Jaceuq 65 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq-anr Noeqkeuv-awr Jaceuq-eu

Car-eu paw sheuqghae-eu aqyuif ghaq-anr bofnaeq-euq, Daqbir-euq dawqcar cardawq

¹ Miqyaer-or! Ziroq-euq lafkhoer jaceuq-eu jeq, nawq-anr dawqluf-eu mae; Kamqtaq-euq jeq, nawq-anr mrbyannaeq taef-a.

² Guiqlanq shar-eu gar narhaq luf-eu ghaq-or, Shiqshaq dawqtawvluf nawr jawr-eu gar lar taef-a.

³ Yawlaeq yawca ngaq-anr ghaqlarluf ngae, Nawr, nga’maf-euq yawbanq yawlaeq-euq gharduq, Lawrdan-eu jeq laeqhmq naeqlaf-euq mae.

⁴ Nawq-euq dawqpae bilar-awr nawq-euq nymr-euq povka bijawr-eu laer, Nawq nae tserdov-euq tsawrhaq-aq, guiqlanq huiq-eu mae. Nga’maf, nawq-euq nymr hawr-eu nawq-euq shawr-eu uqduq tanqnymr nymrma-euq yawmuiq jeq-euq baqda’nae nuima tmqjawvni yaghae taef-a.

⁵ Nga’maf-anr kakhof-eu Miqyaer-or! Nawr tsaq-awr dawr-eu jeq-euq lafkhoer, Yawzeu bawlar paq-aer ghae-eu jeq mr-awr, nga’maf-anr aerkhof naeqlaf taef-a. Nawr-aq, mqdzer mirdzer-anr keuvni jawr-eu tsawrhaq deuq hawr-eu, Kaq-eu iqmalavshav-anr jawr-eu tsawrhaq dawqtawvluf noeqtmqduq pyeuf-eu mae.

⁶ Aqyawf-euq ghaq nae gawqjawq deuq-anr ciqtsaq taq-awr, baoq bidm-euq mae.

⁷ Nawr, iqmalavshav ircuf manr-eu tersar, irluv dzae-eu tersar hawr-eu, Tsawrhaqzaq luiqgha-eu tersar-anr ciqcurni bi naqler nya-eu mae.

⁸ Nawq-euq bisiq bimawr-eu jeq-anr, Kaq duidui-eu gar jawr-eu tsawrhaq deuq guv-ir-eu mae. Uqbya byalar-awr, uqcif cifle ngae, nawr, laqkhaq bicaer-eu mae.

⁹ Nawr, mirtsaq-anr hawle-awr ircuf shaeqnaeq-eu mae. Miqyaer-euq lawrgawv ircuf tiqbyanni yoer-awr, Nawr, mirtsaq-anr yawkhav-aer bimuiq bi sanrlar-eu mae. Nawr, aqyawf maf-anr dzaqla ghovcaer zanqnaeq-eu mae. Nawr heulof-aer laeqhmq naeqlaf-eu mae.

¹⁰ Nawr tsaeqtaq-euq daeyar-anr uqyaer bi daenyif-awr, Nawr, mirtsaq lavdi-eu mae; Nawr, mirtsaq-anr uqyaer bi daenanq-awr, Nawr, dawq ngaeqghae naeq-awr, sanqlanq ghawqdar bi daeflar-eu mae.

¹¹ Nawr, arkhof arla-anr nawq-euq yawmuiq jeq bipi-awr, Nawq-euq cankawv-anr bawle zale-eu jeq bi yoerkhar luf-eu mae.

¹² Bawrtsanq bawrdanr-euq yarmof daega-anr yoerkeuv luf-awr, Gawqdur durzaq-euq baqgha tiqjawq laqkhaq caer-eu jeq byanluf-eu mae.

¹³ Yarmof-euq daega-anr yawrdeuq jawrbyan taq-awr, Ghaqlawq-anr-aq, sanqlanqdar tiqbyanni daefluf-eu mae. Aqyawfmaf laqkhaq caer-awr gur-eu lafkhoer, dawqcar khawf carluf-eu mae.