Jaceuq 62 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ciqcurni Miqyaer-anr Dawq-eu

Car-eu paw sheuqghae-eu aqyuif ghaq-anr bofnaeq-euq, Yeqduqtur kawqsheu, Daqbir-euq cardawq

¹ Ngaq-euq nuima saflar ciqcurni Miqyaer-anr aqdir dawq ma; Ngaq-anr kakhof-eu jeq aqyawf-anr nae oe-eu mae.

² Aqyawf taef-aer ngaq-euq logur hawr-eu ngaq-anr kakhof-eu ghaq pyeuf-awr; Aqyawf, ngaq-anr deuvpir naeqlaf-eu ghaq pyeuf-eu mae; Ngar tiqpawf-iq nyinyi-aer maq ghaelar.

³ Nawmaf, tsawrhaq tiq ghaq-anr aqmyan keuvni cae-eu laer ghae-eu le? Nawmaf dawqtawvluf coq-ir luf-eu kmrcaer, Hawr-eu yawf-ir taq-euq lanr lof-aer yabi saefdzaejir taef-a.

⁴ Aqyawfmaf, aqyawf-anr yawgor artiv-anr nae taeka-eu laer taef-aer tov-awr; Aqyawfmaf jaqmyawf myawf-eu gar laqkhaq caer-eu mae; Aqyawf maf-euq khaqmae dawq ngaeqghae-eu khawf, Aqyawf maf-euq lafkhoer paw yaqkhaer yaq-eu mae. Sela.

⁵ Ngaq-euq nuima saflar ciqcurni, Miqyaer-anr taef-aer dawq ma. Aqjeq mirnae aernar-aq, ngar noeqtmq-eu jeq aqyawf-anr nae oe-eu mae.

⁶ Aqyawf taef-aer ngaq-euq logur hawr-eu ngaq-anr kakhof-eu ghaq pyeuf-awr; Aqyawf, ngaq-anr deuvpir naeqlaf-eu ghaq pyeuf-eu mae; Ngar, nyinyi-aer maq ghaelar.

⁷ Ngaq-anr kakhof-eu jeq hawr-eu ngaq-euq khanqsaer, Miqyaer-euq lafkhoer jav-eu mae. Ngaq-euq ghaq pyeuf-eu logur hawr-eu ngar caevzafduq, Miqyaer-euq lafkhoer jav-eu mae.

⁸ Miqyaer-aq, aqdui-euq caevzafduq pyeuf-eu mae; Nawmaf, tsawrhaqzaq-or! Nawmaf-euq nuima aqyawf-euq maeqshi shaevdov lef-awr; Aqmyanluf, aqyawf-anr ghoe-awq. Sela.

⁹ Aqdir nar-aq, teq-eu nyirzaq-aq, safkhoeq lof-aer dur-awr, Gor-eu huiqzaq khawf jaqmyawf lof-aer taef mae; Aqyawf maf-anr pavyawq nae savhaw ngae, Aqyawfmaf dawqtawvluf safkhoeq navmaqtser pyar-eu mae.

¹⁰ Nawqdzaq khavdzaq-euq jeq-anr taqghoe, Khoeqdzaq joedzaq-euq jeq-anr khawf taq noeqtmq; Nawq-euq pyurshuir myawqganq myaqlar ngae, Nawq-euq nuima khoerdeuq-anr taq noeqtsovtaq.

¹¹ Miqyaer tiq pov ngaeq-euq gar, ngar nyiq pov yagaq-euq ma; Baoq-aq Miqyaer-euq mae.

¹² Sanqpaq Miqyaer-or! Ghawqshaq gaq-eu jeq khawf nawq-euq mae; Aqjeq mirnae aernar-aq, nawr, tiqghaq sair tiqghaq-anr, Yawqha nae mrtaq-euq gar tsaqni mrpoeq lafsawq bif-eu mae.