Jaceuq 56 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-anr Ghoe-awr Maqguv-eu

Car-eu paw sheuqghae-eu aqyuif ghaq-anr bofnaeq-euq, “Garmanr kaq-eu gar jawr-eu khaqkhoeq” kawqsheu. Daqbir, Gaqta meuq-anr Pirlirtiv tsawrhaq nae bi nyaefngae-euq, Daqbir-euq Mirtam

¹ Miqyaer-or! Aqcawq, ngaq-anr myeufanr-eu laer nyaefsuf-awr nan’ga-i deuvlar luf-eu mirnae; Ngaq-anr ghawqshaq gaqnaeq laf-awq.

² Or-oq, Gor duidui-eu ghaq-or! Ngaq-anr muir-eu deuq nan’ga-i ngaq-anr taeluf-awr; Ngaq-anr deuvlar-awr caelar-eu deuq ghawqmya’ni myaq-eu mae.

³ Ngaq-anr khar guvlar ngae, ngar, nawq-anr ghoe ma.

⁴ Ngar, Miqyaer-euq lafkhoer, aqyawf-euq dawq-anr jaceuq ma; Ngar, Miqyaer-anr ghoe ma; Ngar maqguv. Shiqshaq, ngaq-anr aqjeq janrlar nya-eu?

⁵ Aqyawfmaf, nan’ga-i ngaq-euq dawq yurpyawv-awr; Aqyawfmaf, ngaq-anr yawdoer janr-eu nuinoeq taef-aer sharnoeq luf-eu mae.

⁶ Aqyawfmaf tiqkawv lof-aer uiqler-awr, Aqyawfmaf caevzaf taq-awr, ngar kuirtof ciq-eu gar khoeqsho luf-eu mae. Aqyawfmaf gayuf taq-awr, ngaq-euq daefzir yur-eu laer lofluf-eu mae.

⁷ Aqyawfmaf yawlaeq yawca-anr nae caevdzeurnya taef-a lor? Miqyaer-or! Nuima paer-eu lafkhoer, tsawrhaq heudeuq biqka naeq-awq.

⁸ Ngar doedoe ghagha-aer cancan-aer shaq-euq, Nawr guitsaq tsovtaq-euq mae; Ngaq-euq myavbir, nawq-euq martsaf nae ciqkhmruiq taq-euq mae; Garkawv heu nawq-euq sanqbof-euq lafkhoer bofanr taq-euq maqngeur lor?

⁹ Ngar, nawq-anr gurgaq ngae, ngaq-anr muir-eu deuq narkhan paw caevghofghae taef-a; Miqyaer, ngar jawr-eu paw pyawq-eu mirnae, ngar heu-anr siqnya ma.

¹⁰ Ngar, Miqyaer-euq lafkhoer, aqyawf-euq dawq-anr jaceuq ma; Ngar, Ya’we Miqyaer-euq lafkhoer, aqyawf-euq dawq-anr jaceuq ma.

¹¹ Ngar, Miqyaer-anr ghoe ma; Ngar maqguv. Tsawrhaqzaq, ngaq-anr aqjeq janrlar nya-eu?

¹² Miqyaer-or! Ngar, nawq-anr kamqtaq-euq jeq ya’mrbyan mae; Ngar, nawq-anr jaceuq-eu jeq lawrnaeq ma.

¹³ Aqjeq mirnae aernar-aq, nawr, ngaq-euq nuima saflar, shir-eu jeq-anr nae bibuq-ir naeqlaf-euq mae. Ngar, yawdaef-aer yawshaef-euq lafkhoer, Miqyaer-euq maeqshi yacanni; Nawr, ngaq-euq aqkuir maqbi coq-ir ni hawpir naeqlaf-euq maqngeur laq?