷ Miqyaer-or! Nawr, nawq-euq tsawrhaq deuq-euq maeqhu dov-ir-awr, Nawr, bawrtsanq bawrdanr-anr cantsaev ghaeluf-eu mae. Sela.

⁸ Khoerngae, Miqyaer-euq maeqshi mirtsaq mirluv luvlar-awr, Mq khawf uqyaer shaevka lef-euq mae. Irsaqleqlav-euq Miqyaer pyeuf-eu Miqyaer-euq maeqshi, Sirnav gawqjawq nyinyi-aer ghaelar-euq mae.

⁹ Miqyaer-or! Nawr uqyaer yaerma bi yaerle-awr, Nawr, nawq-euq jeqbir-anr yawduq lavbaw-eu laer, Kovkavni ghae-awr ghaq baqluf-eu gar bi jmqlar-eu mae.

¹⁰ Nawq-euq tsawrhaq baqmaf khoergar jawr-eu mae; Miqyaer-or! Nawr, nawq-euq muiq-awr sanr-eu gar nae, Shaqzaq zanqzaq-anr bifnaeq-eu mae.

¹¹ Sanqpaq Miqyaer, dawq bifdov lef-euq, Tsawrhaq-euq baqmaf mafma dawq khoer dzawrgaq-eu mae.

¹² “Guirmaf-euq sanqpaq deuq caevbyovshaw, aqyawfmaf caevbyov ghae-awr; Irkanr jawr-eu zaqmiq aqbur deuq, guirdeuv deuvza-euq myawqganq birgeuf-eu mae.

¹³ Nawr, yawr yawrmaf-euq ghanrcae yufluf-eu khawf, Nawmaf-aq, guirnyiqni shuir yawtaq-awr, Mawrdo pyur yawtaq-euq khaqkhoeq-euq aqdanr lof-aer dur taef-a.”

¹⁴ Baoq huiq-eu ghaq, mirkhanq-euq sanqpaq deuq-anr taebyavnaeq ngae, Zaqlaqmoq gawqjawq-anr ngaer gale-euq gar dur taef-a.

¹⁵ Baqshaq gawqjawq-aq, Miqyaer-euq gawqjawq mae; Baqshaq gawqjawq, gawqdur ghawqmya dur dur-eu mae.

¹⁶ Gawqdur ghawqmya dur dur-eu gawqjawq-or, Nawr aqjeq ghae-eu myavnav navsaef-eu le? Gawqjawq heujawq-aq, Miqyaer jawrmawf-eu gawqjawq mae; Mqmaq maqbyav yarzir, Ya’we Miqyaer heu-euq lafkhoer jawr taef-a.

¹⁷ Miqyaer-euq manq lavlawq artanr armyaer lar byan-eu lafkhoer, Sanqpaq Miqyaer, Sirnav gawqjawq-anr jawr-euq lof-aer, Yawshawr jawrduq-anr jawrle taef-a.

¹⁸ Nawr yawgor-anr davler ngae, bi kalanr taq-euq deuq-anr sheuqdav lef-euq mae; Nawr, tsawrhaqzaq-euq ghanrcae nae lafsawq za-awr, Puiq-eu deuq-euq lafkhoer nae khawf za-euq mae. Miqyaer pyeuf-eu Ya’we Miqyaer khoergar jawr taef-a.

¹⁹ Sanqpaq Miqyaer-anr jaceuq ma. Aqyawf-aq, nan-anr nae aqdui-anr yawmuiq jeq tiqbyanni bifnaeq laf-awr, Miqyaer-aq, aqdui-anr kakhof-eu ghaq pyeuf-eu mae. Sela.

²⁰ Aqdui-euq Miqyaer-aq, kakhof-eu Miqyaer pyeuf-awr, Shir-eu jeq-anr nae bidzeur-ir-eu jeq-aq, Sanqpaq Miqyaer pyeuf-eu Ya’we Miqyaer-anr jav-eu mae.

²¹ Aerkhawf, Miqyaer, aqyawf-anr muir-eu tsawrhaq-euq uqduq-anr diqnar-awr, Yawqha-euq yawlaeq yawca-euq lafkhoer can’ghae luf-eu, Uqduq tsaerkanr ghawqmya’ni tsof-eu deuq-euq uqduq-anr khawf diqnarnaeq taef-a.

