Jaceuq 55 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Cawq Nae Bi Byaerdzae-awr Shar-eu

Car-eu paw sheuqghae-eu aqyuif ghaq-anr bofnaeq-euq, arcav tsof-eu keuka zmq-eu Daqbir-euq Maqsaqkir

¹ Miqyaer-or! Ngaq-euq guiqlanq shardawq-anr naqbawr ciqkhmr naeqlaf; Ngar, nawq-anr tanqshar-eu gar nae taq jawrzaf naeqlaf.

² Ngaq-anr narhaq naeqlaf-awr, ngaq-anr ngaeqghae naeqlaf-awq; Ngar maqsar marsar-aer dawqghof dov-eu lafkhoer yawkhav-aer manrluf-eu ma.

³ Aqjeq mirnae aernar-aq, muir-eu tsawrhaq-euq tersar gaqlar-awr, Tsawrcawv nyaefsuflar luf-eu mae. Aqyawfmaf, ngaq-anr byae-awr nuima paer-eu lafkhoer, Ngaq-euq khoertav gardzaq garkawv bi keuvle luf-eu mae.

⁴ Ngaq-euq lafkhoer, ngaq-euq nuima ardzaeq-aer narluf nya; Ngaq-euq khoertav, shir-eu gar guv-eu jeq gadavle taq-euq nya.

⁵ Ngar yawkhav-aer guv-ir-awr yawdzuq dzuqluf-eu ma; Ngar guv-awr gav-eu lafkhoer gapuf saef-ir luf mir-a.

⁶ Khoermirnae, ngar aer-eu; “Or-oq, ngar khaqkhoeq lof-aer aqdanr tsof lawnmr-aq! Ngar zawbyov ghae-awr ghaqnaq naq-ir-eu ma;

⁷ Ngar, garmanr kaq-eu gar irbyov ghae-awr, Bawrtsanq bawrdanr-anr jawr-ir-eu ma.

⁸ Ngar, mqjeq tsawqtaev hawr-eu jaqlaer laerma jav-eu gar nae, Yawkawr-aer caevdov ghae-iq-eu ma.”

⁹ Sanqpaq Miqyaer-or! Aqyawf maf-euq maeqlar gheupav-awr lavcawv naeq-awq; Aqjeq mirnae aernar-aq, ngar meuq-euq lafkhoer coeqler deuqler-eu iqdaeq iqcae ya’mawr-euq ma.

¹⁰ Uqcif nan’ghanr maq tserpavni, Aqyawfmaf meuqlanr-euq khoertav jawqjawq-aer canluf-eu mae; Meuq-euq lafkhoer khawf, yawlaeq yawca hawr-eu gardzaq garkawv javluf-eu mae.

¹¹ Meuq-euq ghanrcae cawv-ir-eu jeq jav-awr; Meuq-euq garma-anr jaqmyawf maershuir hawr-eu nyaefsuf-eu jeq maqbyov-ir nya-a.

¹² Aqjeq mirnae aernar-aq, ngaq-anr ngaeqdoer-eu tsawrhaq-aq, Ngaq-anr muir-eu tsawrhaq maqngeur-a; Ngeur-eu lawnmr-aq, ngar daqcoer ma. Ngaq-anr cae-eu laer turlar-euq tsawrhaq khawf, Ngaq-anr byae-eu tsawrhaq maqngeur-a; Ngeur-eu lawnmr-aq, ngar caevzaf-ir-eu ma.

¹³ Aerkhawf, ngaq-anr heulof-aer janrlar-eu tsawrhaq-aq, Ngaq-anr myavpyawq shuq-awr, ngaq-euq cawq pyeuf-eu uqtaf, Ngaq naeq-aer tiqkawv lof-aer di-eu tsawrhaq pyeuf-eu nawr mae.

¹⁴ Arnyaf, tsawrhaq baqmaf naeq-aer Miqyaer-euq nymr-anr tiqkawv lof-aer candav lefluf ngae, Dawqghoer ngaeq-awr maeqbawq mr-euq ma.

¹⁵ Aqyawf maf-euq jawrduq-euq lafkhoer hawr-eu aqyawf maf-euq ghanrcae yawdoer jeq javluf-eu mirnae; Shir-eu jeq, aqyawf maf-anr taemi-awr, yawdaef-aer shiqbuir lanma-anr ga’anrghae luf-ur.

¹⁶ Ngar lawnmr-aq, Miqyaer-anr kur ma; Ya’we Miqyaer, ngaq-anr kakhof naeqlaf taef-a.

¹⁷ Uqcif uqshawq hawr-eu nan’ghanr maqbawni, Ngar yawkhav-aer gurgur-aer guiqlanqshar ma; Aqyawf, ngaq-euq tersar-anr narhaq naeqlaf taef-a.

¹⁸ Ngaq-anr caelar-euq deuq ghawqmya’ni myaq-eu mirnae, Aqyawf, ngaq-anr guirdeuv deuvlar-eu gar nae, nuisar of-eu lafkhoer, Ngaq-euq nuima saflar-anr kakhof naeqlaf-euq mae.

¹⁹ Aqyawfmaf, Miqyaer-anr maqguv-aer maq parlar-eu mirnae, Arhu nae daefluf jawrluf-eu Miqyaer narhaq-awr, Aqyawf maf-anr khaeqnaeq khavnaeq taef-a.

²⁰ Aqyawf, aqyawf-euq aqlaf cawqdov-awr, Aqyawf naeq-aer tsaqler dzoerler-eu tsawrhaq-anr cae-awr; Aqyawf, yawqha-euq dawqma sarjax-anr puiq-eu mae.

²¹ Aqyawf-euq khaqmae-euq dawq-aq, tsirkhmq lof-aer jur-eu khawf; Aqyawf-euq nuima-aq, guirdeuv deuvluf-eu mae. Aqyawf-euq dawq-aq, tsir lof-aer nanqyuni ghae-eu khawf; Tawvkhawv-anr nae gheudov lef-euq micaer-anr dur-eu mae.

²² Nawq-euq khavbaev, Ya’we Miqyaer-anr a’naeq-awq; Aqyawf, nawq-anr hawlanr naeqlaf taef-a. Aqyawf, tsaq-awr dawr-eu tsawrhaq-anr tiqjawr-iq maqbi coq-ir-a.

²³ Aerkhawf, Miqyaer-or! Nawr, aqyawf maf-anr lavcawv-eu duqkhanq-anr bi’ir taef-a; Shiq maef-awr jaqmyawf maershuir shuir-eu tsawrhaq-aq, Yawqha-euq zir tiq khaev khawf maqya daefkeuv-ar; Aerkhawf, ngar-aq, nawq-anr ghoe ma.