Jaceuq 64 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-euq Daefzir-anr Hawpir Naeqlaf

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Miqyaer-or! Ngar dzardziv dziv-eu lafkhoer, Ngaq-euq tersar-anr narhaq naeqlaf-awq; Ngaq-anr muir-eu tsawrhaq deuq-anr guv-eu jeq-anr nae, Ngaq-euq daefzir-anr hawpir naeqlaf-awq.

² Tsawrdoer deuq bawqkhoeq luf-eu jeq-anr nae, Hawr-eu yawlaeq yawca jeq mr-eu deuq luiqgha-eu gar nae, Ngaq-anr sheuqzaf naeqlaf-awq.

³ Aqyawf maf-euq maeqlar-aq, micaer lof-aer siqtav taq-awr, Aqyawf maf-euq kav ngofdav-awr kavmyaq beuvghae lef-eu lof-aer, Nuima baw-eu dawq dovle-eu mae.

⁴ Aqyawfmaf, dzurzaf-awr tiqjeq-iq maqlaeq-eu tsawrhaq-anr beuv-eu mae; Aqyawfmaf maqguvni, aqyawf-anr yawkawr-aer beuv-eu mae.

⁵ Aqyawfmaf yawdoer jeq mr-eu gharduq tiqghaq tirghaq, ghaq bif-awr; Aqyawfmaf, yawzaf zaf-aer lanrju khmr-eu garkawv ja-eu mae; Aqyawfmaf aer-eu, “Heudeuq-anr aqsur ghaq mawrnya-eu?”

⁶ Aqyawfmaf yawlaeq jeq tov-awr aer-eu, “Aqdui maf-euq bawqtov-aq, aerkhar maqza-eu bawqtov mae.” Tsawrhaq-euq nuima hawr-eu lafkhoer paw-euq nuinoeq, Heu nyiq jeqluf yawnaf mae.

⁷ Aerkhawf, Miqyaer, aqyawf maf-anr kavmyaq nae beuv taef-a; Aqyawfmaf, tiqpov taef-aer yabi beuvnar taef-a.

⁸ Aqyawf, aqyawf maf-anr yawqha-euq maeqlar-euq baqda’nae sanqtif bitif taef-a. Aqyawf maf-anr kharmawr-eu tsawrhaq caevbyovjir taef-a.

⁹ Tsawrhaq dawqtawvluf yaguv-ir taef-a. Aqyawfmaf, Miqyaer nae mr-euq garkawv, tsawrganr zmq-awr sharnoeq-eu mirnae, Aqyawf-euq gar-euq garkawv dawqdzawr mr taef-a.

¹⁰ Tsaq-awr dawr-eu tsawrhaq-aq, Ya’we Miqyaer-euq lafkhoer, Laqkhaq caer-awr, aqyawf-anr ghoe taef-a. Nuima-euq lafkhoer dawrcoeni ghae-eu tsawrhaq dawqtawvluf, Aqyawf-anr jaceuq taef-a.