Jaceuq 50 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yarkhaq Dar-eu Miqyaer

Aqsav-euq cardawq

¹ Miqyaer pyeuf-eu Ya’we Miqyaer, Baoq huiq-eu ghaq, Dawq ngaeq-awr, mirtsaq-euq khoertav nanrma dovlar-eu gar nae, Nanrma ga’anr-eu gar keuvni jawr-eu tsawrhaq-anr kurgaq-euq mae.

² Hawmuiq duidui-eu Ziroq-anr nae, Miqyaer, yawshaef byadovlef taef-a.

³ Aqdui-euq Miqyaer oe taef-a, ciqcurni maq jawrbyov-ar. Aqyawf-euq maeqshi miqdzaq dofnyaev taq-awr, Aqyawf-euq tiqjawq, jaqlaer laerma yawkhav-aer baw-eu mae.

⁴ Aqyawf, aqyawf-euq tsawrhaq-anr yarkhaq dar-eu laer, Aqyawf laftav jav-eu mq hawr-eu mir-anr kur-eu mae.

⁵ “Lawr-eu jeq lawr-awr ngaq naeq-aer dawqma sarjax dzaq-euq, Ngaq-euq tsawrshawr deuq, tiqkawv lof-aer ngar jawr-eu gar uiqlar-awq.”

⁶ Mqdeuq, aqyawf-euq tsaq-awr dawr-eu jeq dawqdzawr bimr-awq; Aqjeq mirnae aernar-aq, Miqyaer-aq, yarkhaq dar-eu ghaq mae.

⁷ “Ngaq-euq tsawrhaq deuq-or! Ngar ngaeq-eu laer ghae-eu gar narhaq sher-eq; Irsaqleqlav-or! Ngar, nawmaf-anr aer paq-aer ghae-eu jeq jav-eu ma; Ngar-aq, nawmaf-euq Miqyaer pyeuf-eu Miqyaer ma.

⁸ Aqmyanluf, ngaq-euq maeqshi jav-eu, nawmaf nae, Ngaq-anr lawr-euq hawr-eu dzanpuiv-awr lawr-euq garkawv, Ngar, nawqmaf-anr maqdaeq.

⁹ Ngar, nawq-euq nymr-euq mawrner mawrgaw geufmawf-eu maqngeur; Nawq-euq cifmyaef cifmaf-anr nae cifmyaef geufmawf-eu khawf maqngeur.

¹⁰ Aqjeq mirnae aernar-aq, gawqjawq 1,000 jawq-anr gav-eu jeqzaq, Hawr-eu bawrtsanq-anr kharjawr-eu jeqzaq dawqtawvluf ngaq-euq ma.

¹¹ Ngar, gawqjawq-anr kharjawr-eu arjir dawqtawvluf siqnya-awr, Daega-anr kharjawr-eu bawrtsanq-euq jeqzaq khawf ngaq-euq ma.

¹² “Ngar maeflar nar-aq, ngar, nawqmaf-anr maq aernaeq; Aqjeq mirnae aernar-aq, mirtsaq tanqkhawr-aq, ngaq-euq ma. Heu-euq khoertav kharjav-eu dawqtawvluf khawf ngaq-euq ma.

¹³ Ngar, mawrner-euq shaqjir dzaq taef-a lor? Maqngeur nar-aq, ngar cifmyaef-euq shiq dawr taef-a laq?

¹⁴ Gor duidui-eu ghaq-anr nawq nae kamqtaq-euq lof-aer mrbyan-awr, Guiqlanq-anr jaceuq-eu dawqkawq, Miqyaer-anr lawrnaeq-awq.

¹⁵ Gardzaq garkawv keuvle ngae nan, ngaq-anr kur-awq. Ngar, nawq-anr bibuq-ir-awr, nawr, ngaq-anr jaceuq taef-a.”

¹⁶ Aerkhawf, Miqyaer, tsawrcawv deuq-anr heulof-aer aer-eu mae; “Nawmaf, aqgeu gar-euq aryaq nae ngaq-euq zanrtaq khoftaq dzawr-awr, Ngaq-euq dawqma sarjax, nawmaf-euq khaqmae torluf-eu le?

¹⁷ Nawmaf, ngaq-euq maeqdawq tsovdawq-anr byae-eu mawrlar-awr, Nawmaf, ngaq-euq dawq narkhan paw biqdzae yaf-euq maqngeur laq?

¹⁸ Nawmaf, smrkhoeq-anr tanqpuq ngae, aqyawf naeq-aer gawfler-awr, Banq-awr joe-eu deuq naeq-aer gmler-euq mae.

¹⁹ Nawmaf, yawdoer-euq gharduq nawmaf-euq khaqmae bif-awr, Nawmaf-euq maeqlar khawf, jaqmyawf maershuir dzawtaq-euq mae.

²⁰ Nawmaf nuirtaq-awr yawqha-euq maernmr-anr coeqler-eu jeq ngaeq-awr, Yawqha-euq aqma-euq zaqyo-anr jabu jadoer-eu mae.

²¹ Nawmaf heudeuq mr-euq khawf, ngar ciqcurni jawr-euq ma; Nawmaf, ngar, nawmaf-anr dur taef-a laer noeq-eu mae; Aerkhawf, ngar, nawmaf-anr daeq-awr, Nawmaf-euq myavkhae aqyawf jeq aqyawf-aer lavtsaq ma.

²² “Nawmaf, Miqyaer-anr ngaer-euq tsawrhaq deuq-or, Nymq-mr garkawv heu sharnoeq-awq; Maqngeur nar-aq, ngar, nawmaf-anr caeqpyaeq caeqshavjir ngae, Tiqghaq-iq, nawmaf-anr maqbi buq-ir nya-ar.

²³ Jaceuq-eu jeq kharlawr-eu ghaq-aq, Ngaq-anr ciqhuiq ciqmanr-eu mae; Yawqha yawmuiq-aer daefni laeqhmq-awr daeftsaq daeftsanr-eu tsawrhaq-anr, Miqyaer-euq kakhof-eu jeq-anr ngar bimawr ma.”