Jaceuq 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guv-eu Jeq Keuvle Ngae Shar-eu

Car-eu paw sheuqghae-eu aqyuif ghaq-anr bofnaeq-euq, arcav tsof-eu keuka zmq-eu, yaef cav tsof-eu deur-mq cuq zmq-eu, Daqbir-euq cardawq

¹ Ya’we Miqyaer-or! Nawr nuima paer-eu lafkhoer, ngaq-anr taq maeqpar naeqlaf; Nawr nuima paer duidui ngae, ngaq-anr taqdaeq naeqlaf.

² Ya’we Miqyaer-or! Ngar, ghaq baqluf-eu mirnae, ngaq-anr ghawqshaq gaqnaeq laf-awq. Ya’we Miqyaer-or! Ngaq-euq shaqyoeq gan’gan-aer ghaeluf-eu mirnae, ngaq-anr lavsavtaq naeqlaf-awq.

³ Ngaq-euq nuima saflar shaqzanq naf duidui nya. Ya’we Miqyaer-or! Nawr aqmyan keuvni ghae-awr, ngaq-anr cawba-eu laer ghae-eu le?

⁴ Ya’we Miqyaer-or! Ghofle-awr ngaq-euq nuima saflar-anr bibuq-ir naeqlaf-awq. Nawr ghawqshaq gaq-eu jeq-euq baqda’nae, ngaq-anr bibuq-ir naeqlaf-awq.

⁵ Aqjeq mirnae aernar-aq, shir-eu jeq-euq lafkhoer, nawq-anr noeqmawr-eu jeq maqjav-a. Shir-eu mirkhanq-euq lafkhoer nawq-anr aqsur ghaq jaceuq-eu?

⁶ Ngar manrmanr-aer shaq-awr ghaqdoerdoer nya. Ngaq-euq yufduq mirlan-aer myavbir nae danqbyan jir-awr, Ngaq-euq myavbir nae yufzar-anr yoeraq jir-euq mae.

⁷ Ngaq-anr muir-eu tsawrhaq dawqtawv luf-euq baqda’nae, Ngaq-euq myavnuiv ngoerpuq ngoerlu jir-awr, Ngar nuima cawv-eu mirnae, ngaq-euq myavnuiv myavghaq baq-ir taq-euq mir-a.

⁸ Yawlaeq yawca kharmr-eu tsawrhaq deuq-or! Ngar jawr-eu gar nae dov-ir-awq. Aqjeq mirnae aernar-aq, ngaq nae ngoer-euq tersar, Ya’we Miqyaer-anr gaqkeuv ler-euq mae.

⁹ Ngaq-anr ghawqshaq gaqnaeqlaf laer shar-eu shardawq-anr, Ya’we Miqyaer narhaq naeqlaf-awr, Ngaq-euq guiqlanq shardawq-anr, Ya’we Miqyaer hageuf naeqlaf taef-a.

¹⁰ Ngaq-anr kharmuir-eu deuq, daq biga-ir-awr shaqzanq binaf duidui law; Aqyawfmaf ciqpyawrkhof ngae, myavnuiv tiq taev-euq lafkhoer, daqga-eu jeq ya’mawr taef-a.