Jaceuq 61 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Aqdanr-euq Uqmov Caevzaf-eu

Car-eu paw sheuqghae-eu aqyuif ghaq-anr bofnaeq-euq, arcav tsof-eu keuka zmq-eu, Daqbir-euq cardawq

¹ Miqyaer-or! Ngar gur-eu gar narhaq naeqlaf-awq; Ngaq-euq guiqlanq shardawq-anr narhaq naeqlaf-awq.

² Ngaq-euq nuima shaqzanq naf duidui-eu lafkhoer, Ngar mqdzer mirdzer jawr-awr nae nawq-anr gurgaq luf-eu ma; Ngar taf-aer gordzaeq-eu logur-anr, ngaq-anr sheuqghae naeqlaf-awq.

³ Aqjeq mirnae aernar-aq, nawr-aq, ngaq-euq caevzafduq pyeuf-awr; Ngaq-anr muir-eu deuq maq larkeuv nya-eu zifdanni ghae-eu lofpir-eu nymrgor pyeuf-eu mae.

⁴ Ngar, nawq-euq aqdanr-euq uqmov jav-eu caevzafduq-anr ghoe ma. Ngar, mqmaq maqbyav yarzir nawq-euq saeqghawv-euq lafkhoer jawr ma. Sela.

⁵ Aqjeq mirnae aernar-aq, Miqyaer-or! Nawr, ngaq nae kamq-euq dawq gaq-awr; Nawr, nawq-euq tsawrmyanr-anr guv-eu deuq-anr of-eu jeqbir, Ngaq-anr bifnaeq laf-euq mae.

⁶ Nawr, sanqpaq-euq daefzir zirlanq ka’naeq-awr, Aqyawf-euq arkhof arla ghawqmya zir bidaef taef-a.

⁷ Aqyawf, Miqyaer-euq maeqshi li-eu maqbawni jawr taef-a; Or-oq, yawtsaq yawdawr hawr-eu ghawqshaq gaq-eu jeq laeqhmq-awr aqyawf-anr hawpir naeq-awq.

⁸ Khoernar-aq, ngaq nae kamqtaq-euq lof-aer nan-anr nae mrcaw ngae, Ngar, nawq-euq tsawrmyanr-anr mqmaq maqbyav yarzir car-awr jaceuq ma.