Jaceuq 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Hawpir Naeqlaf Laer Shar-eu

Car-eu paw sheuqghae-eu aqyuif ghaq-anr bofnaeq-euq, baw-eu keuka zmq-eu, Daqbir-euq cardawq

¹ Ya’we Miqyaer-or! Nawq-euq naqbawr, ngaq-euq dawq-anr narhaq naeqlaf-awr, Ngaq nae dzardziv dziv-euq jeq-anr sharnoeq naeqlaf-awq.

² Ngaq-euq Sanqpaq hawr-eu ngaq-euq Miqyaer-or! Ngar gur-eu tersar-anr narhaq naeqlaf-awq. Ngar, nawq-anr guiqlanq shar-eu ma.

³ Ya’we Miqyaer-or! Uqshawq paw nawr, ngaq-euq tersar-anr ya gaqluf-eu mae. Uqshawq yawnaf-aer, ngar, nawr jawr-eu paw hawdav laf-awr, Ngaq-euq tersar, nawr jawr-eu paw bi larluf-eu ma.

⁴ Aqjeq mirnae aernar-aq, nawr-aq, yawcawv jeq-anr nuikhanr shir-eu Miqyaer maqngeur-aer, Nawq-euq maeqshi yawdoer jeq maq javnya-a.

⁵ Nawr, yawlaeq yawca mr-eu tsawrhaq dawqtawv luf-anr byae-awr; Khanqsaer jaev-eu tsawrhaq, nawr mawr-eu gar maqya yawf-a.

⁶ Ya’we Miqyaer, shiq maef-eu tsawrhaq-anr nuidav dav-awr, Maershuir shuir-eu tsawrhaq-anr byae-eu mae. Nawr, jaqmyawf myawf-eu deuq-anr lavcawv taef-a.

⁷ Aerkhawf, ngar-aq, myaq duidui-eu, nawq-euq ghawqshaq gaq-eu jeq-euq baqda’nae, Ngar, nawq-euq nymr-euq lafkhoer urlar ma. Ngar, nawq-anr guv-eu lafkhoer, nawq-euq shawr-eu uqduq tanqnymr nymrma-euq maeqshi, awbyav-awr uqduqtanq ma.

⁸ Ya’we Miqyaer-or! Ngaq-anr muir-eu tsawrhaq jawr-eu mirnae, Nawq-euq tsaq-awr dawr-eu lafkhoer, ngaq-anr sheuqghae naeqlaf-awq. Ngaq-euq maeqhu nawq-euq garma dawrcoeni lavdanr naeqlaf-awq.

⁹ Aqjeq mirnae aernar-aq, aqyawf maf-euq khaqmae-euq lafkhoer sarjax zif-eu jeq maqanr-aer, Aqyawf maf-euq lafkhoer-aq, lavcawv mawf-eu jeq taef-aer anr-eu mae. Aqyawf maf-euq kuqbyanq-aq, pantaq-euq lmqbymr-anr dur-awr, Aqyawf maf-euq maeqlar-aq, ja’muiq-eu janrgeuf-eu mae.

¹⁰ Miqyaer-or! Aqyawf maf-anr yawlaeq ngar-a laer yarkhaq dartsaev naeq-awr, Aqyawf maf-anr yawqha-euq maeqbawq-euq baqda’nae bicoq-ir-awq. Aqyawf maf-euq yawbanq yawlaeq myaq duidui-eu mirnae, aqyawf maf-anr taedzae naeq-awq. Aqjeq mirnae aernar-aq, aqyawfmaf, nawq-anr puiq-awr muir-euq mae.

¹¹ Aerkhawf, nawq-anr ghoe-eu deuq-anr laqkhaq bicaer-awr, Nawq nae hawpir naeq-euq deuq, aqmyanluf laqkhaq caercaer-aer bigur-eu uqtaf, Nawq-euq tsawrmyanr-anr gaq-eu deuq khawf, nawq-euq lafkhoer laqkhaq bicaer law.

¹² Aqjeq mirnae aernar-aq, Ya’we Miqyaer-or! Nawr-aq, tsaq-awr dawr-eu tsawrhaq-anr guiqlanq bif-awr, Aqyawf-euq tiqjawq, nawq-euq ghoer mr-eu jeq, daeqdaqduq lof-aer bijav-eu mae.