Jaceuq 51 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Iqbax Sharpyaeq-eu

Car-eu paw sheuqghae-eu aqyuif ghaq-anr bofnaeq-euq, Daqbir, Baqsheqba jawr-eu gar urler-awr Miqyaer gharduq ngaeqdan-eu Naqtaq, Daqbir-anr aernaeq ngae-euq Daqbir-euq cardawq

¹ Miqyaer-or! Nawq-euq ghoer-awr gaq-eu jeq-euq baqda’nae, Ngaq-anr ghawqshaq gaqnaeq laf-awq. Nawq-euq myaq duidui-eu nanqyuni ghawqshaq gaq-eu jeq-euq baqda’nae, Ngaq-euq yawbanq yawlaeq sivdzaebyov naeqlaf-awq.

² Ngaq-euq yawlaeq yawca dawqtawv luf-anr tsiqshawr naeqlaf-awr, Ngaq-euq iqbax-anr nae ngaq-anr lavshawr naeqlaf-awq.

³ Aqjeq mirnae aernar-aq, ngar, ngaq-euq yawbanq yawlaeq-anr siqnya-awr, Ngaq-euq iqbax aqmyanluf ngaq-euq maeqshi javluf-eu mae.

⁴ Ngar, nawq-anr iqbax mrlaeq-euq mir-a, nawq-anr taef-aer mrlaeq-euq ma. Nawq-euq maeqshi yawdoer jeq mr-euq heu-aq; Nawr ngaeqlar ngae dawr-awr tsaq-eu uqtaf, Nawr yarkhaqdar ngae, aerkhar maqza nga laer ya dovlar-eu mae.

⁵ Hawsher-eq, ngar iqbax-euq lafkhoer ngaqma-euq uqmav-anr tsaevler-awr, Daefle ngae nae yawlaeq yawca anrluf-eu ma.

⁶ Haeq, nawr, lafkhoer-euq yawtsaq yawdawr geufmawf-eu mae. Khoermirnae, lafkhoer zaftaq-euq pav-anr, Ngar zaqsiq tsawrganr siqnya larni maeqnaeq laf-awq.

⁷ Ngar shawrlarni, ngaq-anr hursor nae lavshawr naeqlaf-awq. Ngar, ngaer navmaqtser pyurlarni, ngaq-anr tsiqshawr naeqlaf-awq.

⁸ Nawq nae ngawqkhaef-euq shaqyoeq deuq laqkhaq caerlar nya’ni, Ngaq-anr lurlar caerlar-awr laqkhaq caerlar paq-aer ghae-eu jeq bigaq naeqlaf-awq.

⁹ Nawq-euq myavpyawq, ngaq-euq iqbax-anr nae awzaf-awr, Ngaq-euq yawlaeq yawca jeq dawqtawv luf-anr sivdzaejir naeqlaf-awq.

¹⁰ Miqyaer-or! Ngaq-euq lafkhoer shawr-eu nuima tiq siq bae’anr naeqlaf-awr; Ngaq-euq lafkhoer zifdanni ghae-eu saflar lavshuif naeqlaf-awq.

¹¹ Nawq-euq maeqshi nae ngaq-anr taq taedzae naeqlaf. Nawq-euq Yawshawr Saflar, ngaq-anr nae taq yurkhof naeqlaf.

¹² Nawq-euq kakhof-eu jeq-euq laqkhaq caer-eu jeq, ngaq-anr par bifkhof naeqlaf-awr, Nawq-euq nuijer jer-eu Saflar nae ngaq-anr cawba naeqlaf.

¹³ Khoernar-aq, ngar, yawbanq yawlaeq jeq mr-eu deuq-anr, Nawq-euq garma maeqnaeq ngae, Iqbaxzaq noeqpov noeqpar-awr, nawr jawr-eu paw ghoflar taef-a.

¹⁴ Ngaq-anr kakhof-eu Miqyaer pyeuf-eu Miqyaer-or, Shiq lavdov-euq yawlaeq-anr nae, ngaq-anr bibuq-ir naeqlaf-awq; Khoernar-aq, nawq-euq tsaq-awr dawr-eu garkawv, Ngaq-euq maeqlar nae yawkhav-aer gurgur-aer car ma.

¹⁵ Sanqpaq Miqyaer-or! Ngaq-euq maeqluq pannaeq laf-awq; Khoernar-aq, ngaq-euq khaqmae, nawq-anr jaceuq-eu gar bimawr ma.

¹⁶ Aqjeq mirnae aernar-aq, nawr lawr-eu jeq-anr geufmawf-eu maqngeur-a; Ngeur-eu lawnmr-aq, ngar, nawq-anr lawrnaeq lar-eu ma. Nawr, dzanpuiv-awr lawr-eu jeq-anr laqkhaq maqcaer-a.

¹⁷ Yawpav yawshav-aer ghae-eu saflar, lawrnaeq lar-eu gar, Miqyaer hageuf-eu mae. Miqyaer-or! Yawpav yawshav-aer ghae-awr laeqbymr tawv-eu nuima-anr, Nawr maq hawdoer naeqlaf-a.

¹⁸ Nawr nuima tsaq-eu lof-aer, Ziroq-anr yawmuiq-aer ngaeqghae naeq-awr, Yeqlursaqlaeq-euq meuqlanr tsovnaeq laf-awq.

¹⁹ Khoernar-aq, nawr nuikhanr shir-eu, tsaq-awr dawr-eu lawr-eu jeq lawrnaeqlar taef-a; Miqdzaq-anr dzanpuiv-awr lawr-eu jeq hawr-eu mawrdo dolan-aer dzanpuiv-awr lawr-eu jeq lawrnaeqlar ngae, Nawq-euq lawrduq-euq khoertav mawrner mawrgaw deuq lawrnaeqlar taef-a.