Jaceuq 53 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrhaq Yawmuiq Maqjawr-a

Car-eu paw sheuqghae-eu aqyuif ghaq-anr bofnaeq-euq, Maqhaqlav kawqsheu, Daqbir-euq Maqsaqkir

¹ Aqdzawq argan, yawqha-euq nuima-euq lafkhoer aer-eu, “Miqyaer maqjawr-a.” Aqyawfmaf daefcawv-awr, maq mrkhmq-eu yawlaeq yawca jeq mrluf-eu mae. Yawmuiq jeq mr-eu tsawrhaq tiqghaq-iq maqjawr-a.

² Miqyaer, mq-euq khoertav nae tsawrhaq-euq zaqdeuq-anr hawka lef-awr; Ghovshaw-eu jeq anr-awr, Miqyaer-anr pov-eu tiqghaqnav jawr-eu nga laq laer hawluf-eu mae.

³ Aqyawfmaf dawqtawvluf garma garbanq banq-ir-awr, Aqyawfmaf tiqkawv lof-aer daefcawvjir taq-euq mae; Yawmuiq jeq mr-eu tsawrhaq tiqghaq-iq maqjawr-a. Tiqghaq-iq maqjawr-a.

⁴ Ngaq-euq tsawrhaq-anr kaqmur dzaq-eu lof-aer dzaq-eu tsawrhaq, Yawlaeq yawca jeq mr-eu deuq, siqnya-eu tsawrganr maqanr-aer, Aqyawfmaf, Miqyaer-anr maqkur-eu la laq?

⁵ Miqyaer, nawq-anr muir-eu laer gajawq lar-euq tsawrhaq-euq shaqyoeq deuq biqkhawqjir naeq-euq mirnae, Aqyawfmaf guv paq-aer ghae-eu jeq maqjav-eu gar, yawkhav-aer guvluf-eu mae; Miqyaer, aqyawf maf-anr hawdoer-eu mirnae, nawr, aqyawf maf-anr daq biga-ir taef-a.

⁶ Irsaqleqlav-anr kakhof-eu jeq, Ziroq-anr nae dovle taef-a! Miqyaer, aqyawf-euq tsawrhaq-anr zaqkhav geuf-ir-euq gar nae sheuqkhoflaf ngae; Yaqkov laqkhaq bicaer-awr, Irsaqleqlav bi lurgha bi caergha-awq.