Jaceuq 57 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-euq Nuima Yawzif Ma

Car-eu paw sheuqghae-eu aqyuif ghaq-anr bofnaeq-euq, Taq lavcawv laer kur-eu kawqsheu. Daqbir, Sawrluv taelar-eu mirnae, khaqlo boe-anr caevjawrler ngae-euq, Daqbir-euq Mirtam

¹ Miqyaer-or! Ngaq-anr ghawqshaq gaqnaeq laf-awq! Ngaq-euq nuima saflar, nawq-anr ghoe-eu mirnae, Ngaq-anr ghawqshaq gaqnaeq laf-awq! Lavbyov lavbyav-eu jeq maqdzeur-ir-euq khoerkeuvni, Ngar, nawq-euq aqdanr narshmr-euq uqmov caevzaflar ma.

² Ngaq-euq gharduq yawqjeq navluf janrnaeq laf-eu Miqyaer-anr, Gor duidui-eu Miqyaer-anr ngar gurgaq ma.

³ Miqyaer, ghawqshaq gaq-eu jeq hawr-eu yawtsaq yawdawr jeq khaerghaelef taef-a; Aqyawf, ngaq-anr bibuq-ir-eu jeq mq-euq khoertav nae bi’oe-awr; Aqyawf, ngaq-anr myeufanr-eu laer ghae-eu tsawrhaq-anr aerdoernaeq taef-a. Sela.

⁴ Ngaq-euq nuima saflar-aq, arlaqjaqshir-euq ghanrcae jav-awr; Ngar, miqdzaq dof-eu tsawrhaq-euq zaqdeuq-euq ghanrcae yufluf mir-a; Aqyawf maf-euq seuq-aq, ganq hawr-eu kavmyaq-anr dur-awr, Aqyawf maf-euq maeqlar-aq, tav duidui-eu micaer-anr dur-eu mae.

⁵ Miqyaer-or! Nawq-anr mq taf-aer ciqpoeq ciqgor ma; Nawq-euq yawshaef khanqsaer mirtsaq tanqkhawr doeni bi byale-awq.

⁶ Aqyawfmaf, ngaq-euq aqkuir-anr bawghaf khmrtaq-euq mae; Ngaq-euq nuima saflar awbyav-awr; Aqyawfmaf, ngaq-euq garma-anr shaqduq duqtaq-euq mae; Aerkhawf, aqyawfmaf, yawqha nae duq-euq gar yawqha ga’anr-euq mae. Sela.

⁷ Ngaq-euq nuima yawzif ma, Miqyaer-or! Ngaq-euq nuima yawzif ma. Ngar, car-awr nae jaceuq ma.

⁸ Ngaq-euq khanqsaer-or! Noeqlar-awq! Tser cav tsof-eu deur-mq ma hawr-eu deur-mq cuq-or! Noeqlar-awq! Ngar, mqbya byataw-anr lavnoeq ma.

⁹ Sanqpaq Miqyaer-or! Tsawrhaqzaq-euq ghanrcae, ngar, nawq-anr jaceuq ma. Tsawrjeuq tsawrca deuq-euq ghanrcae ngar, nawq-anr carnaeq ma.

¹⁰ Aqjeq mirnae aernar-aq, nawq-euq ghawqshaq gaq-eu jeq, mq-anr keuvni jav-awr, Nawq-euq yawtsaq yawdawr-aq, mqdmr-anr tuv-eu mae.

¹¹ Miqyaer-or! Nawq-anr mq taf-aer ciqpoeq ciqgor ma; Nawq-euq yawshaef khanqsaer mirtsaq tanqkhawr doeni bi byale-awq.