Jaceuq 46 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer, Aqdui-euq Caevzafduq

Car-eu paw sheuqghae-eu aqyuif ghaq-anr bofnaeq-euq, Aqlaqmov-euq kawqsheu, Korlav-euq zaqyo deuq-euq cardawq

¹ Miqyaer-aq, aqdui-euq caevzafduq hawr-eu aqdui-euq ghaq pyeuf-awr, Gardzaq garkawv khar keuvle ngae, cawba naeqlaf-eu ghaq mae.

² Teumirnae, mirtsaq tanqkhawr parlar-awr, Gawqjawq deuq iqmalavshav-euq ghanrcae bi yurghae-euq khawf, aqdui maqguv.

³ Iqmalavshav lmqlmq-aer boerloer yawkhav-aer banqgha-eu uqtaf, Irluv-euq baqda’nae gawqjawq deuq nyaenyae-aer ghaelar-eu khawf aqdui maqguv. Sela.

⁴ Gor duidui-eu ghaq-euq saeqghawv-euq yawshawr jawrduq-anr; Miqyaer-euq meuq laqkhaq bi caerlar-eu lawrgawv tiq gawv yoer-eu mae.

⁵ Miqyaer, meuq heumeuq-euq lafkhoer jawr-awr, Meuq heumeuq tiqjawr-iq maqcoq-ir-ar. Uqbya byalar ngae, Miqyaer, meuq heumeuq-anr cawbale taef-a.

⁶ Tsawrjeuq tsawrca deuq tsawqzur lar-awr, mirkhanq deuq nyaenyae-aer ghaelar taq-euq mae. Miqyaer, aqyawf-euq tersar ngaeqdovlef ngae, mirtsaq tanqkhawr guir-ir-eu mae.

⁷ Guirmaf-euq Ya’we Miqyaer, aqdui naeq-aer jawr-eu mae. Yaqkov-euq Miqyaer-aq, aqdui-euq caevzafduq pyeuf-eu mae. Sela.

⁸ Lar-awq, Ya’we Miqyaer nae mr-euq jeq-anr hawlar sher-eq. Aqyawf nae mirtsaq tanqkhawr deqlaqni bi pyeuflar jir-euq mae.

⁹ Miqyaer, mqdzer mirdzer-anr keuvni, guirdeuv deuv-eu lavnaq-awr; Aqyawf, kav ngawqkhaef-awr, ganq nyiq tsaev-aer deuvtsaev-euq uqtaf; Manq lavlawq, miqdzaq-anr dzanpuiv-euq mae.

¹⁰ Ciqcurni jawr-awr, ngar-aq, Miqyaer nga laer siqnya-awq; Tsawrjeuq tsawrca deuq, ngaq-anr ciqpoeq ciqgor taef-a; Mirtsaq-euq khoertav ngaq-anr ciqpoeq ciqgor taef-a.

¹¹ Guirmaf-euq Ya’we Miqyaer, aqdui naeq-aer jawr-eu mae. Yaqkov-euq Miqyaer-aq, aqdui-euq caevzafduq pyeuf-eu mae. Sela.