Jaceuq 49 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqdzawq Argan-euq Yawlaeq

Car-eu paw sheuqghae-eu aqyuif ghaq-anr bofnaeq-euq, Korlav-euq zaqyo deuq-euq cardawq

¹ Tsawrhaqzaq dawqtawvluf narhaq sher-eq. Mirtsaq-euq khoertav kharjawr-eu deuq naqbawr ciqkhmr-awq.

² Zaqhuiq hawr-eu zaqnyir, Smrmuiqzaq hawr-eu irshaqzaq, Tiqkawv lof-aer narhaq-awq.

³ Ngaq-euq khaqmae zaqsiq tsawrganr ngaeq-awr, Ngaq-euq nuima-euq lafkhoer dzardziv dziv-awr ghovshaw-eu jeq bif ma.

⁴ Ngaq-euq naqbawr ciqkhmr-awr dawqdaq-anr narhaq-awr, Ngar, deur-mq diq-awr zaftaq-euq dawqtsuif yurdovlaf ma.

⁵ Yawlaeq yawca, ngaq-euq kuirnuif-anr gajawq taq-awr, Yawdoer arnan deuq keuvle ngae, ngar aqjeq mirnae yaguv-eu la?

⁶ Aqyawf maf-aq, yawqha-euq pyurshuir myawqganq-anr ghoe-awr, yawqha smrmuiq zawr-aer muiq-eu gar khanqsaer jaev-eu mae.

⁷ Tsawrhaq tiqghaq-iq tiqjeq nae-iq yawqha-euq maernmr-anr maq kakhof nya-a; Aqyawf-euq gharduq khawf Miqyaer-anr arpoeq maq biftsaev nya-a.

⁸ Aqjeq mirnae aernar-aq, tsawrhaqzaq-euq nuima saflar-euq arpoeq-aq, khav duidui-awr, Mqmaq maqbyav yarzir maq zeurtsaev coer-eu mirnae,

⁹ Lmqbymr-anr maqya mawrni, mqmaq maqbyav yarzir maq daefnya-a.

¹⁰ Aqdzawq argan hawr-eu dawrga deuq zir jir-eu lof-aer, Tsawrganr anr-eu deuq khawf shir-awr, yawqha-euq pyurshuir myawqganq, Aqcawq-anr taqyaf-eu gar, aqyawf mawrluf-eu mae.

¹¹ Aqyawf maf-euq nymr mqmaq maqbyav yarzir zif-awr, Aqyawf maf-euq jawrduq yawqzir navluf-euq gharduq zif taef-a laer, Yawqha-euq lafkhoer sharnoeq-awr; Mirtsaq-anr yawqha-euq tsawrmyanr ghoe-awr nae kur-eu mae.

¹² Khoerlof-aer tsawrhaqzaq-anr taqhuiq naeq-euq khawf, maqgmq maqzif-a; Aqyawf, bawrtsanq-euq jeqzaq lof-aer yashir-eu mae.

¹³ Heu-aq, aqdzawq argan deuq hawr-eu aqyawf maf-euq dawq-anr gatsaq-eu, Aqyawf maf-euq nanqzaq deuq-euq garma mae. Sela.

¹⁴ Aqyawfmaf, yawr lof-aer lmqbymr-euq lafkhoer bi baftaq-awr, Shir-eu jeq, aqyawf maf-anr dzaq taef-a; Aqyawfmaf, yawqha-euq jawrduq-anr nae garmanr kaq-eu gar, Yawqha-euq jaqlaq lmqbymr nae bi myeufanr jir-awr, Uqshawq paw-aq, dawrcoeni ghae-eu tsawrhaq, aqyawf maf-anr uvlanr taef-a.

¹⁵ Aerkhawf, Miqyaer, ngaq-euq nuima saflar-anr, Lmqbymr-euq baoq-anr nae kakhof naeqlaf taef-a. Aqjeq mirnae aernar-aq, aqyawf, ngaq-anr hageuf naeqlaf taef-a. Sela.

¹⁶ Tsawrhaq tiq ghaq smrmuiq muiqlar luf-awr, Aqyawf-euq nymr-euq yawshaef khanqsaer myaqlar luf-eu khawf taqguv.

¹⁷ Aqjeq mirnae aernar-aq, aqyawf shir ngae, aqyawf tiqjeq-iq maq yurghae nya-a. Aqyawf-euq yawshaef khanqsaer khawf, aqyawf-anr maq cantae ka-iq nya-a.

¹⁸ Aqyawf yawdaefdaef ngae, yawqha-euq nuima saflar-anr dawq ngaeqghae naeq-euq mae. (Aqjeq mirnae aernar-aq, nawr daefdzaq nar-aq, aqcawq khawf, nawq-anr jaceuq-eu mae.)

¹⁹ Aqyawfmaf, yawshaef maqpar ya’mawr-eu mirkhanq-anr, Aqyawf, aqyawf-euq aqpoeq tsuifga deuq jawr-eu gar ya’ir taef-a.

²⁰ Aqcawq taqhuiq-eu tsawrhaq tiq ghaq pyeuf-eu khawf, Ghovshaw-eu jeq maqanr nar-aq, yacawv-ir-eu jeqzaq-anr dur-eu taef mae.