Jaceuq 59 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Deuvpir Naeqlaf-eu Miqyaer

Car-eu paw sheuqghae-eu aqyuif ghaq-anr bofnaeq-euq, Taq lavcawv laer kur-eu kawqsheu. Sawrluv, Daqbir-anr saef-eu laer Daqbir-euq nymr-anr bihaw-ir ngae-euq, Daqbir-euq Mirtam

¹ Ngaq-euq Miqyaer-or! Ngaq-anr muir-eu deuq-anr nae bibuq-ir naeqlaf-awq. Tur-awr, ngaq-anr caelar-eu deuq-anr nae deuvpir naeqlaf-awq.

² Yawlaeq yawca mr-eu deuq-anr nae bibuq-ir naeqlaf-awr; Shiq maef-eu tsawrhaq deuq-anr nae, ngaq-anr kakhof naeqlaf-awq.

³ Aqyawfmaf, ngaq-euq daefzir yur-eu laer dzurzaf taq-euq mae. Ghaq khav-eu deuq gmler-awr ngaq-anr caelar luf-eu mae. Ya’we Miqyaer-or! Hawsher-eq, khoer-aq, ngaq-euq iqbax hawr-eu yawlaeq yawca-euq baqda’nae maqngeur-a.

⁴ Hawsher-eq, ngar yawlaeq jeq mrtaq-euq maqjav-eu gar, Aqyawfmaf, caevcaev-aer laeqhmq luf-eu mae. Tur-awr, ngaq-anr cawba naeqlaf-awq.

⁵ Khoermirnae, Guirmaf-euq Miqyaer pyeuf-eu Ya’we Miqyaer-or, Irsaqleqlav-euq Miqyaer, nawr turlar-awr tsawrjeuq tsawrca dawqtawv luf-anr darnaeq-awq; Sarjax maqzif-eu tsawrcawv-anr ghawqshaq taq gaqnaeq. Sela.

⁶ Aqyawfmaf uqcif uqtaw paw ghoflar-awr, Aqkuiq lof-aer lmqlmq-aer meuq-euq tiqjawq doeni can-eu mae.

⁷ Aqyawf maf-euq maeqluq-euq lafkhoer micaer anr-awr, Haeqsher-eq, aqyawf maf-euq khaqmae bufbuf-aer tor-eu mae; Aqyawfmaf aer-eu, “Aqsur ghaq gaqnya-eu?”

⁸ Aerkhawf, Ya’we Miqyaer-or! Nawr, aqyawf maf-anr uirnaeq taef-a; Nawr, tsawrjeuq tsawrca dawqtawv luf-anr uiryoer-eu mae.

⁹ Ngaq-euq ghaq pyeuf-eu ghaq-or! Ngar, nawq-anr dawq ma; Aqjeq mirnae aernar-aq, Miqyaer-aq, ngaq-anr deuvpir naeqlaf-eu ghaq mae.

¹⁰ Ngaq-euq Miqyaer, ngaq-anr ghawqshaq gaq-awr, ngar jawr-eu gar oe taef-a. Miqyaer, ngar geufmawf-eu lof-aer, ngaq-anr muir-eu deuq-euq khoertav keuvle-eu gar bimawr naeqlaf taef-a.

¹¹ Ngaqha-euq daeqdaqduq pyeuf-eu Sanqpaq Miqyaer-or! Aqyawf maf-anr taqsaef, ngaq-euq tsawrhaq, aqyawf maf-anr ngaer-eu baw-mr; Nawq-euq baoq nae, aqyawf maf-anr gheuka-awr taebyavjir naeq-awq.

¹² Aqyawf maf-euq maeqluq-euq dawq hawr-eu aqyawf maf-euq khaqmae-euq iqbax-euq baqda’nae, Hawr-eu aqyawfmaf ngaeq ngae, yaqkhaer yaq-awr jaqmyawf myawf-eu mirnae; Aqyawf maf-anr yawqha nuima huiq-eu jeq-anr bi pafler-awq.

¹³ Nuima paer-eu lafkhoer aqyawf maf-anr puivdzaqjir naeq-awq; Aqyawf maf-anr maqbi dzerlarni puivdzaqjir naeq-awq. Khoerngae, Miqyaer-aq, Yaqkov-anr mqdzer mirdzer-anr keuvni uvlanr luf-eu nga laer aqyawf maf-anr bi siqnya-awq. Sela.

¹⁴ Aqyawfmaf uqcif uqtaw paw ghoflar-awr, Aqkuiq lof-aer lmqlmq-aer meuq-euq tiqjawq doeni can-eu mae.

¹⁵ Aqyawfmaf tsawqtoeq tsawqdav doedoe-aer dzaq-eu jeq povdzaq luf-eu, Aqyawfmaf maqya dzaqdaev-euq nar-aq, lmqlmq-aer can-eu mae.

¹⁶ Aerkhawf, ngar, nawq-euq baoq-euq garkawv car ma; Uqshawq paw, ngar, nawq-euq ghawqshaq gaq-eu garkawv gurgur-aer car ma. Aqjeq mirnae aernar-aq, nawr, ngaq-anr deuvpir naeqlaf-euq ghaq pyeuf-awr, Ngaq-anr gardzaq garkawv keuvle-euq arnan-anr caevzafduq pyeufnaeq laf-euq mae.

¹⁷ Ngaq-euq ghaq pyeuf-eu ghaq-or! Ngar car-awr nawq-anr jaceuq ma; Aqjeq mirnae aernar-aq, Miqyaer-aq, ngaq-anr deuvpir naeqlaf-eu ghaq pyeuf-awr; Ngaq-anr ghawqshaq gaq-eu Miqyaer mae.