Jaceuq 58 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrcawv-anr Yarkhaq Dar-eu

Car-eu paw sheuqghae-eu aqyuif ghaq-anr bofnaeq-euq, Taq lavcawv laer kur-eu kawqsheu. Daqbir-euq Mirtam

¹ Nawmaf ciqcurni jawr-eu deuq-or, Nawmaf tsaq-awr dawr-eu jeq aqdir ngaeqluf-eu ma lor? Nawmaf, tsawrhaq-euq zaqdeuq yarkhaq dawrcoeni darluf ma laq?

² Maqngeur-a. Nawmaf-euq nuima-euq lafkhoer maqtsaq maqdawr-eu jeq mr-eu laer sharnoeq luf-awr, Nawmaf-euq aqlaf, mirtsaq-euq khoertav coeqler deuqler-eu jeq savnaeq luf-eu mae.

³ Tsawrcawv-aq, zaq-euq jawrzar-anr nae dovle-euq naeq-aer garbanq banq-ir-awr; Aqyawfmaf daefle-euq naeq-aer canbanq ghae-awr jaqmyawf myawf-eu mae.

⁴ Aqyawf maf-euq dof-aq, arlawr-euq dof-anr dur-awr; Aqyawfmaf, arlawr uirnav naqbawq lof-aer, Naqbawr paftsoeq tsoeqtaq-euq mae.

⁵ Mawloq loq-awr arlawr-anr kurnya-eu deuq, mawloq yawmuiq-aer loq-awr, Kur-eu tersar-anr maq gaqnya-eu gar dur-eu mae.

⁶ Miqyaer-or! Aqyawf maf-euq khaqmae-euq seuq daeka naeq-awr; Ya’we Miqyaer-or! Arlaqjaqshir zaqguq-euq juir ngawqjuv naeq-awq.

⁷ Ircuf yoerbyov-eu lof-aer aqyawf maf-anr bi yoerbyov ghae-awr; Aqyawf, kav ngofdav ngae, aqyawf-euq kavmyaq bi deuvtsaevjir law.

⁸ Aqyawfmaf canluf ngae, guirbyov jir-eu aqnyov lof-aer bipyeuf-awr; Zaqmiq aqbur-anr nae yawshir-aer daefdov le-awr, Nanrma-anr maqya mawr-eu zaqnanq-anr bidur law.

⁹ Aqgan-anr dof-eu miqdzaq, oeqlanq-anr lanrler-eu maqdan-eu minav-aer, Aqyawf, nuima paer duidui-eu lafkhoer, Jaqlaer laerzeuv nae bawbyov ghae-eu lof-aer bawbyovghae taef-a.

¹⁰ Tsaq-awr dawr-eu tsawrhaq heulof-aer janrkhof naeq-eu gar ya’mawr ngae laqkhaqcaer taef-a; Aqyawf, aqyawf-euq aqkuir-anr tsawrcawv deuq-euq shiq nae lavshawr taef-a.

¹¹ Khoer-euq baqda’nae, tsawrhaqzaq heulof-aer aer taef-a, “Tsaq-awr dawr-eu tsawrhaq deuq-euq gharduq, aqdir mrpoeq lafsawq jav-eu ngar-a; Mirtsaq tanqkhawr-anr yarkhaq dar-eu Miqyaer aqdir jawr-eu ngar-a.”