²² Sanqpaq Miqyaer aer-eu, “Ngar, aqyawf maf-anr Baqshaq meuq-anr nae sheuqkhof laf-awr, Ngar, aqyawf maf-anr naf-eu iqmalavshav-anr nae sheuqkhof dovlaf ma.

²³ Khoerngae, nawmaf-euq aqkuir, Nawmaf-anr muir-eu deuq-anr shiq-euq lafkhoer nawqpyaev ghae-awr, Nawmaf-euq aqkuiq-euq maeqlar khawf, aqyawf maf-euq baqda’nae shaqbymr of taef-a.”

²⁴ Miqyaer-or! Aqyawfmaf, nawq-euq baqmaf baqmur can-eu gar ya’mawr-euq mae; Ngaq-euq Sanqpaq, ngaq-euq Miqyaer-euq baqmaf baqmur shawr-eu jawrduq-anr can’urlef luf-eu mae.

²⁵ Cardawq car-eu deuq maeqhu paw can-awr, Tersar lavmanr-eu keuka lavmanr-eu deuq cantae luf-eu lafkhoer, Caexlaer civ-eu aqbur zaqguq deuq khawf keuq-eu mae.

²⁶ Irsaqleqlav-euq cuq-anr nae dovlar-euq deuq-or! Tsawrhaq baqmaf uiqler-awr jawr-eu gar Miqyaer pyeuf-eu Ya’we Miqyaer-anr jaceuq-awq.

²⁷ Aqcawq taf-aer nyir-eu Beqyaqmiq, aqyawf maf-anr sheuqghae-awr, Aqyawf maf-euq baqmaf naeq-aer Yurdav-euq dzoeqda deuq canluf-eu uqtaf, Zeqbuqlur hawr-eu Naqtaqlir-euq dzoeqda deuq khawf canluf-eu mae.

²⁸ Nawq-euq Miqyaer, nawq-euq ghaq-anr khaer-euq mae; Miqyaer-or! Dzeurlaf ngae nawq nae nga’maf-euq gharduq mr-euq lof-aer, Ghaq bimawr naeqlaf-awq.

²⁹ Yeqlursaqlaeq-anr jav-eu nawq-euq uqduq tanqnymr nymrma-euq baqda’nae, Sanqpaq deuq, nawq-anr lafsawq damqnaeqlar taef-a.

³⁰ Artof yar-anr jawr-eu bawrtsanq-euq jeqzaq yawghae-anr lmqguv naeq-awr, Mawrnerzaq sheuq-awr can-eu mawrgaw baqmaf-anr dur-eu, Tsawrjeuq khoerdeuq-anr khawf lmqguv naeq-awq. Aqcawq-anr pyur tafdzaq mawf-eu deuq-anr aqkuir-euq uqmov nawqpyaev naeq-awr, Guirdeuv deuv-eu gar laqkhaq caer-eu tsawrhaq deuq-anr taebyav naeq-awq.

³¹ Irjirtuv-anr nae danzar dovlar-awr, Eqtiqorpir tsawrjeuq yawkawr-aer Miqyaer-anr aqlaf cawqja dovlaf taef-a.

³² Mirtsaq tanqkhawr-euq mirkhanq deuq, Miqyaer-anr carnaeq-awq. Or-oq, cardawq car-awr, Sanqpaq Miqyaer-anr jaceuq-awq. Sela.

³³ Arhuba nae mqdeuq-euq mq-euq khoertav dziqluf-eu ghaq-anr jaceuq-awq. Hawsher-eq, aqyawf, baoq huiq-eu tersar, aqyawf-euq tersar bi dovle-eu mae.

³⁴ Miqyaer-euq ghaq-euq garkawv dzawrgaq-awq. Aqyawf-euq khanqsaer Irsaqleqlav-euq khoertav jav-eu mae. Aqyawf-euq ghaq-aq, mqdmr-euq lafkhoer anr-eu mae.

³⁵ Miqyaer-or! Nawr-aq, nawq-euq shawr-eu jawrduq deuq navmaqtser, Yawzeu bawlar paq-aer ghae-eu mae. Irsaqleqlav-euq Miqyaer-aq, aqyawf-euq tsawrhaq-anr, Ghaq hawr-eu baoq bifnaeq-eu mae. Miqyaer-anr jaceuq-awq!