Jaceuq 60 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nawq-euq Armar Laf Nae Kakhof Naeqlaf-awq

Car-eu paw sheuqghae-eu aqyuif ghaq-anr bofnaeq-euq, Kapaf aryaev-euq sarjax kawqsheu. Maeq-awr tsov-eu gharduq. Daqbir, Meqsoqpoqtaqmir hawr-eu Zorba-euq Surliv-anr deuv ngae, Yoraqbav par ghof-ir-awr Saqdeuf-euq ghaqlawq-anr, Eqdoq-euq tsawrhaq 12,000 ghaq saef ngae-euq, Daqbir-euq Mirtam

¹ Miqyaer-or! Nawr, nga’maf-anr nuikhanr maqshir-aer; Nawr, nga’maf-anr daepyavdzae naeqlaf-awr; Nawr, nga’maf-anr taedzae naeqlaf-euq mae. Or-oq, nga’maf-anr tiq pov lavmuiqkhof naeqlaf-awq.

² Nawr, mirtsaq tanqkhawr ngawqnyae-awr, Mirtsaq bi tsawqpav lar-euq mae; Mirtsaq nyaenyae-aer javluf-eu mirnae, Tsawqpav taq-euq lavmuiqkhof naeqlaf-awq.

³ Nawr, nawq-euq tsawrhaq-anr yawshaq jeq bimawr naeqlaf-euq mae; Nawr, nga’maf-anr yawbanq yawlanr-aer bi ghaelar-eu aqgaf dzaruir bidawr naeqlaf-euq mae.

⁴ Yawtsaq yawdawr-euq gharduq bi bafgor-eu laer; Nawr, nawq-anr guv-eu tsawrhaq deuq-anr, parloq parlaer bifnaeq taq-euq mae. Sela.

⁵ Nawr gaq-eu tsawrhaq yabuq-ir ni, Nga’maf-euq shardawq-anr narhaq naeqlaf-awr, Nawq-euq armar laf nae nga’maf-anr kakhof naeqlaf-awq.

⁶ Miqyaer shawr-eu lafkhoer heulof-aer aer-eu mae; “Ngar laqkhaq tiqcaer; Sheqkmq daeqbir naeq-awr, Surkov ghaqlawq dardza dza-awr birnaeq ma.

⁷ Girlav-aq, ngaq-euq ma; Maqnarseq khawf ngaq-euq ma; Erpaqleq-aq, ngaq-euq uqduq-euq gharduq guirdeuv deuv-eu uqkhov pyeuf-awr; Yurdav-aq, ngaq-euq zanrdawq bif-eu ghaq pyeuf-eu ma.

⁸ Aerkhawf, Mawrbav-aq, ngaq-euq ircuf oeqlanq pyeuf-awr, Ngaq-euq saeqnawv Eqdoq-anr dzaetaq-awr, Pirlirtiv-aq, ngar ghaqler-euq baqda’nae gur-awq.”

⁹ Ngaq-anr aqsur ghaq zifdanni ghae-eu meuq-anr sheuqghae naeqlaf nmr-mq? Ngaq-anr aqsur ghaq Eqdoq-anr sheuqghae naeqlaf nmr-mq?

¹⁰ Miqyaer-or! Nawr, nga’maf-anr taedzae naeqlaf-euq maqngeur lor? Miqyaer-or! Nawr, nga’maf-euq guirmaf naeq-aer maqdov-ir-euq maqngeur laq?

¹¹ Tsawrhaqzaq nae cawba-euq tiqjeq-iq gardanr maqtsoeq-eu mirnae; Nga’maf gardzaq garkawv javluf-eu gar cawba naeqlaf-awq.

¹² Miqyaer-anr ghoe-awr nae, aqdui khaqduqni guirdeuv deuv ma; Aqjeq mirnae aernar-aq, aqyawf, aqdui-anr muir-eu deuq-anr nawqpyaev taef-a.