Jaceuq 63 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer Naeq-aer Cawq Cawqmawf-eu

Daqbir, Yurdav-euq bawrtsanq bawrdanr-anr jawr ngae-euq, Daqbir-euq cardawq

¹ Miqyaer-or! Nawr-aq, ngaq-euq Miqyaer ma; Uqshawq yawnaf-aer ngar, nawq-anr pov-eu ma; Ngaq-euq nuima saflar, ircuf maef-eu lof-aer nawq-anr maef mir-a; Ircuf maqjav-aer guicorni ghae-ir taq-euq mirtsaq tiq tsanr ircuf maef-eu lof-aer, Ngaq-euq shiqshaq, nawq-anr za’mawf mir-a.

² Khoermirnae, ngar, nawq-euq shawr-eu jawrduq-euq lafkhoer, Nawq-euq baoq hawr-eu yawshaef khanqsaer-anr ya’mawrni, Ngar, nawq-anr povlar-euq ma.

³ Nawq-euq ghoer-awr gaq-eu jeq-aq, daefzir navmaqtser muiqdzaeq-eu mirnae, Ngaq-euq maeqluq, nawq-anr jaceuq ma.

⁴ Khoermirnae, ngar khardaef-eu tiqzir, nawq-anr jaceuq ma; Nawq-euq tsawrmyanr-euq uqmov, ngaq-euq aqlaf cawqdir ma.

⁵ Ngaq-euq nuima saflar, shaqtsur hawr-eu purnmf dzaqdaev-euq lof-aer, Tmqjawvni ghae-awr, laqkhaq caer-eu maeqluq nae, Ngaq-euq khaqmae, nawq-anr jaceuq ma.

⁶ Ngar yufzar-anr yufluf ngae, nawq-anr noeqmawr-euq ma. Uqcif mirlan-aer ngar, nawq-euq garkawv dzardziv dziv-euq ma.

⁷ Nawr, ngaq-anr cawba naeqlaf-euq mirnae, Ngar, nawq-euq aqdanr-euq narshmr-euq uqmov, laqkhaq caer-eu ma.

⁸ Ngaq-euq nuima saflar, nawq-euq narkhan dawqpae taeqni cantae luf-eu ma; Nawq-euq armar laf, ngaq-anr nyaeftaeq luf-eu mae.

⁹ Aerkhawf, ngaq-euq daefzir-anr lavcawv-eu laer pov-eu tsawrhaq deuq-aq, Mirtsaq-euq lafov paw ya’ur-ir taef-a.

¹⁰ Aqyawfmaf, micaer nae yacoq-ir taef-a; Aqyawfmaf, byaqhir-euq shaqbymr yapyeuf-ir taef-a.

¹¹ Aerkhawf, sanqpaq-aq, Miqyaer-euq lafkhoer laqkhaq yacaer taef-a; Aqyawf-anr ghoe-awr nae kamq-euq yawqghaq navluf, aqyawf-anr jaceuq taef-a; Aerkhawf, jaqmyawf myawf-eu jeq ngaeq-eu deuq-euq khaqmae-aq, ya naqlerjir taef-a.