Jaceuq 48 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Khanqsaer Huiq-eu Ziroq Meuq

Korlav-euq zaqyo deuq-euq dawqcar cardawq

¹ Ya’we Miqyaer-aq, huiq-awr manr-eu mae. Aqyawf-euq shawr-eu gawqjawq-euq khoertav jav-eu, Aqdui-euq Miqyaer-euq meuq-euq lafkhoer, aqyawf-anr yawkhav-aer jaceuq-eu tsaq mae.

² Huiq-awr manr-eu Sanqpaq-euq meuq pyeuf-eu Ziroq gawqjawq-aq, Laftav paw yawgor-anr jav-awr hawmuiq-eu uqtaf, Mirtsaq tanqkhawr dawqtawv luf-euq laqkhaq caerduq pyeuf-eu mae.

³ Miqyaer-aq, meuq-euq lafkhoer jav-eu sanqpaq-euq nymr-anr jawrluf-awr; Aqyawf-aq, meuq heumeuq-euq caevzafduq-a laer bi siqtaq-euq mae.

⁴ Aqjeq mirnae aernar-aq, hawde-eq, sanqpaq deuq uiqler-awr, Aqyawfmaf tiqkawv lof-aer cantsaev ghaeluf-eu mae.

⁵ Aqyawfmaf meuq-anr ya’mawr ngae zanqler-awr, Aqyawfmaf guv-eu lafkhoer yawkawr-aer caevbyav jir-euq mae.

⁶ Aqyawfmaf, khoergar ardzaeq-aer bi lavguv-awr, Zaqmiq aqbur tiq ghaq, zaq ciq-eu laer ghae ngae nar-eu lof-aer ghae-ir-euq mae.

⁷ Nanrma dovkhaeq paw nae bawlaf-eu jaqlaer-anr ghoe-awr nae, Talashir meuq-euq lawq-anr nawq nae lavpyav naeq-euq gar dur-eu mae.

⁸ Guirmaf-euq Ya’we Miqyaer-euq meuq-euq lafkhoer, Aqdui-euq Miqyaer-euq meuq-euq lafkhoer, Aqdui ya gaqhaw-euq jeq, aqdui khoerlof-aer ya’mawr-euq ma; Miqyaer, meuq heumeuq-anr mqmaq maqbyav yarzir zifni lavzif taef-a. Sela.

⁹ Miqyaer-or! Nawq-euq uqduq tanqnymr nymrma-euq lafkhoer, Nga’maf, nawq-euq ghoer-awr gaq-eu jeq-euq garkawv sharnoeq-eu ma.

¹⁰ Miqyaer-or! Nawq-euq tsawrmyanr khar irkeuv-eu gar, Nawq-anr jaceuq-eu jeq khawf, mqdzer mirdzer-anr irkeuv luf-eu mae. Nawq-euq armar laf-aq, tsaq-awr dawr-eu jeq byan-eu mae.

¹¹ Nawr yarkhaq dar-eu mirnae, Ziroq gawqjawq laqkhaq bicaer-awr, Yurdav-euq zaqmiq deuq bi lurgha bi caergha-awq.

¹² Ziroq candoe haw-ir-awr, meuq-euq tiqjawq canjawq ngae, Lofpir-eu nymrgor deuq-anr guihaw-ir sher-eq.

¹³ Nawq-euq zaq-euq zir-anr keuvni, dzawrmaeq nya’ni, Meuqlanr deuq guitsaqtsov taq-awr, sanqpaq-euq nymrdeuq sharnoeq taq-awq.

¹⁴ Aqjeq mirnae aernar-aq, Miqyaer heughaq-aq, Li-eu maqbawni, mqmaq maqbyav yarzir aqdui-euq Miqyaer pyeuf-eu mae. Aqyawf, aqdui-anr shir ngae keuvni sheuqghae naeqlaf taef-a.