Jaceuq 45 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sanqpaq Oermr Bar-eu Cardawq

Car-eu paw sheuqghae-eu aqyuif ghaq-anr bofnaeq-euq, Kapaf aryaev kawqsheu, Korlav-euq zaqyo deuq-euq Maqsaqkir , gaq-eu cardawq

¹ Ngaq-euq nuima, garkawv yawmuiq byankhar luf-awr; Ngaq nae bof-euq Sanqpaq-anr taf-eu garkawv dzawrluf ngae; Ngaq-euq maeqlar-aq, sanqbof zawr bofnya-eu tiq ghaq-euq sanqdur ma.

² Nawr-aq, tsawrhaq-euq zaqyo deuq navmaqtser arghaer shaevdzeuf muiqdzaeq-awr; Nawq-euq maeqluq-anr guiqlanq yawdzanr shaevdav taq-euq mae. Khoermirnae, Miqyaer, nawq-anr mqmaq maqbyav yarzir guiqlanq bif-eu mae.

³ Baoq huiq-eu ghaq-or! Nawq-euq jaqlaq khanqsaer hawr-eu yawshaef khanqsaer naeq-aer, Nawq-euq jof-anr nawq-euq micaer shaf-awq.

⁴ Yawtsaq yawdawr, nuinanq nuiyu hawr-eu tsaq-awr dawr-eu gharduq, Nawq-euq jaqlaq khanqsaer-euq lafkhoer ghaqler-euq ghaq lof-aer dziq-awr dov-ir-awq; Nawq-euq armar laf, nawq-anr yawzeu bawlar paq-aer ghae-eu jeq maeqnaeqlaf taef-a.

⁵ Nawq-euq kavmyaq-euq yawtav, Sanqpaq-anr muir-eu deuq-euq nuima-anr beuvtsov-awr, Tsawrhaqzaq, nawq-euq uqmov ya galan ghae taef-a.

⁶ Miqyaer-or! Nawq-euq nuirmanq-aq, li-eu maqbawni mqmaq maqbyav yarzir zif-awr, Nawq-euq uvlanr-eu gawqyoeq-aq, tsaq-awr dawr-eu uvlanr-eu gawqyoeq mae.

⁷ Nawr tsaq-awr dawr-eu jeq-anr gaq-awr yawcawv jeq-anr byae-eu mirnae; Nawq-euq Miqyaer pyeuf-eu Miqyaer, nawq-euq cawqdeuq-anr navmaqtser, Nawq-anr laqkhaq caer-eu tsir shaevdav naeq-euq mae.

⁸ Nawq-euq maeqtsoeq dawqtawvluf murlaq, karsiq hawr-eu arjawq tsir yawsaw nae lavsaw taq-awr; Ya’ma-euq juir nae tsovtaq-euq sanqpaq-euq nymr-anr nae, nawr laqkhaq caer-eu jeq dovle taef-a.

⁹ Sanqpaq deuq-euq zaqmiq deuq khawf, taqhuiq taqmanr paq-aer ghae-eu zaqmiq aqbur deuq-euq lafkhoer jawr-awr; Nawq-euq armar paw-aq, sanqpaq-euq miqzaq, Opir meuq-euq shuir-euq myawqgur geuf-awr yawfluf-eu mae.

¹⁰ Zaqmiq-or! Narhaq sher-eq, Nawq-euq naqbawr ciqkhmr-awr yagaq-eu jeq sharnoeq-awq; Nawr, nawq-euq tsawrhaq hawr-eu nawqda-euq nymr-anr ya’ngaer-eu mae.

¹¹ Sanqpaq-aq, nawr hawmuiq-eu gar yawkhav-aer geufmawf-eu mae; Aqyawf-aq, nawq-euq Ya’we Miqyaer pyeuf-eu mirnae, Aqyawf-anr uqduq tanq-awq.

¹² Khoernar-aq, Durlu mirkhanq-euq zaqmiq, lafsawq yur-awr lar taef-a; Tsawrhaqzaq-euq smrmuiq smrbaw deuq khawf, nawq-euq ghoer mr-eu jeq-anr sharpov taef-a.

¹³ Sanqpaq-euq zaqmiq-aq, sanqpaq-euq nymr-euq lafkhoer jawr-awr yawshaef khanqsaer byan duidui-eu mae. Aqyawf-euq maeqtsoeq-aq, shuir nae zaftaq-euq mae.

¹⁴ Aqyawf, parkeuq keuq-awr guf-euq paerkhanq paermanr dm-awr, Sanqpaq jawr-eu gar bi sheuqhalar taef-a; Aqyawf-euq maeqnan cantae-eu cawq miqdaf dafshawr deuq khawf, Nawr jawr-eu gar sheuqha naeqlar taef-a.

¹⁵ Aqyawfmaf laqkhaq caer-awr lurgha caergha-eu lafkhoer sheuq-awr lar taef-a. Aqyawfmaf, Sanqpaq-euq nymr-anr urlar taef-a.

¹⁶ Nawq-euq aqpoeq deuq-euq danni nawq-euq zaqyo deuq davlar-awr; Nawr, aqyawf maf-anr mirkhanq dawqtawv luf-euq dzoeqda bi pyeuflar taef-a.

¹⁷ Nawq-euq tsawrmyanr-anr yawqzir yawqjo navluf noeqmawr nya’ni, ngar mr-ir ma; Khoer-euq baqda’nae, tsawrhaqzaq li-eu maqbawni, mqmaq maqbyav yarzir nawq-anr jaceuq taef-a.