Jaceuq 47 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mirtsaq-anr Uvlanr-eu Ghaq

Car-eu paw sheuqghae-eu aqyuif ghaq-anr bofnaeq-euq, Korlav-euq zaqyo deuq-euq cardawq

¹ Nawmaf, tsawrhaqzaq dawqtawvluf, Lafkhawv taevtaev-aer, ghaqler-euq tersar Miqyaer-anr gurgaq-awq!

² Aqjeq mirnae aernar-aq, gor duidui-eu Ya’we Miqyaer-aq, yawzeu bawlar paq-aer ghae-eu mae; Aqyawf-aq, mirtsaq tanqkhawr dawqtawv luf-euq khoertav uvlanr-eu huiq-eu Sanqpaq mae.

³ Aqyawf, tsawrhaqzaq-anr aqdui-euq lafov bi jawrlarni zuivghaq-awr; Tsawrjeuq tsawrca deuq, aqdui-euq aqkuir-euq uqmov bi jawrlarni janr taef-a.

⁴ Aqyawf, aqdui-euq gharduq aqdui-euq jeqbir tsernaeqlaf taef-a; Aqyawf gaq-eu mirnae Yaqkov nuikhanrshir duidui-eu mae. Sela.

⁵ Miqyaer, gur-eu tersar naeq-aer davler-awr, Ya’we Miqyaer, darhae baw-eu tersar naeq-aer davler-eu mae.

⁶ Car-awr Miqyaer-anr jaceuq-awq, car-awr jaceuq-awq! Car-awr aqdui-euq Sanqpaq-anr jaceuq-awq, car-awr jaceuq-awq!

⁷ Aqjeq mirnae aernar-aq, Miqyaer-aq, mirtsaq tanqkhawr dawqtawv luf-euq Sanqpaq mae. Ghovshaw-euq lafkhoer car-awr jaceuq-awq.

⁸ Miqyaer-aq, aqyawf-euq shawr-eu nuirmanq-anr nuir-awr, Miqyaer-aq, tsawrjeuq tsawrca deuq-euq khoertav uvlanr luf-eu mae.

⁹ Aqbyaqhaq-euq Miqyaer-euq tsawrhaq deuq, tsawrhaqzaq-euq dzoeqda deuq tiqkawv lof-aer uiqlar taq-euq mae. Aqjeq mirnae aernar-aq, mirtsaq tanqkhawr-euq daeqdaqduq-aq, Miqyaer-euq mae. Aqyawf-aq, yawkhav-aer ciqpoeq ciqgor paq-aer ghae-eu mae.